ນຶ່ງໃນປາກົດການທີ່ເປັນຜົນສະທ້ອນຈາກການທີ່ ອິນເດຍ ຫຼຸດການສົ່ງອອກອາຫານກໍຄືຕະຫຼາດເຖື່ອນທີ່ເຕີບໂຕຂຶ້ນໃນປະເທດເພື່ອນບ້ານ ທີ່ໃຊ້ຄຳເປັນສື່ກາງໃນການຊື້ຊາຍແລກປ່ຽນ, ອີງຕາມລາຍງານຂອງອົງການຂ່າວ ຣອຍເຕີ.
ລາຄາສິນຄ້າຈຳພວກອາຫານໃນປະເທດ ບັງກລາແດັສ ໄດ້ດີດຕົວຂຶ້ນສູງ ຫຼັງຈາກ ອິນເດຍ ທີ່ເປັນຜູ້ສົ່ງອອກຫຼັກ ໄດ້ຫຼຸດການສົ່ງອອກສິນຄ້າອາຫານຈຳພວກເຂົ້າ, ຫົວບົ່ວ, ນ້ຳຕານ ແລະ ອື່ນໆ ເພື່ອແກ້ບັນຫາສິນຄ້າຂາດແຄນໃນປະເທດຕັ້ງແຕ່ກາງປີ 2022 ເປັນຕົ້ນມາ.
ການຫ້າມສົ່ງອອກດັ່ງກ່າວນຳມາຊຶ່ງການລັກລອບຂົນສົ່ງສິນຄ້າຂ້າມແດນແບບຜິດກົດໝາຍ ແລະ ບໍ່ເສຍພາສີຕາມພື້ນທີ່ຊາຍແດນຂອງທັງສອງປະເທດທີ່ມີຄວາມຍາວປະມານ 4,000 ກິໂລແມັດໃນລັກສະນະກຸ່ມຄ້າຢາເສບຕິດເຮັດນຳກັນ.
ທີ່ຜ່ານມາມີກໍລະນີເຈົ້າໜ້າທີ່ສາມາດຈັບກຸມຜູ້ລັກລອບຂົນນ້ຳຕານເຂົ້າປະເທດ ບັງກລາແດັສ ດ້ວຍການເຊື່ອງໄວ້ຢູ່ໃຕ້ແຜ່ນບັນຈຸດິນຊາຍ, ລວມເຖິງການກວດພົບຄົນແອບເຊື່ອງຄຳ 4.7 ກິໂລກຣາມໄວ້ໃນໄສ້ກອງອາກາດລົດຈັກຂະນະທີ່ກຳລັງມຸ່ງໜ້າໄປປະເທດ ອິນເດຍ.
ຄຳໄດ້ຖືກນຳມາໃຊ້ເປັນສື່ກາງເພາະວ່າ ອິນເດຍ ເປັນຜູ້ບໍລິໂພກຄຳລາຍໃຫຍ່ອັນດັບສອງຂອງໂລກ ບວກກັບການທີ່ລາຄາຄຳສູງຂຶ້ນ 50 ເປີເຊັນຕັ້ງແຕ່ໄລຍະກາງປີ 2022 ເຮັດໃຫ້ຜູ້ຄ້າໃນຕະຫຼາດສີເທົາແນມເຫັນໂອກາດທີ່ຈະເກງກຳໄລຈາກລາຄາຂອງຄຳໃນຕະຫຼາດ ອິນເດຍ ແລະ ຈາກລາຄາຂອງສິນຄ້າອາຫານໃນ ບັງກລາແດັສ ທີ່ສູງກວ່າລາຄາໃນ ອິນເດຍ 150 ເປີເຊັນ.
ຍ້ອນແນວນັ້ນຄຳຈຶ່ງຖືກລັກລອບນຳເຂົ້າແບບຫຼີກລ່ຽງພາສີອາກອນໃນຖານະສິນຄ້າເພື່ອແລກປ່ຽນກັບອາຫານ ແລະ ຄູ່ຄ້າກໍຈະນຳຄຳໄປຂຶ້ນເປັນເງິນສົດໃນອິນເດຍ ເພື່ອກິນສ່ວນຕ່າງກຳໄລ ຫຼືບໍ່ກໍຂາຍຕໍ່ໃຫ້ກັບໂຮງສະກັດຄຳໃນລາຄາທີ່ຖືກກວ່າຕະຫຼາດ, ອີງຕາມທ່ານ ຮາຊາດ ອັດຈເມຣາ ຜູ້ຄ້າຄຳຈາກບໍລິສັດ JJ Goldhouse ໃນເມືອງ ກັລກັດຕາ ປະເທດ ອິນເດຍ.
ໃນໄລຍະທີ່ມີການລາຍງານຂ່າວ ສ່ວນຕ່າງກຳໄລຂອງຄຳທີ່ຊື້ຊາຍໃນລັກສະນະນີ້ຢູ່ທີ່ 700,000 ຣູປີຕໍ່ກິໂລກຣາມ ຄິດເປັນເງິນໂດລາປະມານ 6,750 ໂດລາ.
ສະພາຄຳໂລກລະບຸວ່າ ເມື່ອປີ 2023 ຍອດການນຳເຂົ້າຄຳແບບຜິດກົດໝາຍໃນ ອິນເດຍ ຢູ່ທີ່ 156 ໂຕນ, ເຊິ່ງເພີ່ມຂຶ້ນຈາກ 100 ໂຕນເມື່ອປີ 2022.
ແຫຼ່ງຂ່າວໃນອຸດສາຫະກຳ ແລະ ພາກລັດກ່າວຕໍ່ອົງການຂ່າວຣອຍເຕີວ່າ ເກືອບນຶ່ງໃນສາມຂອງຄຳເຖື່ອນທີ່ມາຈາກ ບັງກລາແດັສ ນັ້ນ, ຈຳນວນຫຼາຍຖືກໃຊ້ເພື່ອແລກປ່ຽນກັບອາຫານ.