ຜູ້ຊ່ອຍທີ່ສຳຄັນ 3 ຄົນຂອງທ່ານ Ben Carson ທີ່ສະໝັກເປັນ
ປະທານາທິບໍດີ ຂອງພັກຣີພັບບລີກັນ ໄດ້ລາອອກ ຊຶ່ງພາໃຫ້ມີ
ການປ່ຽນແປງຢ່າງໃຫຍ່ ໃນການໂຄສະນາຫາສຽງຂອງທ່ານບໍ່
ຮອດຫ້າອາທິດ ກ່ອນທີ່ບັນດາຜູ້ມີສິດປ່ອນບັດ ຢູ່ລັດໄອໂອວາ
ຈະເລີ້ມຂັ້ນຕອນການສະເໜີຊື່ແຕ່ງຕັ້ງຜູ້ສະໝັກຂອງພັກສຳລັບ
ປີ 2016.
ທ່ານ Carson ຊຶ່ງເປັນຊາວຄຣິສຕຽນນິຍົມແນວທາງເດີມ ໃນ
ຄັ້ງນຶ່ງນັ້ນ ເຄີຍເປັນຄູ່ແຂ່ງຂອງທ່ານ Donald Trump ທີ່ມີຄະ
ແນນສຽງນຳໜ້າຂອງພັກໃນເວລານີ້ ໃນການແຂ່ງຂັນເພື່ອໃຫ້
ເປັນຜູ້ຖືກແຕ່ງຕັ້ງຂອງພັກຍາດເອົາທຳນຽບຂາວ ແຕ່ປາກົດວ່າທ່ານພວມດີ້ນຮົນຕໍ່ສູ້ ໃນ
ການຢັ່ງຫາງສຽງປະຊາຊົນເມື່ອສອງສາມ ອາທິດທີ່ຜ່ານມານີ້.
ທ່ານ Barry Bennett ຜູ້ຈັດການກ່ຽວກັບການໂຄສະນາຫາສຽງຂອງທ່ານ Carson ນາງ
Lisa Coen ຮອງຜູ້ຈັດການ ໃນການໂຄສະນາຫາສຽງ ແລະທ່ານ Dough Watts ຜູ້ອຳ
ນວຍການດ້ານສື່ສານຄົມມະນາຄົມ ຕ່າງກໍໄດ້ພາ ກັນລາອອກ ໃນວັນພະຫັດວານນີ້ ໂດຍ
ອ້າງສາເຫດກ່ຽວກັບຄວາມບໍ່ພໍໃຈ ຍ້ອນອິດທິພົນຂອງຜູ້ຈັດການທາງທຸລະກິດຂອງທ່ານ
ໝໍຜ່າຕັດປະສາດ ທີ່ອອກກິນເບ້ຍບຳນານແລ້ວທ່ານນີ້ແລະຄຳຖາມກ່ຽວກັບຄວາມພ້ອມ
ຂອງຜູ້ສະໝັກໃນການທີ່ຈະເຂົ້າກຳຕຳແໜ່ງຢູ່ທຳນຽບຂາວ.
ທ່ານ Carson ເຄີຍເປັນຄູ່ແຂ່ງ ຂອງທ່ານ Trump ມາແລ້ວ ໃນການຍາດເອົາຄະແນນ
ສຽງການເປັນຜູ້ນຳ ຂອງຜູ້ສະໝັກພັກຣີພັບບລີກັນ ເມື່ອກາງເດືອນຕຸລາຜ່ານມາ ແຕ່ຫຼັງ
ຈາກນັ້ນ ຄະແນນສຽງຂອງທ່ານກໍໄດ້ຕົກຕ່ຳລົງຢູ່ໃນລະດັບ 10 ເປີເຊັນໃນການຢັ່ງຫາງ
ສຽງເທື່ອຫຼ້າສຸດຂອງ CNN/ORC ຊຶ່ງເຮັດໃຫ້ທ່ານ ມີແຄນເປັນທີສາມຫ່າງໆ ທໍ່ກັນກັບ
ສະມາຊິກສະພາສູງ Marco Rubio ຮອງ ຈາກທ່ານ Trump ແລະສະມາຊິກສະພາສູງ
Ted Cruz.
ການໂຄສະນາຫາສຽງຂອງທ່ານ Carson ແມ່ນໄດ້ເກີດການຖົກຖຽງກັນຢ່າງເປັນການ
ເປີດເຜີຍລະຫວ່າງທ່ານ Bennett ແລະທ່ານ Watts ກັບທ່ານ Armstrong Williams
ຜູ້ຈັດການທາງດ້ານທຸລະກິດ ແລະໝູ່ເພື່ອນທີ່ໃກ້ຊິດຂອງທ່ານ Carson ທີ່ບໍ່ມີບົດບາດ
ຢ່າງເປັນທາງການໃດໆ ໃນການໂຄສະນາຫາສຽງ. ທ່ານ Williams ເປັນນັກຂຽນຄໍລຳ
ແລະເປັນຜູ້ຈັດລາຍການໂອ້ລົມທາງວິທະຍຸແລະໂທລະພາບ.
ທ່ານ Williams ໄດ້ຕຳໜິຕິຕຽນ ທ່ານ Bennett ແລະທ່ານ Watts ວ່າ ບໍ່ໄດ້ກະກຽມຜູ້
ສະໝັກ ຢ່າງເປັນການພຽງພໍ ສຳລັບການປາກົດໂຕໃນທີ່ສາທາລະນະໂດຍສະເພາະໃນ
ດ້ານນະໂຍບາຍຕ່າງປະເທດແລະບັນຫາທີ່ຄອບງຳໃນເລື້ອງເຊື້ອຊາດຜິວພັນ ໃນໄລຍະ
ສອງສາມເດືອນຜ່ານມານີ້.
Your browser doesn’t support HTML5
US Politics Carson