ແຫຼ່ງຂ່າວຄວາມປອດໄພໃນປະເທດ ເທີກີ ກ່າວວ່າ ມີເຈົ້າໜ້າທີ່ຕຳຫຼວດຢ່າງໜ້ອຍ 3 ຄົນໄດ້ຖືກຂ້າຕາຍໃນວັນອາທິດມື້ນີ້ ຢູ່ທາງພາກຕາເວັນອອກສຽງໃຕ້ຂອງປະເທດ ໃນເຫດການຮ້າຍແຮງຄັ້ງຫຼ້າສຸດຫຼັງຈາກການເກີດຄວາມຮຸນແຮງຫຼາຍສັບປະດາ ລະຫວ່າງທະຫານລັດຖະບານ ກັບ ພວກຫົວຮຸນແຮງຊາວ ເຄີດ.
ແຫຼ່ງຂ່າວກ່າວວ່າ ຕຳຫຼວດສອງຄົນໄດ້ຖືກຂ້າຕາຍໃນການໂຈມຕີດ້ວຍລະເບີດລົດໃສ່ລົດ ໃກ້ໆກັບດ່ານກວດກາຂອງຕຳຫຼວດຢູ່ນອກເມືອງ Sirnak. ທະຫານຮັກສາຄວາມປອດໄພໄດ້ໄລ່ຕາມຜູ້ຕ້ອງສົງໄສດ້ວຍເຮືອບິນ ເຮລິຄັອບເຕີ, ຍິງປືນໃສ່ພວກຫົວຮຸນແຮງ ແລະ ໄດ້ເຮັດໃຫ້ສອງຄົນເສຍຊີວິດໃນຂະນະທີ່ພວກເຂົາພາກັນຫຼົບໜີໄປນັ້ນ.
ເມືອງ Cizre ປະເທດເທີກີ
ເຈົ້າໜ້າທີ່ຕຳຫຼວດອີກຄົນໜຶ່ງໄດ້ຖືກຂ້າຕາຍໃນເມືອງ Silvan ຂອງແຂວງ Diyarbakir ຫຼັງຈາກພວກຫົວຮຸນແຮງ ພັກກຳມະກອນຊາວ ເຄີດ ຫຼື PKK ໄດ້ທຳການໂຈມຕີດ້ວຍຈະຫຼວດ.
ໃນສັບປະດາທີ່ຜ່ານມາ, ທະຫານຮັກສາຄວາມປອດໄພຂອງ ເທີກີ ໄດ້ດຳເນີນການປະຕິບັດການທາງທະຫານຄັ້ງໃຫຍ່ໃນເມືອງ Cizre ຢູ່ທາງພາກຕາເວັນອອກສຽງໃຕ້. ໃນເມື່ອການປະກາດພາວະສຸກເສີນ 9 ມື້ໄດ້ຖືກຍົກເລີກໃນວັນເສົາວານນີ້, ບັນດາປະຊາຊົນໄດ້ອອກມາທີ່ຈຸດຂອງການຖືກທຳລາຍ. ເຮືອນ ແລະ ລົດຫຼາຍຄັນໄດ້ຖືກເຈາະເປັນຮູດ້ວຍລູກປືນໃຫຍ່ ແລະ ກະສອບລູກປືນກໍໄດ້ກະຈາຍໄປທົ່ວທຸກມຸມຂອງພື້ນທີ່.
Your browser doesn’t support HTML5
Turkey Kurds