ລັດ California ທາງພາກຕາເວັນຕົກ, ລັດ Tennessee
ທາງພາກກາງຕອນໃຕ້ ແລະລັດ Florida ທາງພາກຕາເວັນ
ອອກສຽງໃຕ້ຂອງສະຫະລັດແມ່ນມີພວກທີ່ຖືກ lottery ທີ່ຮູ້ກັນ
ວ່າ Powerball ທີ່ມີລາງວັນຫລາຍເປັນປະຫວັດການ 1 ພັນ
500 ລ້ານໂດລ່າ.
ໂຄສົກຂອງຫ້ອງການ lottery ໃນລັດ California ທ່ານ Alex
Traverso ໄດ້ກ່າວໃນແລງວັນພຸດວານນີ້ວ່າ ນຶ່ງໃນ lottery
ທີ່ຖືກນັ້ນ ແມ່ນໄດ້ຊື້ຈາກຮ້ານຊື້ສະດວກ 7-11 ໃນເຂດ Chino Hills ຄຸ້ມທີ່ຂ້ອນຂ້າງຮັ່ງມີ ນອກອອກໄປຈາກນະຄອນ Los Angeles. ສະຖານທີ່ອື່ນໆ ທີ່ມີຄົນຖືກ lottery ນັ້ນ ແມ່ນຢູ່ໃນລັດ Tennessee ແລະລັດ Florida ຊຶ່ງຍັງບໍ່ທັນຮູ້ແນ່ນອນເທື່ອວ່າຢູ່ບ່ອນໃດແທ້. ຍັງບໍ່ທັນເປັນທີ່ຈະແຈ້ງ ກ່ຽວກັບລາຍລະອຽດຕ່າງໆຂອງພວກທີ່ຖືກ lottery ນັ້ນເທື່ອ.
ໂອກາດຂອງການທີ່ຈະຖືກ lottery ນີ້ແມ່ນກະປະມານວ່າ 1 ໃນຈຳນວນ 292 ລ້ານ 2 ແສນ.
ພວກທີ່ຖືກລາງວັນ Powerball ທັງໝົດນີ້ ຈະຕ້ອງແບ່ງປັນເງິນລາງວັນເທົ່າໆກັນ. ພວກເຂົາເຈົ້າອາດຈະເອົາຍອດທັງໝົດບາດດຽວເລີຍກໍໄດ້ ຊຶ່ງຈະຖືກຕັດພາສີເປັນຈຳນວນຫຼວງຫຼາຍ ຫຼືບໍ່ ກໍຮັບເປັນເງິນລາຍປີ ໃນໄລຍະ 29 ປີ ຊຶ່ງຖືກຕັດພາສີເປັນຫລຸດນ້ອຍລົງ.
ເຈົ້າໜ້າທີ່ຂອງຫ້ອງການ lottery ກ່າວວ່າ ການຂາຍບັດ lottery ແມ່ນສູງເປັນປະຫວັດການ ຊຶ່ງເຮັດໃຫ້ລາງວັນມີຍອດສູງຫຼາຍ ໃນທາງດຽວກັນກໍແມ່ນວ່າ ໄດ້ຂາຍບັດຫຼາຍຂຶ້ນ.
ເກືອບວ່າທັງ 50 ລັດໃນສະຫະລັດ ອະນຸຍາດໃຫ້ມີການຂາຍ lottery ຢ່າງຖືກຕ້ອງຕາມກົດໝາຍ ແຕ່ມີປະມານ 6 ລັດທີ່ບໍ່ອະນຸຍາດໃຫ້ປະກອບທຸລະກິດດ້ານນີ້ ຊຶ່ງສ່ວນໃຫຍ່ຂອງການຂາຍ lottery ນີ້ ແມ່ນມີຂຶ້ນຢູ່ຕາມຊາຍແດນ ຂອງລັດທີ່ບໍ່ອະນຸຍາດໃຫ້ມີການຂາຍບັດ lottery.
Your browser doesn’t support HTML5
US Lottery Jackpot Tops $1 Billion, Shattering Records