ຄວາມຮຸນແຮງລະຫວ່າງ ພວກຊາວນຸ່ມປາແລັດໄຕນ໌ ແລະ
ເຈົ້າໜ້າທີ່ຕຳຫຼວດ ໄດ້ທະວີຮ້າຍແຮງຂຶ້ນໃນວັນເສົາວານນີ້
ຢູ່ໃນ ເມືອງ Hebron ແລະ Jerusalem ໃນເຂດຝັ່ງຕາເວັນຕົກ
ຂອງແມ່ນ້ຳຈໍແດນ ທີ່ຄອບຄອງໂດຍອິສຣາແອລ ໂດຍມີລາຍງານ
ຈາກເຈົ້າໜ້າທີ່ຕຳຫຼວດວ່າ ມີຊາວປາແລັສໄຕນ໌ ຖືມີດເປັນອາວຸຸດ
ແກວ່ງໄປແກວ່ງມາ ຢ່າງໜ້ອຍ 4 ຄົນ ທີ່ລວມທັງ ຍິງສາວ ອາຍຸຸ
16 ປີ ນຳດ້ວຍ ພວກກ່ຽວຖືກຂ້າຕາຍໃນເຫດການຕ່າງກັນ.
ເຈົ້າໜ້າທີ່ອິສຣາແອລ ກ່າວວ່າ ມີເຈົ້າໜ້າທີ່ຮັກສາຄວາມປອດໄພ
ອິສຣາແອລ ຈຳນວນນຶ່ງ ໄດ້ຮັບບາດເຈັບ ໃນການໂຈມຕີຫຼາຍບັ້ນ.
ຊາວປາແລັສໄຕນ໌ ຢ່າງໜ້ອຍ 40 ຄົນ ແລະ ຊາວອິສຣາແອລ 7
ຄົນ ໄດ້ເສຍຊີວິດ ໃນລະຫວ່າງ ຄວາມຮຸນແຮງຢູ່ຕາມທ້ອງຖະໜົນ ເມື່ອສອງສາມອາທິດ
ຜ່ານມາ ທີ່ທາງການປາແລັສໄຕນ໌ ໄດ້ເຊື່ອມໂຍງໃສ່ ການລ່ວງລ້ຳເຂົ້າໄປໃນສະຖານທີ່
ສັກສິດ ທີ່ເພີ້ມຂຶ້ນ ຂອງຊາວຢິວ ຢູ່ທາງພາກຕາເວັນອອກຂອງ Jerusalem ທີ່ຮູ້ຈັກກັນ
ສຳຫລັບຊາວມຸສລິມ ວ່າ ວັດມຸສລິມ al-Aqsa ແລະ ສຳຫລັບຊາວຢິວ ວ່າ Temple
Mount ນັ້ນ. ອິສຣາແອລ ໄດ້ປະຕິເສດຢ່າງແຂງຂັນ ຕໍ່ຂໍ້ອ້າງຂອງທາງການປາແລັສໄຕນ໌
ທີ່ວ່າ ຕົນມີຈຸດປະສົງທີ່ຈະຢຶດເອົາສະຖານທີ່ສັກສິດດັ່ງກ່າວນັ້ນ.
ຕຳຫຼວດຊາຍແດນ ຍ່າງຢູ່ໃກ້ ຈຸດເກີດເຫດ ບ່ອນຊາຍປາແລັສໄຕນ໌ ຄົນນຶ່ງ ຖືກຂ້າຕາຍ ຫຼັງຈາກ ຜູ່ກ່ຽວ ພະຍາຍາມແທງ ທະຫານຄົນນຶງ ໃນເຂດຕັ້ງຖິ່ນຖານຂອງຊາວຢິວ ທີ່ Jerusalem ກ້ຳຕາເວັນອອກ ຂອງ Armon Hanatsiv ກົງກັນຂ້າມ ກັບ ຄຸ້ມ Jabal Mukaber ຂອງຊາວປາແລັສໄຕນ໌, ວັນທີ 17 ຕຸລາ 2015.
ໃນການໂຈມຕີບັ້ນນຶ່ງ ຕຳຫຼວດອິສຣາແອລ ກ່າວວ່າ ຕຳຫຼວດຊາຍແດນຄົນນຶ່ງ ທີ່ເຝົ້າ
ຍາມ ດ່ານກວດກາ Qalandiya ຢູ່ລະຫວ່າງ Jerusalem ແລະ ເຂດຝັ່ງຕາເວັນຕົກ ຂອງແມ່ນ້ຳຈໍແດນ ໄດ້ຍິງຊາຍນຸ່ມປາແລັສໄຕນ໌ ທີ່ຖືມີດເປັນອາວຸດ ທຳອິດ ແມ່ນບາດ
ເຈັບ ແລະ ຕໍ່ຈາກນັ້ນ ກໍໄດ້ເສຍຊິວິດ ຫຼັງຈາກທີ່ຜູ້ກ່ຽວ ພະຍາຍາມແທງຕຳຫຼວດຊາຍແດນ
ອີກເປັນເທື່ອທີສອງ. ການຍິງຕາຍດັ່ງກ່າວ ໄດ້ເກີດຂຶ້ນໃນຂະນະທີ່ ພວກນັກເຄື່ອນໄຫວ
ຊາວອິສຣາແອລ ແລະ ຊາວອາຣັບ ຫຼາຍຮ້ອຍຄົນ ໄດ້ເຕົ້າໂຮມກັນ ຢູ່ໃນນະຄອນ
Jerusalem ເມື່ອຕອນແລງວັນເສົາວານນີ້ ສຳຫລັບ ການໂຮມຊຸຸມນຸມເພື່ອສັນຕິພາບ.
ຕຳຫຼວດກ່າວວ່າ ຊາຍນຸ່ມ ອາຍຸ 16 ປີ ໄດ້ຖືກສັງຫານ ຢູ່ໃນບໍລິເວນດຽວກັນນັ້ນ ເມື່ອ
ຕອນເຊົ້າວັນເສົາວານນີ້ ຫຼັງຈາກ ຜູ້ຢືນເບິ່ງຄົນນຶ່ງ ບອກຕຳຫຼວດວ່າ ຊາຍນຸ່ມຄົນນັ້ນ
ມີພຶດຕິກຳທີ່ໜ້າສົງໄສ ແລະ ຕຳຫຼວດໄດ້ສອບຖາມຫາບັດປະຈຳຕົວຈາກຊາຍນຸ່ມດັ່ງກ່າວ.
ບັນດາເຈົ້າໜ້າທີ່ກ່າວວ່າ ຕຳຫຼວດສອງຄົນ ໄດ້ຍິງ ຜູ້ຕ້ອງສົງໄສ ໃນເວລາຜູ້ກ່ຽວພະຍາຍາມ
ແທງພວກເຂົາເຈົ້າ.
ສະພາຄວາມໝັ້ນຄົງ ອົງການສະຫະປະຊາຊາດ ລົງຂະແນນສຽງ ເພື່ອຮັບຮອງເອົາ ຍັດຕິສະບັບນຶ່ງ ຢູ່ທີ່ສຳນັກງານໃຫຍ່ ອົງການສະຫະປະຊາຊາດ ໃນນະຄອນ New York, ວັນທີ 20 ກໍລະກົດ 2015.
ຢູ່ໃນເມືອງ Hebron ທະຫານອິສຣາແອລ ກ່າວວ່າ ຊາວປາແລັສໄຕນ໌ ຄົນນຶ່ງ ຖືກຍິງ
ອາການສາຫັດ ໃນຂະນະທີ່ ຜູ້ກ່ຽວພະຍາຍາມແທງ ຜູ້ຕັ້ງຖິ່ນຖານໃໝ່ຊາວອິສຣາແອລ
ທີ່ບໍ່ມີອາວຸດ. ໃນເຫດການທີສອງຢູ່ໃນເມືອງດຽວກັນ ຕຳຫຼວດກ່າວວ່າ ຍິງສາວຊາວ
ປາແລັສໄຕນ໌ຄົນນຶ່ງ ໄດ້ຖືກຍິງຕາຍ ໃນຂະນະທີ່ນາງໄດ້ ພະຍາຍາມແທງທະຫານ
ອິສຣາແອລແມ່ຍິງ ຢູ່ນອກດ່ານກວດກາແຫ່ງນຶ່ງ. ຊາວປາແລັສໄຕນ໌ຄົນທີສາມ ຖືກຍິງ
ໂດຍຕຳຫຼວດໃນເມືອງ Hebron ເຊັ່ນກັນ ຫຼັງຈາກທີ່ຜູ້ກ່ຽວແທງ ແລະ ເຮັດໃຫ້ເຈົ້າໜ້າທີ່
ຕຳຫຼວດ ຄົນນຶ່ງໄດ້ຮັບບາດເຈັບ ເມື່ອຕອນຄຳມືດ. ຕຳຫຼວດບໍ່ໄດ້ເວົ້າວ່າ ຜູ້ທຳການໂຈມ
ຕີນັ້ນ ເສຍຊີວິດ ຫຼືບໍ່.
ປະທານາທິບໍດີ ສະຫະລັດ ທ່ານບາຣັກ ໂອບາມາ ກ່າວຖະແຫລງ ໃນວັນສຸກຜ່ານມາ
ຮຽກຮ້ອງ ບັນດາຜູ້ນຳ ໃນຂົງເຂດໃຫ້ “ຜ່ອນເບົາຖ້ອຍຄຳລົງ” ຊຶ່ງຄຳເວົ້າບໍ່ດີອາດສົ່ງເສີມ
“ຄວາມຮຸນແຮງ ແລະ ຄວາມໂກດແຄ້ນ ຫຼື ຄວາມບໍ່ເຂົ້າອົກເຂົ້າໃຈກັນ.”
ປະທານາທິບໍດີ ສຫລ ກ່າວອີກວ່າ ມັນຂຶ້ນຢູ່ກັບ ອິສຣາແອລ ແລະ ປາແລັສໄຕນ໌ ເອງ
ທີ່ຈະຕັດສິນວ່າ ຈະເລີ້ມຄືນ ການເຈລະຈາສັນຕິພາບ ສະໜັບສະໜູນໂດຍສະຫະລັດ
ທີ່ໄດ້ຍຸດຕິລົງນັ້ນ ຫຼືບໍ່. ທ່ານໂອບາມາ ເວົ້າວ່າ “ຂ້າພະເຈົ້າ ຄິດວ່າ ມັນຈະຂຶ້ນຢູ່ກັບ
ຝ່າຍກ່ຽວຂ້ອງຕ່າງໆ ແລະ ພວກເຮົາພ້ອມແລ້ວ ທີ່ຈະຊ່ວຍເຫຼືອ ເພື່ອເບິ່ງວ່າ
ຖ້າພວກເຮົາສາມາດ ເລີ້ມຄືນ ການພົວພັນທີ່ສ້າງສັນຫຼາຍຂຶ້ນຕື່ມອີກ.”
ລັດຖະມົນຕີຕ່າງປະເທດ ສະຫະລັດ ທ່ານ John Kerry ມີກຳນົດທີ່ຈະພົບປະກັບ ນາຍົກ
ລັດຖະມົນຕີ ອິສຣາແອລ ທ່ານ Benjamin Netanyahu ໃນອາທິດໜ້າ. ກະຊວງການ
ຕ່າງປະເທດ ກ່າວກ່າວ ການພົບປະກັນນັ້ນ ຈະມີຂຶ້ນຢູ່ໃນປະເທດເຢຍຣະມັນ ແຕ່ຫາກ
ວ່າ ລາຍລະອຽດຕ່າງໆ ຂອງການພົບປະກັນນັ້ນ ຍັງບໍ່ໄດ້ສະລຸບເທື່ອ.
Your browser doesn’t support HTML5
Israel Palestinians