ການປ່ຽນແປງຂອງສະພາບດິນຟ້າອາກາດສົ່ງຜົນໃຫ້ເກີດພາວະໂລກຮ້ອນແລະແຫ້ງແລ້ງຫຼາຍຂຶ້ນ ແລະເມື່ອເກີດເຫດໄຟປ່າ ຄວາມເສຍຫາຍຈຶ່ງລຸກລາມໄວຂຶ້ນກວ່າເກົ່າ ດ້ວຍເຫດນີ້ ທີມນັກສຶກສາລຸ້ນໃໝ່ຈຶ່ງທົດລອງພັດທະນາອຸປະກອນທີ່ໄວຕໍ່ຄວາມຮ້ອນເຊິ່ງຈະສາມາດໃຊ້ກວດຈັບໄຟປ່າໄດ້ຢ່າງວ່ອງໄວ ໂດຍຫວັງວ່າ ຈະຊ່ອຍຫລຸດຄວາມເສຍຫາຍຈາກການຂະຫຍາຍໂຕຂອງໄຟໄໝ້.
ອຸປະກອນດັ່ງກ່າວ ຊື່ວ່າ ພາຍຣີ (Pyri) ເຊິ່ງສ້າງຂຶ້ນຈາກວັດສະດຸຊີວະພາບ ໂດຍສິ່ງປະດິດນີ້ ມີຮູບຊົງຄ້າຍຄືໝາກຕົ້ນແປກທີີ່ເບິ່ງກົມກີືນໄປກັບທຳມະຊາດ ແລະພາຍໃນມີກົນໄກການກວດຈັບຄວາມຮ້ອນທີ່ເຮັດວຽກອັດໂຕໂນມັດ ດ້ວຍການສົ່ງສັນຍານວິທະຍຸແຈ້ງເຕືອນໄປຍັງໜ່ວຍງານສຸກເສີນຫາກອຸປະກອນທີ່ໄວຕໍ່ຄວາມຮ້ອນນີ້ ພົບວ່າ ເກີດໄຟປ່າຂຶ້ນ.
Pyri ຖືກພັດທະນາຂຶ້ນໂດຍທີມນັກສຶກສາຈາກໂຄງການວິສະວະກໍາການອອກແບບນະວັດຕະກຳ ພາຍໃຕ້ການຮ່ວມມືລະຫວ່າງ Royal College of Art ແລະ Imperial College London.
ທີມນັກສຶກສາຈາກໂຄງການວິສະວະກໍາການອອກແບບນະວັດຕະກຳ ພາຍໃຕ້ການຮ່ວມມືລະຫວ່າງ Royal College of Art ແລະ Imperial College London ຜູ້ຮ່ວມອອກແບບອຸປະກອນ ພາຍຣີ (Pyri)
ທ່ານ ແບຣດ ກູດວິນ ເປັນນຶ່ງໃນສະມາຊິກທີມພັດທະນາ Pyri ບອກວ່າ ອຸປະກອນຊິ້ນນີ້ ຖືກສ້າງຂຶ້ນຈາກວັດສະດຸທຳມະຊາດ ເຊັ່ນ ຂີ້ເຜິ້ງ, ຖ່ານ, ຮວມເຖິງສ່ວນປະກອບທີ່ມາຈາກສ່ວນປະສົມເຫຼົ່ານີ້ ເຊິ່ງເປັນການໃຊ້ງານຮູບແບບໃໝ່ ເພື່ອໃຊ້ກະຕຸ້ນແຫລ່ງພະລັງງານທີ່ສາມາດປ່ອຍຄື້ນວິທະຍຸ ເຊິ່ງສາມາດກວດຈັບໄດ້ຈາກໄລຍະໄກ ບໍ່ວ່າຈະເປັນກິໂລແມັດ ຫຼືແມ່ນກະທັງຫຼາຍສິບກິໂລແມັດ.
ພາຍຣີພອດ (PyriPod) ໃຊ້ພະລັງງານຈາກແບັດເຕີຣີ ທີ່ຖືກອອກແບບມາໂດຍສະເພາະ ໃຫ້ມີຄວາມສອດຄ່ອງກັບການໃຊ້ງານໃນພື້ນທີ່ຫ່າງໄກສອກຫລີກ ສົມບຸກສົມບັນຕໍ່ເຫດໄພພິບັດ.
ອຸປະກອນນີ້ ຈະເຝົ້າກວດຈັບຄວາມຮ້ອນໂດຍສົ່ງພະລັງງານໄວ້ໃຫ້ສາມາດໃຊ້ໄດ້ເປັນເວລາດົນ ຂະນະທີ່ວິທີການຕິດຕັ້ງ ກໍສາມາດເຮັດໄດ້ທັງການວ່ານຈາກເຮືອບິນ ຫຼືນຳໄປວາງໄວ້ດ້ວຍມືໃນຕຳແໜ່ງທີ່ຕ້ອງການ.
ພາບແຕ້ມແບບຢ່າງຂອງອຸປະກອນ Pyri ທີ່ສະແດງໃຫ້ເຫັນການທຳງານຂອງມັນ
ນອກຈາກນີ້ Pyri ຍັງຂັບເຄື່ອນດ້ວຍປັນຍາປະດິດ (AI) ເພື່ອກວດສອບຕຳແໜ່ງຂອງສັນຍານ ຮ່ວມກັບຂໍ້ມູນສະພາບອາກາດ ແລະຂໍ້ມູນຈາກດາວທຽມ ທີ່ມີຢູ່ ເຮັດໃຫ້ສາມາດຄາດການການຂະຫຍາຍໂຕຂອງໄຟປ່າທີ່ອາດຈະເກີດຂຶ້ນ ຈາກນັ້ນ ລະບົບຈະສົ່ງສັນຍານແຈ້ງເຕືອນໄປຍັງໜ່ວຍງານທີ່ກ່ຽວຂ້ອງ ເພື່ອປະສານການອົບພະຍົບຜູ້ຄົນ ແລະທຳການດັບໄຟໄດ້ຢ່າງວ່ອງໄວ.
ທ່ານ ກູດວິນ ສະມາຊິກທີມພັດທະນາ Pyri ເລົ່າເຖິງອຸປະກອນຊິ້ນງານຕົ້ນແບບວ່າ ຕອນນີ້ກຳລັງຄ່ອຍໆ ເປື່ອຍສະຫຼາຍໄປຕາມທຳມະຊາດຕາມທີ່ຕ້ອງການ ເປັນການຕອບໂຈດຂອງການຕິດຕັ້ງ ວາງໄວ້ ແລະບໍ່ຕ້ອງໄປເບິ່ງແຍງເລີຍ.
ອຸປະກອນ Pyri ເມື່ອນຳໄປວາງໄວ້ຢູ່ໃນທຳມະຊາດ ເພື່ອກວດຈັບໄຟປ່າໄດ້ຕັ້ງແຕ່ຫົວທີ
ທ່ານຍັງກ່າວດ້ວຍວ່າ “ເມື່ອເກີດເຫດໄຟປ່າຂຶ້ນແທ້ຈິງ ອຸປະກອນຈະຖືກເຜົາ ໄໝ້ ສົ່ງຜົນກະທົບຕໍ່ສິ່ງແວດລ້ອມໜ້ອຍທີ່ສຸດ ເຮັດໃຫ້ບໍ່ກໍ່ໃຫ້ເກີດມົນລະພາວະຫຼືຂີ້ເຫຍື້ອ ແບບດຽວກັນກັບວັດສະດຸທີ່ເຮັດຈາກພລາສຕິກ.”
ນະວັດຕະກຳກວດຈັບຄວາມຮ້ອນທີ່ເປັນມິດຕໍ່ສິ່ງແວດບ້ອມຢ່າງ Pyri ຍັງໄດ້ຮັບລາງວັນ ເຈມສ໌ ໄດສັນ (James Dyson Award) ຈາກປະເທດອັງກິດ ແລະໃນອະນາຄົດ ທີມງານມີແຜນທີ່ຈະທົດສອບອຸປະກອນນີ້ ໃນໂຄງການນຳສະຖານທີ່ຕ່າາງໆເພື່ອທີ່ຈະພັດທະນາປະສິດທິພາບຕໍ່ໄປ.