ກະແສການລະບາດຢ່າງໜັກທີ່ສຸດຂອງໂຄວິດ-19 ທີ່ເລີ້ມຕົົ້ນມາແຕ່ກາງ ເດືອນເມສາ
ນັ້ນ ໄດ້ສົ່ງຜົນກະທົບຢ່າງໜັກໜ່ວງເປັນພິເສດຕໍ່ຊາວລາວຜູ້ມີລາຍໄດ້ຕໍ່າ ແຕ່ການ
ຊ່ວຍເຫລືອຂອງລັດຖະບານ ກໍຍັງຊັກຊ້າຫລາຍ ແລະຍັງບໍ່ທັນ ເຫັນໄດ້ຢ່າງເປັນຮູບ
ປະທໍາເລີຍ ອີງຕາມການບອກເລົ່າ ຂອງກໍາມະກອນ ແລະເຈົ້າໜ້າທີ່ທ້ອງຖິ່ນບາງຄົນ.
ກິ່ງສະຫວັນ ມີລາຍລະອຽດກ່ຽວກັບເລື້ອງນີ້ຈາກນັກ ຂ່າວຂອງພວກເຮົາ ມາສະເໜີ
ທ່ານ ໃນອັນດັບຕໍ່ໄປ.
Your browser doesn’t support HTML5
ເຊີນຟັງລາຍງານຈາກ ສປປ ລາວ
Your browser doesn’t support HTML5
ເຊີນຊົມ ວີດີໂອ ຈາກ ສປປ ລາວ
ກະແສຟອງການລະບາດຂອງພະຍາດໂຄວິດ-19 ທີ່ໄດ້ເລີ້ມຕົ້ນຂຶ້ນແຕ່ກາງ ເດືອນເມສາ
ຊຶ່ງເຮັດໃຫ້ຈໍານວນຄົນຕິດພະຍາດເພີ້ມຂຶ້ນຢ່າງໄວວາຈາກ 48 ກໍລະນີ ຈົນເກືອບຮອດ
2,000 ກໍລະນີແລ້ວນັ້ນ ໄດ້ເຮັດໃຫ້ມີຄໍາສັ່ງ ໃຫ້ປິດ ຄຸ້ມບ້ານຫລາຍແຫ່ງໃນນະຄອນ
ຫລວງວຽງຈັນແລະບາງແຂວງທີ່ເປັນຈຸດລະ ບາດ ຢ່າງໜັກຂອງພະຍາດນີ້ ນັບແຕ່ວັນທີ
22 ເມສາ ຕໍ່ມາຈົນຮອດວັນທີ 19 ມິຖຸນາໄດ້ເຮັດໃຫ້ຊີວິດການເປັນຢູ່ຂອງປະຊາຊົນ
ໂດຍລວມປະສົບຄວາມ ຫຍຸ້ງຍາກຫຼາຍ ໂດຍສະເພາະຜູ້ທີ່ມີລາຍໄດ້ຕໍ່າໃນທຸກສາຂາ
ວຽກງານ ດັ່ງທີ່ ນັກທຸລະກິດທ່ານນຶ່ງໃນນະຄອນຫລວງວຽງຈັນໃຫ້ຄໍາເຫັນກ່ຽວກັບຜົນ
ກະທົບ ຢ່າງໜັກ ຂອງກະແສລະບາດຢ່າງຮ້າຍແຮງໃນໄລຍະນີ້ວ່າ:
“ເພາະວ່າ ມັນສັງຄົມເສດຖະກິດເດ ເຈົ້າບໍ່ແມ່ນທໍາມະດາ ທຸລະກິດນ້ອຍ ນັບແຕ່ຕັດຜົມ
ຂື້ນໄປນະ ຕັດຜົມທາລ໊ອກທາເລັບຮຽບຮ້ອຍໝົດເລີຍ ແຮງທຸກແຮງຊໍ້າ ພວກຊິໄປຂາຍ
ເຄື່ອງ ບ້ານນອກເອົາເຄື່ອງມາເລາະຂາຍ ໄປນັ່ງຂາຍຢູ່ແຄມທາງກະຍໍ່ໄດ້ດຽວນີ້ ຂ້ອຍ
ຢາກວ່າຈັກສິບປາຍປີຂຶ້ນໄປ ມັນປະຊາຊົນຊິຕາຍກ່ອນ”
ເພື່ອເປັນການແບ່ງເບົາຄວາມເເດືອດຮ້ອນໃຫ້ແກ່ກຸ່ມຄົນທີ່ມີລາຍໄດ້ໜ້ອຍ ແລະຫາ
ເຊົ້າກິນຄໍ່າທາງລັດຖະບານກໍໄດ້ມີຄໍາສັ່ງ ຂອງກະຊວງແຮງງານ ແລະ ສະຫວັດດີການ
ສັງຄົມສະບັບເລກທີ 1531 ລົງວັນທີ 5 ພຶດສະພາ, 2021 ອອກມາວ່າ ໃຫ້ເກັບກໍາຂໍ້ມູນ
ນອກລະບົບປະກັນສັງຄົມ ແລະປະຊາຊົນ ທີ່ທຸກຍາກ ເນື່ອງຈາກໄດ້ຮັບຜົນກະທົບ
ຈາກການລະບາດຂອງເຊື້ອພະຍາດໂຄວິດ-19. ໃນນັ້ນແມ່ນໃຫ້ພະແນກແຮງງານ ແລະ
ສະຫວັດດີການສັງຄົມ ໃນຂັ້ນແຂວງ, ນະຄອນຫລວງ ແລະເມືອງ ສົມທົບກັບບ້ານເປົ້າ
ໝາຍ ເພື່ອລາຍງານໃຫ້ລັດຖະບານພິຈາລະນາໃຫ້ການຊ່ວຍເຫລືອ.
ສ່ວນທາງຄະນະກໍາມະບານລາວກໍບອກວ່າ ທາງລັດຖະບານລາວໃຫ້ການຊ່ວຍເຫລືອ
ບັນເທົາທຸກແກ່ຄົນສອງກຸ່ມສໍາລັບພວກທີ່ມີປະກັນສັງຄົມ ແລະປະຊາຊົນຜູ້ທຸກຍາກທີ່
ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ດັ່ງທີ່ ພະນັກງານທ່ານນຶ່ງ
ໃນຄະນະກໍາມະບານນະຄອນຫລວງວຽງຈັນບອກວ່າ:
“ປະກັນສັງຄົມເພິ່ນຊ່ວຍຕົ້ວລະ ແມ່ນມີແຕ່ປະກັນສັງຄົມເພີ່ນຊ່ວຍເນາະ ແຕ່ວ່າຊ່ວຍຜູ້ທຸກຜູ້ຍາກເຂົາເຈົ້າໃຫ້ບ້ານເກັບຂໍ້ມູນ ແຕ່ວ່າຂໍ້ມູນຄອບຄົວຜູ້ທຸກຍາກແທ້ເຂົາກະສະເໜີໃຫ້ປະກັນສັງຄົມຊ່ວຍ, ໂຮງງານຕັດຫຍິບເພິ່ນຊ່ວຍແຕ່ພວກມີປະກັນສັງຄົມນະກະມີແຕ່ວ່າ ອັນທີໜຶ່ງ ພວກທີ່ເຂົ້າປະກັນສັງຄົມນະ ອັນທີສອງແມ່ນຊ່ວຍຄອບຄົວທີ່ທຸກຍາກ ໃຫ້ນາຍບ້ານຢັ້ງຢືນມີແຕ່ສອງໂຄງການນີ້ ອັນອື່ນບໍ່ທັນໄດ້ຍິນເທື່ອ.”
ເມື່ອຖາມເຖິງການຊ່ວຍເຫລືອຕົວຈິງສໍາລັບພວກທີ່ຂາດເຂີນໃນໄລຍະທີ່ມີການ ລະບາດ
ຢ່າງໜັກ ຂອງພະຍາດນີ້ ສ່ວນໃຫຍ່ແມ່ນມາຈາກ ປະຊາຊົນຜູ້ໃຈບຸນ ໄດ້ເຕົ້າໂຮມການບໍ
ລິຈາກເຄື່ອງຊ່ວຍເຫລືອ ແລ້ວນໍາເອົາໄປໃຫ້ການຈັດຕັ້ງໃດ ນຶ່ງເອົາໄປແຈກຢາຍ ແລະ
ການຊ່ວຍເຫລືອຕົ້ນຕໍກໍແມ່ນເອົາໃຫ້ແກ່ກໍາມະກອນ ໃນໂຮງງານຕ່າງໆດັ່ງທີ່ການບອກ
ເລົ່າຂອງຄະນະກໍາມະບານຂັ້ນສູນກາງທ່ານ ນຶ່ງວ່າ:
“ສ່ວນຫລາຍພວກເຮົາມັກໄປແຈກພວກເຄື່ອງທີ່ເຂົາເອົາມາອຸປະຖໍາ ສ່ວນຫຼາຍພວກມີແຕ່ພວກອາຫານແຫ້ງ ແລະສ່ວນຫລາຍພວກເຮົາຈະເນັ້ນໃສ່ພວກທີ່ທຸກຍາກ ພວກທີ່ເກີດອຸປະຕິເຫດເນາະ ຫລືໄພນໍ້າຖ້ວມເບາະຫລືວ່າອັນຫລັກແມ່ນພວກຢູ່ໂຮງຈັກໂຮງງານ ເພາະວ່າເປົ້າໝາຍເຮົາ ແມ່ນພວກຢູ່ໂຮງຈັກໂຮງງານ ຫລືກໍາມະກອນ”
ແຕ່ປາກົດວ່າມາຮອດດຽວນີ້ການຊ່ວຍເຫລືອແມ່ນຍັງຊັກຊ້າ ແລະກໍຍັງບໍ່ເປັນ ຮູບປະ
ທໍາສໍາລັບຜູ້ທຸກຍາກແລະກໍາມະກອນຜູ້ມີລາຍໄດ້ຕໍ່າ ທີ່ໄດ້ຮັບຜົນກະ ທົບຈາກການລະ
ບາດ ຂອງພະຍາດໃນຄັ້ງນີ້ເລີຍ ດັ່ງທີ່ກໍາມະກອນໂຮງງານ ຕັດຫຍິບແຫ່ງນຶ່ງໃນນະຄອນ
ຫລວງວຽງຈັນໄດ້ລົງທະບຽນເຂົ້າເປັນ ສະມາຊິກ ຂອງລະບົບປະກັນສັງຄົມໄດ້ 4 ເດືອນ
ມານີ້ວ່າຍັງບໍ່ໄດ້ຮັບການຊ່ວຍເຫລືອ ແຕ່ຢ່າງໃດ ແລະກໍບໍ່ເປັນທີ່ຈະແຈ້ງວ່າຈະໄດ້ຮັບ
ການຊ່ວຍເຫລືອຫລືບໍ່ ຊຶ່ງຜູ້ ກ່ຽວເລົ່າສູ່ຟັງດັ່ງນີ້:
”ແມ່ນ ແມ່ນໄດ້ເຂົ້າ ໄດ້ເຂົ້າແລ້ວ ຫວ່າງ 4 ເດືອນແລ້ວນີ້ ຍັງ ຍັງແຫລະ ຊຸດກ່ອນບໍ່ເຫັນໄດ້ຈັ່ງໃດບຸນ ກະຄືຊິໄດ້ຕິ ເຫັນເຂົາໄປຈົດອີ່ຫຍັງບຸ.”
ສ່ວນທາງອໍານາດການປົກຄອງທ້ອງຖິ່ນຂັ້ນບ້ານນັ້ນ ບາງບ່ອນກໍບອກວ່າທາງ ລັດຖະ
ບານຈະໃຫ້ການຊ່ວຍເຫລືອແກ່ຜູ້ທຸກຈົນທີ່ສຸດ ທີ່ໄດ້ຮັບຜົນກະທົບຈາກ ມາດຕະການ
ປິດເຂດຄຸ້ມບ້ານ ແລະເມືອງ ດັ່ງທີ່ສະມາຊິກຄະນະແນວໂຮມບ້ານ ແຫ່ງນຶ່ງໃນເມືອງ
ນາຊາຍທອງ, ນະຄອນຫລວງວຽງຈັນກ່າວວ່າ:
“ລັດກະຊ່ວຍປະຊາຊົນຜູ້ທຸກຍາກກະມີຢູ່ອັນລັກສະນະທີ່ວ່າ ຫາເຊົ້າກິນຄໍ່າເນາະ ຊ່ວງໄລຍະໂຄວິດເຂົາບໍ່ໄດ້ອອກນອກ ອອກນາຫັ້ນນະຈໍາກັດເລື້ອງອັນນີ້ຫັ້ນນະ ແຕ່ວ່າບໍ່ໝົດທຸກຄົນດອກ ພວກທີ່ມີລາຍຮັບນ້ອຍ ຫລືວ່າພວກຫາເຊົ້າກິນຄໍ່າຫັ້ນນະ’
ແຕ່ກໍຄ້າຍຄືກັນກັບການຊ່ວຍເຫລືອແກ່ກໍາມະກອນປາກົດວ່າ ການຊ່ວຍເຫລືອບັນເທົາ
ທຸກແກ່ຄອບຄົວຂາດເຂີນ ກໍບໍ່ເປັນທີ່ຈະແຈ້ງ. ແມ່ຍິງຄົນນຶ່ງ ທີ່ເຮັດອາ ຊີບຊຸກລໍ້ໄປເລາະ
ຂາຍຜັກ ຢູ່ຕາມເຮືອນຄົນ ຢູ່ເຂດເມືອງຫາດຊາຍຟອງ ຊຶ່ງຜູ້ ກ່ຽວຕ້ອງໄດ້ຢຸດອາຊີບແບບ
ນັ້ນຂອງຜູ້ກ່ຽວຊຶ່ງກໍພາໃຫ້ລາວຂາດລາຍໄດ້ ຍ້ອນ ທາງການປະກາດຫ້າມຄົນຢູ່ໃນເຂດ
ບ້ານໝາຍແດງຫ້າມອອກເຮືອນໄປ ຫລືໄປ ມາຫາສູ່ກັນຖ້າບໍ່ຈໍາເປັນທີ່ສຸດນັ້ນບອກວ່າ
ນາງບໍ່ເຄີຍໄດ້ຍິນ ເລື້ອງການຊ່ວຍ ເຫລືອທີ່ວ່ານັ້ນເລີຍ. ນາງໃຫ້ຄໍາເຫັນດັ່ງນີ້:
.”ບໍ່ມີຫຍັງ ບໍ່ມີຫຍັງ ບໍ່ ບໍ່ ບໍ່ຢູ່ບ້ານນີ້ຍັງບໍ່ເຫັນມີຫຍັງນະ ມີແຕ່ບ້ານອື່ນຕິ ບໍ່ບໍ່ ຢູ່ບ້ານນີ້ບໍ່ເຫັນມີ”
ສະຫລຸບແລ້ວ ເຖິງແມ່ນວ່າທາງການລາວ ຈະມີການປະກາດວ່າ ຈະມີນະໂຍບາຍຊ່ວຍເ
ຫລືອບັນເທົາທຸກແກ່ປະຊາຊົນທີ່ທຸກຍາກຂາດເຂີນໄດ້ຮັບຜົນກະທົບໜັກທີ່ສຸດກໍຕາມ
ແຕ່ກໍປາກົດວ່າ ເທົ້າເຖິງທຸກວັນນີ້ຍັງບໍ່ເປັນທີ່ຈະແຈ້ງເທື່ອວ່າ ປະຊາຊົນເຫລົ່ານີ້ຈະໄດ້
ຮັບການຊ່ວຍເຫລືອຮູບແບບໃດ? ໃນຕອນໃດ? ແລະ ຫລາຍປານໃດ ໃນຂະນະທີ່ຈໍານ
ວນ ກໍລະນີຜູ້ຕິດເຊື້ອໃໝ່ ກໍຍັງສືບຕໍ່ເພີ້ມຂຶ້ນ ທຸກມື້ຊຶ່ງຈະສົ່ງຜົນກະທົບໃຫ້ຊີວິດການເ
ປັນຢູ່ຂອງເຂົາເຈົ້າໃຫ້ຝືດເຄືອງຍິ່ງຂຶ້ນ ໄປຢູ່ນີ້.