ທະນາຄານໂລກຄາດວ່າ ເສດຖະກິດຂອງ ມຽນມາ ຈະຫົດໂຕຮອດ 1 ເປີເຊັນ ໃນປີນີ້, ເຊິ່ງຖືເປັນການປັບຫຼຸດຄາດການເສດຖະກິດຮອບໃໝ່ ເນື່ອງຈາກພາ ວະໄພທຳມະຊາດທີ່ຊໍ້າເຕີມປະເທດທີ່ໃນຂະນະນີ້ ກໍາລັງປະເຊີນກັບຄວາມ ຂັດແຍ້ງພາຍໃນຢ່າງຮຸນແຮງ.
ເມື່ອເດືອນ ມິຖຸນາ ທີ່ຜ່ານມາ, ທະນາຄານໂລກຄາດວ່າ ເສດຖະກິດຂອງ ມຽນມາ ຈະເຕີບໃຫຍ່ຂະຫຍາຍໂຕໄດ້ 1 ເປີເຊັນ ໃນປີງົບປະມານປັດຈຸບັນ, ເຊິ່ງຈະສິ້ນສຸດລົງໃນເດືອນ ມີນາ ປີ 2025. ແຕ່ໄດ້ເຕືອນເຖິງຜົນກະທົບຈາກ ຄວາມທຸກຍາກ ແລະຄວາມຂັດແຍ້ງພາຍໃນທີ່ເພີ້ມຂຶ້ນ.
ປະເທດມຽນມາ ທີ່ມີປະຊາກອນ 55 ລ້ານຄົນ ຕົກຢູ່ໃນຄວາມວຸ້ນວາຍມາແຕ່ປີ 2021 ທີ່ທະຫານຍຶດອໍານາດຈາກລັດຖະບານພົນລະເຮືອນ ຈົນນໍາໄປສູ່ການ ປະທ້ວງທີ່ຮຸນແຮງ ແລະຄວາມຂັດແຍ້ງທີ່ລຸກລາມ ໄດ້ເຮັດໃຫ້ລັດຖະບານທະ ຫານມຽນມາ ຕ້ອງດໍາເນີນການຕໍ່ສູ້ກັບກຸ່ມຕໍ່ຕ້ານ ແລະກຸ່ມຕິດອສວຸດຊົນເຜົ່າ ກຸ່ມນ້ອຍໃນຊ່ວງໄລຍະທີ່ຜ່ານມາ.
ການກໍ່ລັດຖະປະຫານຂອງກອງທັບ ສົ່ງຜົນເຮັດໃຫ້ການປະຕິຮູບການເມືອງ ແລະເສດຖະກິດ ຕ້ອງຍຸຕິລົງ, ບັນດານັກລົງທຶນຕ່າງປະເທດ ພາກັນຍົກຍ້າຍ ເງິນທຶນ, ແລະປະເທດ ກໍຕ້ອງປະເຊີນກັບມາດຖະການລົງໂທດທາງເສດຖະ ກິດ.
ໃນບົດລາຍງານຂອງທະນາຄານໂລກທີ່ເຜີຍແຜ່ໃນມື້ວັນພຸດທີ່ຜ່ານມາລະບຸວ່າ “ລະດັບ ແລະຄວາມເຄັ່ງຕຶງຂອງຄວາມຂັດແຍ້ງ ຍັງຄົງຢູ່ໃນລະດັບສູງ ແລະ ກະທົບຕໍ່ຊີວິດຄວາມເປັນຢູ່ຢ່າງຮຸນແຮງ, ກະທົບຕໍ່ການຜະລິດ ແລະຕ່ອງໂສ້ ທາງການຄ້າ ພ້ອມທັງສ້າງຄວາມບໍ່ແນ່ນອນຕໍ່ທິດທາງດ້ານເສດຖະກິດຂອງ ມຽນມາ ຫຼາຍຂຶ້ນ,” ໂດຍກ່າວຕື່ມວ່າ ຫຼາຍພາກສ່ວນຂອງເສດຖະກິດ ມຽນມາ ຍັງຄົງປະສົບກັບບັນຫາ, ໃນຂະນະທີ່ຜົນຜະລິດຈາກການກະເສດຫຼຸດລົງ ເນື່ອງຈາກພາຍຸໄຕ້ຝຸ່ນຢາກິ ທີ່ພັດຖະຫຼົ່ມເຂົ້າມຽນມາໃນເດືອນກັນຍາ ສົ່ງຜົນ ເຮັດໃຫ້ເກີດນໍ້າຖ້ວມຮຸນແຮງຄັ້ງໃຫຍ່.
ໂຄສົກລັດຖະບານທະຫານມຽນມາ ບໍ່ໄດ້ຕອບຄໍາຖາມໃດໆຈາກອົງການຂ່າວ Reuters ໃນຊ່ວງເວລາທີ່ລາຍງານຂ່າວນີ້.
ທະນາຄານໂລກຍັງເປີດເຜີຍອີກວ່າ ປະຊາຊົນມຽນມາປະມານ 25 ເປີເຊັນ ກໍາລັງປະເຊີນກັບຄວາມບໍ່ໝັ້ນຄົງທາງດ້ານອາຫານຢ່າງຮຸນແຮງ, ເນື່ອງຈາກ ພາວະເງິນເຟີ້ ແລະການຂາດເຂີນອາຫານຈາກພາວະສົງຄາມ, ໂດຍຄາດວ່າ ເງິນເຟີ້ໃນມຽນມາ ຈະຍັງຄົງຢູ່ທີ່ 26 ເປີເຊັນຈາກຊ່ວງດຽວກັນຂອງປີງົບປະ ມານກ່ອນໜ້ານີ້, ເຊິ່ງຫຼຸດລົງຈາກລະດັບ 27.5 ເປີເຊັນ ຈາກຂອບເຂດປີງົບ ປະມານ 2023 ຫາ 2024.
ສົງຄາມພາຍໃນຂອງມຽນມາ, ທີ່ກຸ່ມພັນທະມິດຊົນເຜົ່າກຸ່ມນ້ອຍຕິດອາວຸດ ລວບລວມຕໍ່ຕ້ານກອງທັບມຽນມາທີ່ມີອາວຸດຄົບ ໄດ້ເຂົ້າຍຶດເມືອງຕ່າງໆໃນ ມຽນມາ ໄດ້ຫຼາຍກວ່າເຄິ່ງນຶ່ງ ທີ່ມີຫຼາຍກວ່າປະມານ 330 ແຫ່ງ, ແລະເຮັດໃຫ້ ປະຊາຊົນປະມານ 3.5 ລ້ານຄົນຕ້ອງພາກັນພັດຖິ່ນ ເນື່ອງຈາກຄວາມຂັດແຍ້ງ ພາຍໃນ. ອີງຕາມລາຍງານຂອງທະນາຄານໂລກ.
ພ້ອມກັນນັ້ນ, ທະນາຄານໂລກຍັງໄດ້ອອກມາເຕືອນອີກວ່າ ເຖິງແມ່ນຄວາມຂັດ ແຍ້ງຈະບໍ່ຍົກລະດັບຂຶ້ນ, ແຕ່ການເຕີບໃຫຍ່ຂະຫຍາຍໂຕຂອງລະບົບເສດຖະ ກິດໃນປີຕໍ່ໄປ ກໍຍັງຄົງສືບຕໍ່ໂຈະຢູ່.