ປະທານາທິບໍດີຄົນໃໝ່ຂອງອິນໂດເນເຊຍ ທ່ານ ປຣາໂບໂວ ຊູບຽນໂຕ ໄດ້ເຂົ້າສາບານຕົວຂຶ້ນຮັບຕຳແໜ່ງໃນວັນອາທິດວານນີ້ ແລະຍັງໄດ້ປະ ກາດລາຍຊື່ຄະນະລັດຖະບານຊຸດໃໝ່ໃນວັນດຽວກັນນີ້.
ປະທານາທິບໍດີ ຊູບຽນໂຕ ໄດ້ປະກາດລາຍຊື່ຄະນະລັດຖະມົນຕີ ແລະຮອງລັດ ຖະມົນຕີ ລວມທັງຫົວໜ້າຂອງໜ່ວຍງານລັດຖະບານຕ່າງໆຈຳນວນ 109 ຄົນ, ເຊິ່ງຖືວ່າເປັນໂຕເລກຈຳນວນຫຼາຍທີ່ສຸດໃນປະຫວັດສາດການເມືອງຂອງ ອິນໂດເນເຊຍ ເມື່ອທຽບໃສ່ກັບຄະນະເຮັດວຽກ 34 ຄົນຂອງປະທານາທິບໍດີຄົນກ່ອນ, ທ່ານ ໂຈໂກ ວິໂດໂດ.
ທ່ານ ປຣາໂວໂດ ເປັນປະທານາທິບໍດີຄົນທີ 8 ຂອງ ອິນໂດເນເຊຍ, ເຊິ່ງຮ້ອງ ຄະນະປະຕິບັດງານຊຸດນີ້ວ່າ “ຄະນະລັດຖະມົນຕີສີແດງ ແລະສີຂາວ,” ເຊິ່ງ ໝາຍເຖິງສີຂອງທຸງຊາດ ອິນໂດເນເຊຍ.”
ທ່ານ ປຣາໂບໂວ ກ່າວກ່ອນໜ້ານີ້ວ່າ ທ່ານຢາກໃຫ້ມີລັດຖະບານປະສົມຂະໜາດໃຫຍ່ທີ່ມີຄວາມເຂັ້ມແຂງ ທີ່ສາມາດສ້າງເອກະພາບໃນສັງຄົມ ອິນໂດເນເຊຍ ທີ່ມີຄວາມຫຼາກຫຼາຍທາງດ້ານວັດທະນະທຳ ແລະການເມືອງ.
ແນວໃດກໍຕາມ, ບັນດານັກວິເຄາະຫຼາຍຄົນຊີ້ໃຫ້ເຫັນວ່າ ຄະນະລັດຖະມົນຕີຊຸດ ນີ້ “ເປັນຄະນະໃຫຍ່ເກີນໄປ” ເຊິ່ງຈະເຮັດໃຫ້ເກີດຄວາມຫຼ້າຊ້າໃນຂະບວນການ ດໍາເນີນງານຂອງລັດຖະບານ.
ຄະນະລັດຖະບານຊຸດໃໝ່ຂອງ ອິນໂດເນເຊຍ ລວມມີບັນດານັກການເມືອງຈາກພັກພັນທະມິດຮ່ວມລັດຖະບານ 7 ພັກ ທີ່ສະໜັບສະໜູນໄຊຊະນະຂອງ ທ່ານ ປຣາໂບໂວ ໃນການເລືອກຕັ້ງເມື່ອເດືອນກຸມພາ, ລວມທັງພັນທະມິດຄົນ ສຳຄັນຂອງປະທານາທິບໍດີຄົນກ່ອນ ທີ່ໄດ້ຖືກເລືອກໃຫ້ເຂົ້າມາດຳລົງຕຳແໜ່ງ ອີກຄັ້ງ ເຊິ່ງບັນດານັກວິເຄາະເຊື່ອວ່າ ເປັນການຕອບແທນທາງການເມືອງ ຕໍ່ອະດີດປະທານາທິບໍດີ ວິໂດໂດ.
ນອກຈາກນີ້, ທ່ານ ປຣາໂບໂວ ຍັງໄດ້ເລືອກເອົາລູກຊາຍອາຍຸ 37 ປີຂອງ ທ່ານ ໂຈໂກ ວິໂດໂດ, ທ່ານ ກີບຣານ ຣາຄາບູມິງ ຣາຄາ (Gibran Rakabuming Raka) ມາດໍາລົງກໍາແໜ່ງເປັນຮອງປະທານາທິບໍດີອີກດ້ວຍ.
ທັງປະທານາທິບໍດີ ປຣາໂບໂວ ແລະ ອະດີດປະທານາທິບໍດີ ວິໂດໂດ, ເຄີຍ ເປັນຄູ່ແຂ່ງທາງດ້ານການເມືອງມາກ່ອນ, ແລະຍັງເຄີຍແຂ່ງຂັນເອົາຕຳແໜ່ງຜູ້ນຳປະເທດເມື່ອປີ 2014 ແລະ 2019. ແຕ່ຫຼັງຈາກນັ້ນ, ທັງສອງກໍໄດ້ຈັບມືກັນໂດຍ ທ່ານ ວິໂດໂດ ໄດ້ແຕ່ງຕັ້ງ ທ່ານ ປຣາໂບໂວ ເປັນລັດຖະມົນຕີປ້ອງ ກັນປະເທດໃນລັດຖະບານສະໄໝທີສອງຂອງຕົນ, ແລະປະກາດສະໜັບສະໜູນທ່ານ ປຣາໂບໂວ ໃນການເລືອກຕັ້ງຕົ້ນປີນີ້ ກ່ອນທີ່ ທ່ານ ປຣາໂບໂວ ຈະໄດ້ຮັບໄຊຊະນະຢ່າງຖ້ວມລົ້ນ.
ໃນລະຫວ່າງການໂຄສະນາຫາສຽງ, ທ່ານ ປຣາໂບໂວ ໄດ້ໃຫ້ຄຳໝັ້ນທີ່ຈະສືບຕໍ່ນະໂຍບາຍຫຼາຍຢ່າງຂອງ ທ່ານ ວິໂດໂດ, ລວມທັງການເຄື່ອນໄຫວກໍ່ສ້າງນະຄອນຫຼວງແຫ່ງໃໝ່ ແລະຈຳກັດການສົ່ງອອກວັດຖຸດິບອັນສຳຄັນບາງປະເພດ ເພື່ອຊຸກຍູ້ຂະແໜງອຸດສາຫະກຳຂອງ ອິນໂດເນເຊຍ.
ປະທານາທິບໍດີ ປຣາໂບໂວ ຍັງໄດ້ໃຫ້ສັນຍາວ່າ ຈະເພີ້ມອັດຕາການຂະຫຍາຍ ໂຕທາງເສດຖະກິດຂອງປະເທດເປັນ 8 ເປີເຊັນພາຍໃນ 5 ປີຂອງການດຳລົງຕຳແໜ່ງ. ນອກຈາກນີ້, ຍັງຈະມີການເພີ້ມງົບປະມານລາຍຈ່າຍດ້ານການທະຫານ, ເພີ້ມເງິນເດືອນພະນັກງານລັດຖະກອນ ແລະ ສະໜອງໂຄງການອາຫານຟຣີໃຫ້ແກ່ເດັກນ້ອຍທີ່ທຸກຍາກອີກ 83 ລ້ານຄົນ.