ພຽງແຕ່ບໍ່ເທົ່າໃດມື້ ກ່ອນສະຫະລັດຈະເຜີຍແພ່ລາຍງານປະຈຳປີຂອງຕົນ ກ່ຽວກັບການຄ້າມະນຸດໃນທົ່ວໂລກ, ທາງການ ໄທ ກໍໄດ້ປະກາດ ກ່ຽວກັບຜູ້ຕ້ອງຫາໃນທີ່ພົວພັນກັບການຄ້າມະນຸດ 72 ຄົນເຊິ່ງປະຈຸບັນຖືກຄວບຄຸມຢູ່ນັ້ນ ເພື່ອຈະຖືກຮ້ອງຟ້ອງ ໃນຂະນະດຽວກັນກໍໄດ້ອອກໝາຍຈັບອີກ 45 ຄົນເພີ່ມເຕີມ.
ນັກຂ່າວ ວີໂອເອ Steve Herman ມີລາຍງານຈາກ ບາງກອກ ເຊິ່ງ ພຸດທະສອນ ຈະນຳລາຍລະອຽດມາສະເໜີທ່ານ.
Your browser doesn’t support HTML5
ຟັງລາຍງານ ໄທ ຈະດຳເນີນຄະດີ ຜູ້ຕ້ອງສົງໄສ ຄ້າມະນຸດ
ປະເທດ ໄທ ເອີ້ນເຫດການຄັ້ງນີ້ວ່າ ການປາບປາມທີ່ໃຫຍ່ທີ່ສຸດຂອງລາຊະອານາຈັກ. ຕັ້ງແຕ່ເດືອນ ພຶດສະພາເປັນຕົ້ນມາ, ມີການຖືວ່າ ເຈົ້າໜ້າທີ່ 15 ຄົນໄດ້ເຂົ້າໄປພົວພັນໃນຂະບວນ ການຄ້າມະນຸດ, ລວມທັງ ພົນໂທທະຫານບົກຄົນນ່ຶງ.
ຜູ້ອຳນວຍການບໍລິຫານຂອງ ອົງການສິິດທິມະນຸດ Fortify Rights ທ່ານ Matthew Smith ກ່າວວ່າ ການປະກາດນີ້ ແມ່ນ ເປັນຂ່າວດີ.
ທ່ານMatthew Smith ກ່າວວ່າ “ສິ່ງທີ່ພວກເຮົາໄດ້ເຫັນຜ່ານມາ ແມ່ນຈຳນວນຄົນທີ່ ຖືກ ກ່າວໂທດ ກ່ຽວກັບການລະເມີດທີ່ພົວພັນກັບການຄ້າມະນຸດ ແຕ່ບໍ່ເຄີຍຖືກຕັດ ສິນລົງໂທດ ຈັກເທື່ອ. ແລະ ດັ່ງນັ້ນ, ຂ້າພະເຈົ້າຈຶ່ງຄິດວ່າຄັ້ງນີ້ ມັນຈະມີຄວາມເອົາ ໃຈໃສ່ຕໍ່ການດຳເນີນຄະດີດັ່ງກ່າວ ໃນປະເທດ ໄທ ດ້ວຍສາຍຕາທີ່ວ່າຈະມີການຕັດສິນລົງໂທດ ຫຼື ບໍ່.”
ພົນໂທທະຫານບົກ ໄທ ທ່ານ ມານັດ ກອງພັນ (ກາງ) ອ້ອມຮອບໂດຍຕຳຫຼວດຫຼາຍຄົນ ເຊິ່ງລ່າວໄດ້ເຂົ້າມອບໂຕຢູ່ສຳນັກງານໃຫຍ່ ຕຳຫຼວດໃນ ນະຄອນຫຼວງ ບາງກອກ. 3 ກໍລະກົດ 2015.
ການເຄື່ອນໄຫວຂອງ ໄທ ຕ້ານເຄືອຄ່າຍການລັກລອບນີ້ ເກີດຂຶ້ນ ຫຼັງຈາກການຄົ້ນພົບ ສົບຄົນເປັນໝູ່ ຢູ່ໃນຫຼຸມຝັງສົບໃນປ່າ ໃກ້ກັບສູນທີ່ສົງໃສວ່າເປັນຂອງພວກຄ້າມະນຸດຢູ່ ຕາມເຂດຊາຍແດນ ໄທ ແລະ ມາເລເຊຍ.
ການປິດສູນ ຊົ່ວຄາວລົງ ຊ່ຶງສ່ວນໃຫຍ່ເຄີຍເປັນບ່ອນນຳເອົາຊາວ ມຸສລິມ ໂຣຮິງຢາ ຈາກ ມຽນມາ ແລະ ບັງກະລາແດັສ ໄປສູ່ ມາເລເຊຍນັ້ນ, ໄດ້ບັງຄັບໃຫ້ພວກລັກລອບທີ່ຄ້າຂອງ ຜິດກົດໝາຍ ປະຖິ້ມເຮືອທີ່ອັດແອ ເຕັມໄປດ້ວຍຜູ້ຍົກຍ້າຍຖິ່ນຖານຫຼາຍພັນຄົນໄວ້ຢູ່ກາງ ທະເລ ແທນທີ່ຈະສ່ຽງ ເຂົ້າມາໃນຝັ່ງ.
ໃນການປະກາດການຮ້ອງຟ້ອງດັ່ງກ່າວ ແມ່ນໂຄສົກຂອງ ໄອຍະການສູງສຸດໄດ້ປະຕິຍານ ວ່າຕົນ “ຈະບໍ່ປ່ອຍໃຫ້ຜູ້ມີອິດທິພົນຢູ່ເໜືອກົດໝາຍໄດ້.”
ແຕ່ວ່ານັກເຄື່ອນໄຫວດ້ານສິດທິມະນຸດ, ເຊັ່ນທ່ານ Matthew Smith ກໍຍັງຄົງມີຄວາມ ສົງໄສຢູ່ ຈ່ຶງກ່າວວ່າ: “ພວກເຮົາຍັງມີຄວາມເປັນຫ່ວງບາງຢ່າງຢູ່ວ່າ ຜູ້ນຳອາວຸໂສ ບາງຄົນ ຂອງ ເຄືອຂ່າຍຂ້າມຊາດພວກນີ້ ຍັງປະຕິບັດການຢູ່ຢ່າງມີອິດສະຫຼະ. ແລະ ເພື່ອຈະຖອນ ຮາກພວກເຂົາອອກໃຫ້ໝົດ ມັນຕ້ອງໄດ້ມີການຮ່ວມມືກັບ ສາກົນ.”
ເມື່ອໜຶ່ງປີທີ່ກ່ອນ ສະຫະລັດໄດ້ຫຼຸດລະດັບສະຖານະພາບຂອງປະເທດ ໄທ ລົງສູ່ລະດັບ 3 ໃນບົດລາຍງານ ການຄ້າມະນຸດ Trafficking in Persons ຫຼື TIP ແຕ່ປີນີ້ ຈະບໍ່ເປັນໄປ ດັ່ງ ທີ່ເຄີຍເປັນມາສຳລັບລາຊະອານາຈັກດັ່ງກ່າວ ຍ້ອນວ່າສະຖານະການແມ່ນຕົກຢູ່ພາຍໃຕ້ ການຄວບຄຸມຂອງ ລັດຖະບານທະຫານມາ ຕັ້ງແຕ່ການກໍ່ ລັດຖະປະຫານ ເມື່ອ 26 ເດືອນ ກ່ອນ.
ບົດລາຍງານ TIP ຂອງກະຊວງການຕ່າງປະເທດ ແມ່ນມີກຳນົດອອກເຜີຍແຜ່ໃນວັນຈັນ ວານນີ້.