ມີການຄາດຄະເນກັນເພີ່ມຂຶ້ນວ່າ ໄທພວມມຸ່ງໜ້າໄປສູ່ການເລືອກຕັ້ງກ່ອນກຳນົດ ຂະນະທີ່
ທາງກອງທັບຂອງໄທພວມຊອກຫາຊ່ອງທາງ ກຳຈັດຂ່າວລືກ່ຽວກັບການກໍ່ລັດຖະປະຫານ ໃຫ້ໝົດສິ້ນໄປ.
ນາຍົກລັດຖະມົນຕີອະພິຊິດ ເວດຊາຊີວະ ກ່າວຕໍ່ພວກນັກຂ່າວ ໃນລະຫວ່າງກອງປະຊຸມ
ອະພິປາຍເສດຖະກິດໂລກ ທີ່ເມືອງ Davos ປະເທດ Switzerland ວ່າ ພັກປະຊາທິປັດ
ຂອງທ່ານ ມີຄະແນນສຽງນຳໜ້າໜ້ອຍນຶ່ງໃນການຢັ່ງຫາງສຽງຂອງປະຊາຊົນ ແລະທ່ານ
ກໍເຫັນດີນໍາການຈັດການເລືອກຕັ້ງແບບ ເສລີແລະຍຸດຕິທຳຂຶ້ນ ໂດຍໄວເທົ່າທີ່ຈະໄວໄດ້.
ການໄດ້ຮັບໄຊຊະນະໃນການເລືອກຕັ້ງ ແມ່ນຈະເປັນເທື່ອທຳອິດໃນຮອບສອງທົດສະວັດ
ສຳລັບພັກຂອງທ່ານອະພິຊິດ ຊຶ່ງໄດ້ເຂົ້າກຳອຳນາດໂດຍການລົງຄະແນນສຽງຂອງສະ
ພາແຫ່ງຊາດ ລຸນຫຼັງທີ່ລັດຖະບານຊຸດກ່ອນໄດ້ຖືກຍຸບໂດຍຄຳສັ່ງຂອງສານ.
ພວກນັກວິເຄາະກ່າວວ່າ ຫົນທາງສຳລັບການເລືອກຕັ້ງຄັ້ງໃໝ່ແມ່ນຈະເປັນໄປໄດ້ ຫລັງ
ຈາກມີການຮັບຜ່ານຮ່າງກົດໝາຍປະຕິຮູບການເລືອກຕັ້ງ ຊຶ່ງຄາດວ່າຈະມີຂຶ້ນພາຍໃນ
ທ້າຍເດືອນນີ້ ແລະການຮັບຮອງເອົາງົບປະມານແຫ່ງຊາດໃນເດືອນໜ້າ.
ແຕ່ແນວໃດກໍຕາມ ພັກຝ່າຍຄ້ານຂອງໄທຂົ່ມຂູ່ວ່າ ຈະຍື່ນມະຕິບໍ່ໄວ້ວາງໃຈລັດ ຖະບານ ຊຶ່ງອາດຈະເຮັດໃຫ້ສະຖານະການມີຄວາມສະລັບຊັບຊ້ອນຕື່ມຂຶ້ນ. ນອກນັ້ນແລ້ວ ທ່ານ
ອະພິຊິດຍັງໄດ້ປະເຊີນກັບ ການຕຳໜິຕິຕຽນເພີ່ມຂຶ້ນຈາກ ຂະບວນການຫົວຊາດນິຍົມ
ຂອງຫຼືພວກເສື້ອເຫຼືອງ ທີ່ໃຫ້ການສະໜັບສະໜຸນຕໍ່ການຂຶ້ນກຳອຳນາດຂອງທ່ານ.
ພວກເສື້ອເຫຼືອງໄດ້ທຳການປະທ້ວງຢູ່ຕາມຖະໜົນຫົນທາງສາຍຕ່າງໆມາໄດ້ ດົນກວ່າ
ນຶ່ງອາທິດແລ້ວ ແລະຂູ່ວ່າຈະເພີ່ມທະວີການປະທ້ວງຂອງຕົນ ຖ້າລັດຖະບານຫາກບໍ່ສາ
ມາດ ຊ່ອຍໃຫ້ມີການປ່ອຍຊາວໄທ 2 ຄົນ ທີ່ຖືກຕັດສິນໂທດ ຈຳຄຸກຢູ່ກຳປູເຈຍໃນຕົ້ນ
ອາທິດນີ້ ພາຍໃນມື້ວັນເສົາຈະມາ.