ຄາດວ່າ ຄະນະລັດຖະບານໄທຊຸດໃໝ່ ທີ່ປະກອບດ້ວຍສະມາຊິກ 35 ຄົນ ຈະພະຍາ
ຍາມຈັດຕັ້ງປະຕິບັດໃນໄວໆນີ້ ພວກນະໂຍບາຍປະຊານິຍົມທາງດ້ານເສດຖະກິດແລະ
ສັງຄົມຕ່າງໆ ທີ່ໄດ້ຊ່ວຍຂັບດັນທ່ານນາງ ຢິ່ງລັກ ຊິນນະວັດ ໄປສູ່ໄຊຊະນະໃນການ
ເລືອກຕັ້ງໃນຕົ້ນເດືອນແລ້ວນັ້ນ.
ເຖິງແມ່ນວ່າ ຕໍາແໜ່ງສ່ວນໃຫຍ່ໃນຄະນະລັດຖະບານໄດ້ມອບໃຫ້ພັກເພື່ອໄທຂອງທ່ານ
ນາງ ແລະພັກພາຄີໃນຄະນະລັດຖະບານປະສົມ ແຕ່ທ່ານນາງກໍໄດ້ເລືອກເອົາພວກຄົນ
ພາຍນອກ ມາກໍາຕໍາແໜ່ງໃນກະຊວງການເງິນແລະພານິດ ອັນເປັນຕໍາແໜ່ງທີ່ສໍາຄັນນັ້ນ.
ທ່ານ ທິຕິນັນ ພົງສຸດທິຣັກ ນັກລັດຖະສາດການເມືອງປະຈໍາມະຫາວິທະຍາໄລຈຸລາລົງ
ກອນ ກ່າວວ່າ ທ່ານໄດ້ຕັ້ງຄວາມຫວັງໄວ້ວ່າ ຈະມີພວກມືອາຊີບທີ່ມີປະສົບການສູງເຂົ້າ
ມາຮ່ວມຢູ່ໃນຄະນະລັດຖະບານຊຸດໃໝ່ນີ້. ທ່ານ ທິຕິນັນ ເວົ້າວ່າ:
“ປາກົດວ່າມັນບໍ່ເປັນໄປຕາມທີ່ຄາດໝາຍໄວ້ແຕ່ເບຶ້ອງຕົ້ນ. ຄວາມຄາດໝາຍ
ໃນເບຶ້ອງຕົ້ນນັ້ນ ກໍຄືວ່າ ພວກເຂົາເຈົ້າຈະແຕ່ງຕັ້ງພວກຄົນຈາກພາຍນອກ ທີ່
ເປັນມືອາຊີບ ເປັນນັກວິຊາການດ້ານນະໂຍບາຍນັ້ນ ຫລາຍຄົນກ່ວານີ້ ແຕ່
ບາດແລ້ວກໍ່ມີພຽງບໍ່ເທົ່າໃດຄົນທີ່ ເຂົ້າມາກໍາຕໍາແໜ່ງທາງເສດຖະກິດ ກໍມີ
ລັດຖະມົນຕີການເງິນ ລັດຖະມົນຕີການພານິດ ຊຶ່ງກໍາສອງຕໍາແໜ່ງຄວບ ເປັນຮອງນາຍົກລັດຖະມົນຕີນໍາ. ນອກຈາກພວກນີ້ແລ້ວ ການຄັດເລືອກເອົາ
ລັດຖະມົນຕີ ແມ່ນອິງໃສ່ພັກ ແລະການແບ່ງສ່ວນກັນ.”
ທ່ານທັກສິນ ຊິນນະວັດ
ການກ້າວເຂົ້າມາກໍາອໍານາດຂອງລັດຖະ
ບານຊຸດໃໝ່ນີ້ ແມ່ນມີຂຶ້ນຫລັງຍຸກແຫ່ງ
ຄວາມປັ່ນປ່ວນທາງການເມືອງຢ່າງໃຫຍ່
ໃນປະເທດໄທ. ອະດີດນາຍົກລັດຖະມົນ
ຕີ ທັກສິນ ຊິນນະວັດ ອ້າຍຂອງທ່ານ
ນາງຢິ່ງລັກ ໄດ້ຖືກໂຄ່ນລົ້ມຈາກອໍານາດ
ໃນການກໍ່ລັດຖະປະຫານເມື່ອປີ 2006
ຍ້ອນການຂັດແຍ້ງກັນລະຫວ່າງລັດຖະ
ບານຂອງທ່ານ ແລະພວກຊົນຊັ້ນສູງ
ເຈົ້າຂຸນມູນນາຍ ໃນສັງຄົມໄທນັ້ນ.
ລັດຖະມົນກະຊວງປ້ອງກັນປະເທດຄົນ
ໃໝ່ຂອງທ່ານນາງຢິ່ງລັກ ເປັນອະດີດ
ນາຍພົນເອກ ທີ່ຖືກມອງເຫັນວ່າເປັນ
ຜູ້ທີ່ບໍ່ມັກການປະເຊີນໜ້າກັນ ແລະ
ຄາດວ່າ ຈະປະຕິບັດງານໄດ້ຢ່າງກົມກຽວກັນດີກັບຝ່າຍທະຫານ.
ນັກເສດຖະສາດ ສົມພົບ ມານະຣັງສັນ ສະແດງຄວາມຍິນດີທີ່ທ່ານນາງຢິ່ງລັກໄດ້ຄັດ
ເລືອກເອົາຄົນຈາກພາຍນອກ ມາເຂົ້າຮ່ວມໃນຄະນະລັດຖະບານ ຊຶ່ງເປັນຜູ້ທີ່ມີປະສົບ
ປະການດ້ານການເງິນເປັນຢ່າງດີ ໂດຍສະເພາະໃນຊ່ວງເວລາທີ່ບໍ່ແນ່ນອນຂອງເສດຖະ
ກິດໂລກ ດັ່ງທີ່ເປັນຢູ່ໃນຂະນະນີ້. ທ່ານ ສົມພົບ ເວົ້າວ່າ:
“ຕໍ່ນີ້ໄປ ປະເທດໄທຈະມີຄວາມທຸ່ນທ່ຽງດີແລະມີນະໂຍບາຍເສດຖະກິດມະ
ຫາພາກທີ່ມີປະສິດທິພາບ ແມ່ນແຕ່ໃນສະພາວະຕະຫລາດການເງິນຂອງ
ໂລກ ທີ່ຂຶ້ນໆລົງໆຢູ່ໃນຂະນະນີ້ ຢູ່ໃນທັງສະຫະລັດແລະສະຫະພາບຢຸໂຣບ
ນັ້ນກໍຕາມ ຊຶ່ງນັ້ນໝາຍເຖິງວ່າ ພວກເຮົາຕ້ອງໄດ້ກະກຽມປະເທດຊາດ
ໂດຍສະເພາະແລ້ວກໍແມ່ນກຽມເລື່ອງນະໂຍບາຍເສດຖະກິດມະຫາພາກ
ໃຫ້ມີຄວາມພ້ອມຫລາຍຂຶ້ນກ່ວາເກົ່າ ເພື່ອຮັບມືກັບຜົນສະທ້ອນ ທີ່ຈະມາ ຈາກພວກປັດໄຈຕ່າງໆຈາກພາຍນອກນັ້ນ.”
ພວກນັກເສດຖະສາດແຫ່ງທະນາຄານກະສິກອນໄທ ທໍານາຍວ່າ ເສດຖະກິດຂອງໄທ
ຈະເຕີບໂຕຂຶ້ນສູງເຖິງຫ້າເປີເຊັນ ໃນປີຕໍ່ໜ້ານີ້ ຊຶ່ງພາກສ່ວນນຶ່ງແມ່ນຈະໄດ້ຮັບການ
ຫລໍ່ລ້ຽງຊຸກຍູ້ໂດຍການໃຊ້ຈ່າຍໃນໂຄງການປະຊານິຍົມຕ່າງໆ ເຊັ່ນການຂຶ້ນຄ່າແຮງ
ງານຕໍ່າສຸດແລະຮັບປະກັນລາຄາເຂົ້າໃຫ້ພວກຊາວນານັ້ນ ແຕ່ນາງອາພອນ ຊີວະເກຣງ
ໄກ ຫົວໜ້ານັກເສດຖະສາດປະຈໍາກອງທຶນເບ້ຍບໍານານຂອງລັດຖະບານກ່າວວ່າ ການ
ຂຶ້ນລະດັບຄ່າແຮງງານຕໍ່າສຸດນັ້ນ ອາດຈະເປັນການທ້າທາຍຢ່າງນຶ່ງ. ນາງ ອາພອນ
ເວົ້າວ່າ:
“ມັນເປັນເລື່ອງຍາກພໍສົມຄວນ ທີ່ຈະຈັດຕັ້ງປະຕິບັດໄດ້ ຄືສະເພາະແຕ່ຄ່າ
ແຮງງານຕໍ່າສຸດຢູ່ໃນບາງກອກ ກໍຕົກເປັນ 225 ບາດແລ້ວ ແລະແມ່ນແຕ່ຈະ
ເພິ່ມຂຶ້ນໄປເຖິງ 300 ບາດຕໍ່ມື້ ກໍຍັງເກືອບຮອດ 40 ເປີເຊັນສູງກວ່າແລ້ວ
ແຕ່ໃນຈັງຫວັດອື່ນໆ ຄ່າແຮງງານຕໍ່າສຸດແມ່ນ 180 ບາດ ຕໍ່ມື້ຫລືປະມານນັ້ນ.
ແລ້ວທ່ານນາງຢິ່ງລັກຈະເຮັດແນວໃດ ຈຶ່ງຈະປັບຄ່າແຮງໃຫ້ສູງຂຶ້ນຮອດ
300 ບາດຕໍ່ມື້ໄດ້? ມັນເປັນການທ້າທາຍທີ່ສໍາຄັນອັນນຶ່ງ.”
ໃນຂະນະທີ່ ພວກນັກເສດຖະສາດຕ່າງກໍເວົ້າວ່າ ການຂຶ້ນຄ່າແຮງສູງຂຶ້ນ ອາດພາໃຫ້
ເກີດສະພາວະເງິນເຟີ້ໄດ້ນັ້ນ ຮອງນາຍົກລັດຖະມົນຕີຄົນໃໝ່ເວົ້າວ່າ ການແກ້ໄຂບັນ
ຫາຄ່າຄອງຊີບທີ່ກໍາລັງຖີບຕົວສູງຂຶ້ນນັບມື້ນັ້ນ ແມ່ນວັດຖຸປະສົງຫລັກຂອງລັດຖະບານ.
ທ່ານ ສຸຣະພົງ ໂຕວິຊໄຊກູນ ລັດຖະມົນຕີການຕ່າງ ປະເທດຄົນໃໝ່ຂອງໄທ ມາຮ່ວມໃນກອງປະຊຸມນັດ ທໍາອິດຂອງລັດຖະບານຊຸດໃໝ່, ວັນທີ 11 ສິງຫາ 2011. REUTERS/Sukree Sukplang
ພວກນັກສັງເກດການດ້ານການເມືອງ
ສ່ວນຫລາຍກ່າວວ່າ ຄະນະລັດຖະບານ
ຊຸດໃໝ່ຂອງໄທ ປາກົດວ່າປະກອບດ້ວຍ
ສະມາຊິກທີ່ເຫັນວ່າເໝາະສົມດີ ແຕ່ກໍ
ຍັງມີຂໍ້ໂຕ້ແຍ້ງກັນກ່ຽວກັບລັດຖະມົນຕີ
ຕ່າງປະເທດຄົນໃໝ່ ຄື ທ່ານ ສຸຣະພົງ
ໂຕວິຊູໄຊກູນ ທີ່ເປັນຍາດກັບທ່ານນາງ
ຢິ່ງລັກ ແລະອ້າຍຂອງທ່ານນາງ ແຕ່ວ່າ ບໍ່ມີປະສົບການທາງດ້ານການທູດ.
ທ່ານ ທິຕິນັນ ພົງສຸດທິຣັກ ນັກວິຈານ
ການເມືອງ ກ່າວວ່າ ພວກເຈົ້າໜ້າທີ່
ຫລາຍໆຄົນ ໃນຄະນະລັດຖະບານ
ຊຸດໃໝ່ ແມ່ນມີຄວາມສໍາພັນທີ່ໃກ້ຊິດ
ກັບອະດີດນາຍົກລັດຖະມົນຕີ ທັກສິນ ຊິນນະວັດ. ທ່ານ ທິຕິນັນ ເວົ້າວ່າ:
“ລັດຖະມົນຕ່າງປະເທດ ບໍ່ແມ່ນ
ບຸກຄົນທີ່ເໝາະສົມ ສໍາລັບຕໍາ
ແໜ່ງນີ້. ບໍ່ມີຜູ້ໃດຮູ້ຈັກຜູ້ກ່ຽວ
ໃນຖານະຜູ້ຊ່ຽວຊານນະໂຍບາຍ
ຕ່າງປະເທດ. ຜູ້ກ່ຽວບໍ່ມີຄວາມຊານິຊໍານານໃນດ້ານນັ້ນເລີຍ ແຕ່ຜູ້ກ່ຽວມີ
ເສ້ນສາຍກ່ຽວພັນໂດຍກົງກັບທ່ານທັກສິນ. ນອກນີ້ແລ້ວ ລັດຖະມົນຕີກະ
ຊວງຂົນສົ່ງ ກໍມີເສ້ນສາຍພົວພັນໂດຍກົງກັບທ່ານທັກສິນຄືກັນ. ດັ່ງນັ້ນ
ມັນຈຶ່ງເປັນລາງທີ່ບໍ່ດີປານໃດ ເພາະວ່າມັນສະແດງໃຫ້ເຫັນວ່າ ທັກສິນ
ຍັງເປັນເງົາຍາວໆ ປົກຄຸມການຈັດຕັ້ງລັດຖະບານຊຸດໃໝ່ນີ້ຢູ່.”
ເວລານີ້ ອະດີດນາຍົກລັດຖະມົນຕີທັກສິນ ຍັງລີ້ໄພການເມືອງຢູ່ທີ່ດູບາຍ. ເຖິງແມ່ນມີ
ຮ່ອງຮອຍຕ່າງໆຈາກພວກເຈົ້າໜ້າທີ່ໃນພັກຂອງລັດຖະບານ ທີ່ບອກວ່າ ໃນທີ່ສຸດທ່ານ
ທັກສິນແລະບັນດາພັນທະມິດທາງການເມືອງຂອງທ່ານ ອາດໄດ້ຮັບການອະໄພຍະໂທດ
ກໍຕາມ ແຕ່ລັດຖະບານຊຸດໃໝ່ກໍຍັງ ບໍ່ມີການເຄຶ່ອນໄຫວໃດໆໄປສູ່ການແກ້ໄຂບັນຫານີ້
ເທື່ອ. ທ່ານນາງ ຢິ່ງລັກ ໄດ້ອ້ອນວອນຕໍ່ມະຫາຊົນແລະຕໍ່ພວກຝ່າຍຄ້ານທາງການເມືອງ
ຂອງທ່ານນາງວ່າ ຈົ່ງໃຫ້ເວລາແກ່ລັດຖະບານຊຸດໃໝ່ຂອງທ່ານນາງໄດ້ສະແດງຄວາມ
ກ້າວໜ້າໃນການຈັດຕັ້ງປະຕິບັດນະໂຍບາຍຕ່າງໆຂອງຕົນນັ້ນກ່ອນ.