ດຣ. ປະຣິນຍາ ເທວານະລຶມິດກຸນ ຮອງອະທິການບໍດີ
ຝ່າຍກິດຈະການສຶກສາ ມະຫາວິທະຍາໄລທໍາມະສາດໄດ້
ຍື່ນໜັງສືຕໍ່ທ່ານອ້ວນ ພົມມະຈັກ ເອກອັກຄະລັດຖະທູດລາວປະຈໍາບາງກອກ ຢ່າງເປັນທາງການເມື່ອທ້າຍເດືອນມີນາທີ່ຜ່ານມານີ້ ເພື່ອເປັນການສະແດງການຂໍໂທດຕໍ່ ກໍລະນີທີ່ນັກສຶກສາ ມະຫາວິທະຍາໄລດັ່ງກ່າວ ໄດ້ຈັດທຳລາຍງານການສໍາຫລວດຄວາມຄິດເຫັນຂອງນັກສຶກສາດ້ວຍກັນທີ່ມີຕໍ່ຄໍາວ່າລາວ.
ທັງນີ້ກໍເນື່ອງຈາກວ່າ ລາຍງານດັ່ງກ່າວໄດ້ຖ່າຍທໍາເປັນວີດິໂອ ແລະໄດ້ມີການເຜີຍແຜ່ຜ່ານເຄືອຂ່າຍອິນເຕີເນັກອີກດ້ວຍນັ້ນ ມີເນື້ອຫາສ່ວນໃຫຍ່ເປັນການດູໝິ່ນ ແລະດູຖູກຄົນລາວ ແລະກໍໄດ້ເປັນຜົນເຮັດໃຫ້ປະຊາຊົນລາວເກີດຄວາມບໍ່ພໍໃຈຢ່າງກວ້າງຂວາງອີກດ້ວຍນັ້ນ ຈຶ່ງເຮັດໃຫ້ຄະນະຜູ້ບໍລິຫານມະຫາວິທະຍາໄລທຳມະສາດຕ້ອງໄດ້ອອກມາສະແດງການຂໍໂທດໃນຄັ້ງນີ້.
ທ່ານ ອ້ວນ ພົມມະຈັກ ເອກອັກຄະລັດຖະທູດລາວ ປະຈໍາປະເທດໄທ
ໜັງສືການສະແດງການຂໍໂທດ
ດັ່ງກ່າວ ເປັນການລົງນາມໂດຍ
ສາດສະດາຈານ ສົມຄິດ ເລີດ
ໄພທູນ, ອະທິການບໍດີ ມະ
ຫາວິທະຍາໄລທຳມະສາດ ຊຶ່ງ
ໄດ້ລະບຸວ່າ ໃນຄວາມເປັນຈິງ
ແລ້ວ ເຖິງແມ່ນວ່ານັກສຶກສາ
ກຸ່ມນີ້ຈະມີເຈດຕະນາດີ ກໍຄື
ການຊັກຊວນຫລື ລະດົມໃຫ້
ປະຊາຊົນຄົນໄທຢຸດເຊົາທັດ
ສະນະຄະຕິເປັນການດູໝິ່ນ
ຫລື ດູຖູກຕໍ່ຄົນລາວໃນຖານະ
ເປັນມະນຸດທີ່ມີສະຖານະເທົ່າທຽມກັບຄົນໄທກໍຕາມ ຫາກແຕ່ວ່າ ຍ້ອນການນຳສະເໜີທີ່ບໍ່ເໝາະສົມຢ່າງຍິ່ງດັ່ງເນື້ອຫາຕອນໜຶ່ງໃນວີດິໂອ ທີ່ເປັນການສະແດງທັດສະນະຂອງນັກສຶກ
ສາໄທຄົນໜຶ່ງວ່າ:
“ຄໍາວ່າລາວນີ້ຈະໃຊ້ໃນກໍລະນີທີ່ບອກວ່າມັນເຫີ່ຍ (ເຊີຍ) ມາກ ຫລືຖ້າເປັນຄໍາດ່າກໍແບບປະມານວ່າ ອີ່ລາວ ຈັ່ງຊີ້ ແຕ່ດຽວນີ້ບໍ່ໄດ້ໃຊ້ແລ້ວ ເພາະມັນຊອຟໄປສໍາລັບຄວາມຮູ້ສຶກຕົວເອງນະ ແລະກໍມີຄໍາອື່ນມາດ່າແທນແລ້ວ ຢ່າງອີໂຈ້ອະໄຣ ເປັນຕົ້ນ. ແຕ່ວ່າຄໍາທີ່ມັນແຮງກວ່ານີ້ກໍມີ ແຕ່ບໍ່ສາມາດຈະອອກຊື່ໄດ້”
ຊຶ່ງດ້ວຍການນໍາສະເໜີລາຍງານທີ່ເນື້ອຫາໃນລັກສະນະດັ່ງກ່າວນັ້ນ ກໍຍັງໄດ້ເປັນຜົນເຮັດໃຫ້
ເກີດການຕອບໂຕ້ຈາກຄົນລາວອີກດ້ວຍການສະແດງທັດສະນະຄວາມເຫັນທີ່ມີຕໍ່ຄົນໄທ
ໂດຍຖ່າຍທໍາເປັນວີດິໂອ ແລະເຜີຍແຜ່ທາງເຄືອຂ່າຍອິນເຕີແນັດເຊັ່ນດຽວກັນ ຊຶ່ງມີເນື້ອຫາ
ຕອນນຶ່ງວ່າ:
“ສິ່ງທີ່ພວກຄົນໄທເວົ້າຫັ້ນນະ ເຂົາບໍ່ຄິດໃສ່ເລີຍບໍ່ວ່າສັນດານ ຫລືກໍາພືດຂອງພວກເຂົາຫັ້ນນະ ມັນຕໍ່າກວ່າ ຄົນລາວສໍ່າໃດ ທີ່ອອກມາເວົ້າຈັ່ງຊັ້ນ ແລ້ວຕົວເອງກໍຍັງມີໜ້າມາບອກວ່າເປັນປະເທດ ທີ່ຈະເລີນກວ່າ ຫລືວ່າມີອີ່ຫຍັງທີ່ລໍ້າ
ໜ້າກວ່າ ແລ້ວຍັງມາເຮັດໂຕຕໍ່າໆ ແບບບໍ່ມີການສຶກສາຫັ້ນນະ ບໍ່ໜ້າເລີຍທີ່
ສິມາເຮັດຈັ່ງຊີ້”
ລາຍງານຂອງນັກສຶກສາມະຫາວິທະຍາໄລທຳມະສາດດັ່ງກ່າວນີ້ ບໍ່ພຽງແຕ່ຈະກໍ່ໃຫ້ເກີດຄວາມບໍ່ພໍໃຈ ໃນກຸ່ມຄົນລາວທີ່ມີໂອກາດໄດ້ຮັບຮູ້ເນື້ອຫາທີ່ນໍາສະເໜີດັ່ງກ່າວເທົ່ານັ້ນ ຫາກແຕ່ມັນຍັງກໍ່ໃຫ້ເກີດການວິພາກວິຈານເຖິງຄວາມບໍ່ເໝາະສົມດັ່ງກ່າວໃນສັງຄົມໄທຢ່າງກວ້າງຂວາງອີກດ້ວຍເຊັ່ນກັນ. ດ້ວຍເຫດນີ້ ຈຶ່ງເຮັດໃຫ້ທາງການມະຫາວິທະຍາໄລທຳມະສາດຕ້ອງໄດ້ອອກມາສະແດງຄວາມຮັບຜິດຊອບດ້ວຍການຍື່ນໜັງສືຂໍໂທດຕໍ່ ເອກອັກຄະລັດຖະທູດລາວປະຈໍາບາງກອກ ດັ່ງກ່າວ.
ພ້ອມກັນນີ້ ທາງມະຫາວິທະຍາໄລທຳມະສາດຍັງໄດ້ໃຫ້ການຢືນຢັນຕໍ່ເອກອັກຄະລັດຖະ
ທູດລາວປະຈໍາບາງກອກອີກດ້ວຍວ່າ ຈະບໍ່ຍອມໃຫ້ມີເຫດການໃນລັກສະນະດຽວກັນນີ້
ເກີດຂຶ້ນອີກຢ່າງເດັດຂາດ. ທັງຍັງຈະສະແດງບົດບາດໃນການສົ່ງເສີມຄວາມສຳພັນອັນດີ
ລະຫວ່າງລາວ-ໄທໃຫ້ໝັ້ນແກ່ນຂຶ້ນອີກດ້ວຍ.