ຕຳຫຼວດໄທ ໄດ້ສະແດງຄວາມໝັ້ນໃຈ ໃນວັນຈັນມື້ນີ້ ວ່າ
ພວກຕົນ ຈັບກຸມຕົວຊາຍຜູ້ທີ່ຮັບຜິດຊອບ ສຳຫລັບວາງ
ລະເບີດ ທີ່ໄດ້ສັງຫານ 20 ຄົນ ທີ່ລວມມີ ຊາວຈີນ ແລະ
ນັກທ່ອງທ່ຽວຄົນອື່ນໆ ຢູ່ທີ່ສານເຈົ້າບ່ອນນິຍົມຊົມຊອບ
ໃນບາງກອກ ໄດ້ແລ້ວ.
ພາຍຫຼັງຈາກລະເບີດແຕກຂຶ້ນ ເມື່ອບໍ່ດົນ ບັນດາເຈົ້າໜ້າທີ່
ໄດ້ເຜີຍແຜ່ ຖະແຫລງການ ຫຼາຍສະບັບ ໃນບາງຄັ້ງ ບໍ່ຈະແຈ້ງ
ແລະກົງກັນຂ້າມ ກ່ຽວກັບພວກຕ້ອງສົງໄສ ທີ່ກ່ຽວຂ້ອງກັບ
ການໂຈມ ແລະ ຈຸດປະສົງຂອງພວກເຂົາເຈົ້າ ຊຶ່ງນຳໄປສູ່
ການມີຄວາມບໍ່ເຊື່ອຖື ກ່ຽວກັບຄວາມຊື່ສັດຂອງການສືບສວນ
ສອບສວນ. ແຕ່ພວກເຂົາເຈົ້າກ່າວວ່າ ປັດຈຸບັນນີ້ ພວກເຂົາ ໄດ້ລະບຸຕົວຜູ້ວາງລະເບີດ
ພ້ອມດ້ວຍ ເຄືອຂ່າຍທີ່ໄດ້ໃຫ້ການຊ່ວຍເຫຼືອຜູ້ກ່ຽວ ໃຫ້ປະຕິບັດການໂຈມຕີຢ່າງຮ້າຍແຮງ
ທີ່ເຮັດໃຫ້ເກີດການສູນເສຍຊີວິດຫຼວງຫຼາຍ.
ບັນດາເຈົ້າໜ້າທີ່ຕຳຫລວດ ນຳຕົວຜູ້ຕ້ອງສົງໄສ ສຳຄັນຄົນນຶ່ງ ໃນການວາງລະເບີດ ຢູ່ບາງກອກ ເມື່ອເດືອນແລ້ວນີ້ ຜູ້ໃສ່ເສື້ອເຫຼືອງ ທີ່ລະບຸຕົວ ໂດຍຕຳຫຼວດຄື ທ້າວ Yusufu Mierili ຫຼືວ່າ Yusufu Mieraili ທີ່ເດີນທາງດ້ວຍໜັງສືຜ່ານແດນຂອງຈີນ ແຕ່ສັນຊາດຂອງຜູ້ກ່ຽວ ແມ່ນຍັງບໍ່ສາມາດ ຢັ້ງຢືນໄດ້ເທື່ອ, ວັນທີ 9 ກັນຍາ 2015.
ທ້າວ Bilal Mohammed ທີ່ຍັງຖືກລະບຸຕົວຄື ທ້າວ Mohammad Bilaturk ຜູ້ທີ່ຖືໜັງສື
ເດີນທາງ ຂອງປະເທດເທີກີ ທີ່ປອມແປງ ໃນນາມ Adem Karadag ອາຍຸ 28 ປີ ແມ່ນຖືກ
ກ່າວຫາວ່າ ເປັນຜູ້ວາງລະເບີດ ເມື່ອວັນທີ 17 ສິງຫາ ຢູ່ທີ່ສານເຈົ້າ Erawan.
ຜູ້ຕ້ອງສົງໄສ ທີ່ໃສ່ເສື້ອຢືດ ຫຼື T-shirt ສີເຫຼືອງ ຄ້າຍຄືກັນກັບອັນທີ່ຜູ້ວາງລະເບີດໄດ້ໃສ່
ທີ່ປາກົດເຫັນຢູ່ໃນພາບບັນທຶກຈາກກ້ອງວົງຈອນປິດ ໄດ້ຖືກບັງຄັບໃຫ້ ສະແດງຄືນເຫດການ
ວາງລະເບີດ ຢ່າງເປີດເຜີຍຕໍ່ສາທາລະນະ ຢູ່ທີ່ສານເຈົ້າໃນວັນເສົາຜ່ານມາ ຊຶ່ງເປັນການ
ປະຕິບັດຕາມທຳມະດາ ຂອງການສືບສວນສອບສວນ.
ຜູ້ຕ້ອງສົງໄສ ຄົນທີສອງ ທ້າວ Yusufu Mierili ອາຍຸ 25 ປີ ເປັນຄົນພື້ນເມືອງ Xinjiang
ຂອງຈີນ ແມ່ນຖືກກ່າວຫາວ່າ ເປັນຜູ້ທີ່ໄດ້ຍື່ນຖົງລະເບີດໃຫ້ແກ່ ທ້າວ Bilal ແລະ ໄດ້ຖ່າຍ ພາບເອົາຜົນເສຍຫາຍຫຼັງການລະເບີດ.
ຕຳຫຼວດ ກ່າວວ່າ ຊາຍທັງສອງຄົນ ໄດ້ສາລະພາບ ວ່າ ພວກເຂົາມີສ່ວນກ່ຽວພັນກັບການ
ວາງລະເບີດ.
ທະຫານໄທ ສອງນາຍ ຍ່າງຢູ່ນອກ ສານເຈົ້າ Erawan ຢູ່ທີ່ສີ່ແຍກ Rajprasong ຊຶ່ງເປັນສະຖານທີ່ ວາງລະເບີດ ເມື່ອຫຼາຍອາທິິດຜ່ານມາ ໃນບາງກອກ, ວັນທີ 24 ສິງຫາ 2015.