ເຈົ້າໜ້າທີ່ ໄທ ທີ່ກຳລັງສືບສວນກ່ຽວກັບການໂຈມຕີ ບາງກອກ ດ້ວຍລະເບີດໃນຕົ້ນເດືອນນີ້ ໄດ້ປະກາດວ່າ ພວກເຂົາເຈົ້າໄດ້ຄົ້ນພົບວັດຖຸຜະລິດລະເບີດອີກໃນການເຂົ້າຄົ້ນຫ້ອງພັກໃນນະຄອນຫຼວງ ແລະ ອອກໝາຍຈັບຜູ້ຕ້ອງສົງໃສອີກສອງຄົນ ເຊິ່ງເປັນແມ່ຍິງ ໄທ ອາຍຸ 26 ປີ ແລະ ຜູ້ຊາຍຕ່າງຊາດຄົນນຶ່ງ. ຮູບພາບຂອງແມ່ຍິງ, ບອກວ່າລາວແມ່ນນາງ ວັນນະ ສວນສານ, ໃສ່ຜ້າຄຸມຫົວ ແລະ ພາບແຕ້ມຂອງ ຜູ້ຕ້ອງສົງໄສຊາຍບໍ່ລະບຸຊື່ ນຳອອກອາກາດ ພາກພິເສດໃນທຸກໆຊ່ອງໂທລະພາບຂອງ ໄທ ໃນຕອນສວຍມື້ນີ້.
ການເປີດເຜີຍໄດ້ມີຂຶ້ນຫຼັງຈາກຕຳຫຼວດໄດ້ບຸກເຂົ້າໃນຕຶກຫ້ອງພັກ ໃນວັນອາທິດວານນີ້, ແລະ ທຳອິດພວກເຂົາເຈົ້າໄດ້ບອກນັກຂ່າວວ່າ ບໍ່ໄດ້ພົບເຫັນຫຍັງທີ່ໜ້າສົງໄສ.
ແຕ່ວ່າໃນການອອກອາກາດຂອງວັນຈັນມື້ນີ້ ພົນໂທ ປຣາວຸດ ຖາວອນສິຣິ ໄດ້ກ່າວວ່າ ປຸຍ ແລະ ເຄື່ອງປົດຂະນວນລະເບີດ ແລະ ໂມງດິຈິຕອລ ແມ່ນໄດ້ຖືກຍຶດໃນລະຫວ່າງ ການຄົ້ນ ຫຼາຍຫ້ອງທີ່ອາຄານຫ້ອງພັກໃນວັນອາທິດວານນີ້ ທີ່ຄຸ້ມ ມີນ ບູຣິີ ໃນບາງກອກ.
ໃນວັນເສົາທີ່ຜ່ານມາ, ເຈົ້າໜ້າທີ່ໄດ້ຄວບຄຸມໂຕຊາຍຕ່າງຊາດ ອາຍຸ 28 ປີ ແລະ ໄດ້ກ່າວວ່າ ພວກເຂົາເຈົ້າໄດ້ພົບເຫັນລະເບີດ, ສານເຄມີ, ລູກປືນ ແລະ ສ່ວນປະກອບອື່ນໆເພື່ອຜະລິດ ລະເບີດແປັບນ້ຳ. ອົງປະກອບດັ່ງກ່າວໄດ້ຖືກກ່າວວ່າ ເປັນປະເພດທີ່ຄ້າຍຄືກັນກັບສິ່ງ ທີ່ໃຊ້ ໃນລະເບີດທີ່ແຕກຢູ່ສານເຈົ້າ ເອລະວັນ ໃນວັນທີ 17 ເດືອນສິງຫານີ້ ແລະ ໃນແມ່ນ້ຳເຈົ້າ ພະຍາ ຕິດກັບຂົວທ່າເຮືອ ສາທອນ ໃນມື້ຕໍ່ມາ.
ການລະເບີດທີ່ສານເຈົ້າ ຮິນດູ, ອັນເປັນທີ່ນິຍົມຊົມຊອບຂອງນັກທ່ອງທ່ຽວ ຈີນ ແລະ ຄົນ ເອເຊຍອື່ນໆ, ໄດ້ເຮັດໃຫ້ 20 ຄົນເສຍຊີວິດ ແລະ ຫຼາຍກວ່າ 100 ຄົນບາດເຈັບ, ມັນເປັນ ການໂຈມຕີທີ່ເຮັດໃຫ້ມີຄວາມເສຍຫາຍ ເປັນວົງກວ້າງໃນຄັ້ງດຽວທີ່ຮ້າຍແຮງທີ່ສຸດ ໃນ ໄທ
ເຊິ່ງຕໍ່ມາລະເບີດແຕກທີ່ຂົວທ່າເຮືອ ບໍ່ໄດ້ເຮັດໃຫ້ມີການບາດເຈັບ ແຕ່ຢ່າງໃດ.
ຜູ້ບັນຊາການທະຫານສູງສຸດ ພົນເອກ ອຸດົມເດດ ສີທະບຸດ ໄດ້ກ່າວ ໃນວັນຈັນມື້ນີ້ວ່າຍັງບໍ່ ທັນກະຈ່າງແຈ້ງເທື່ອວ່າ ເຫດລະເບີດທີ່ສານ ເຈົ້າ ຈະກ່ຽວຂ້ອງກັບການເນລະເທດຊົນເຜົ່າ ວີເກີ ຫຼາຍກວ່າ 100 ຄົນໄປຍັງ ຈີນ ຫຼືບໍ່.