ນາຍົກລັດຖະມົນຕີໄທ ຢືນຢັນວ່າຈະລົງທຶນກໍ່ສ້າງທາງລົດໄຟ
ຄວາມໄວປານກາງລະບົບລາງຄູ່ ເພື່ອເຊື່ອມຕໍ່ກັບລາວ ແລະ ຈີນ
ໃຫ້ໄດ້ຕະຫລອດ ເສັ້ນທາງພາຍໃນປີ 2022 ເປັນຢ່າງຊ້າ.
Your browser doesn’t support HTML5
ຟັງລາຍງານ ນາຍົກໄທ ຢືນຢັນ ຈະລົງທຶນ ກໍ່ສ້າງທາງລົດໄຟ ຄວາມໄວປານກາງ ລະບົບລາງຄູ່ ເພື່ອເຊື່ອມຕໍ່ກັບລາວ.
ພົນເອກ ປຣະຍຸດ ຈັນໂອຊາ ຫົວໜ້າຄະນະຮັກສາຄວາມສະຫງົບ ແລະ ນາຍົກລັດຖະມົນຕີ ໄທ ໄດ້ຖະແຫລງຢືນຢັນວ່າ ຄະນະລັດຖະບານໄທ ໄດ້ບັນຈຸໂຄງການກໍ່ສ້າງລົດໄຟຄວາມໄວລະດັບປານກາງ ລະບົບລາງຄູ່ ຂະໜາດກວ້າງ 1.438 ແມັດ ເພື່ອເຊື່ອມຕໍ່ກັບລາວໄປຈີນ ໄວ້ໃນແຜນການພັດທະນາລະບົບ ໂຄງສ້າງພື້ນຖານລະດັບຊາດນັບຈາກປີ 2015 ໄປຈົນເຖິງປີ 2022 ຢ່າງເປັນທາງການແລ້ວໃນຂະນະນີ້.
ໂດຍສຳຫລັບເສັ້ນທາງລົດໄຟລະບົບລາງຄູ່ ທີ່ຈະເຊື່ອມຕໍ່ກັບລາວ ໄປຈີນນັ້ນ ຈະມີຢູ່ 3 ເສັ້ນ ທາງດ້ວຍ ກໍຄືເສັ້ນທາງບາງກອກ-ໂຄຣາດ-ໜອງຄາຍ ກັບເສັ້ນທາງທ່າເຮືອມາບຕາພຸດ-ໂຄຣາດ-ໜອງຄາຍ ແລະ ເສັ້ນທາງຣະຢອງ-ບາງກອກ-ໂຄຣາດ-ໜອງຄາຍ ທີ່ຈະເຊື່ອມຕໍ່ກັບນະຄອນຫລວງວຽງຈັນ ຂອງລາວຕໍ່ໄປຍັງຈີນ ຊຶ່ງນາຍົກລັດຖະມົນຕີໄທ ຄາດວ່າຈະເຊື່ອມຕໍ່ກັນໄດ້ຕະຫລອດເສັ້ນທາງພາຍໃນປີ 2022 ເປັນຢ່າງຊ້າດັ່ງທີ່ພົນເອກ ປຣະຍຸດ ໄດ້ໃຫ້ການຢືນຢັນວ່າ:
“ການພັດທະນາໂຄງຂ່າຍລົດໄຟ ລະຫວ່າງເມືອງ ຈະພັດທະນາທາງຄູ່ຂະໜາດມາດຕະຖານ 3 ເສັ້ນທາງ ທີ່ຈະເນັ້ນການຂົນສົ່ງ ເຊື່ອມຕໍ່ໄປຍັງເຂດອຸດສາຫະກຳ ແລະ ປະເທດເພື່ອນບ້ານ ໄດ້ແກ່ ກຸງເທບ-ນະຄອນຣາດຊະສີມາ-ມາບຕາພຸດ ກຸງເທບ-
ຣະຢອງ ແລະ ນະຄອນຣາດຊະສີມາ-ໜອງຄາຍ ຄິດເປັນລະຍະທາງ 705 ກິໂລແມັດ.”
ກ່ອນໜ້ານີ້ ທ່ານນາງ ວິໄລຄຳ ໂພສາລາດ ລັດຖະມົນຕີຊ່ວຍວ່າການກະຊວງໂຍທາທິການ ແລະ ຂົນສົ່ງ ໄດ້ຖະແຫລງຢືນຢັນວ່າ ການເຈລະຈາລະຫວ່າງ ຜູ້ຕ່າງໜ້າຂອງລັດຖະບານລາວ ກັບຈີນກ່ຽວກັບແຜນການກໍ່ສ້າງທາງລົດໄຟ ເພື່ອເຊື່ອມຕໍ່ ຈາກຈີນມາລາວ ຍັງສືບຕໍ່ການເຈລະຈາຢູ່ເລື້ອຍມາ ໂດຍນາຍົກລັດຖະມົນຕີຂອງທັງ 2 ປະເທດ ໄດ້ແຕ່ງຕັ້ງ ຄະນະກຳມະການ ຂອງຝ່າຍຕົນຂຶ້ນມາ ຮັບຜິດຊອບການເຈລະຈາເປັນການສະເພາະ.
ພົນເອກ ປຣະຍຸດ ຈັນໂອຊາ ໄດ້ຖະແຫລງຢືນຢັນວ່າ ຈະກໍ່ສ້າງທາງລົດໄຟ ຄວາມໄວປານກາງລະບົບລາງຄູ່ ເພື່ອເຊື່ອມຕໍ່ກັບລາວ ແລະ ຈີນ.
ແຕ່ຢ່າງໃດກໍຕາມ ທ່ານນາງ ວິໄລຄຳ ກໍບໍ່ສາມາດທີ່ຈະໃຫ້ການ
ຄາດໝາຍໄດ້ວ່າ ການເຈລະຈາ ລະຫວ່າງຄະນະຮັບຜິດຊອບ
ຂອງທາງການລາວ ແລະ ຈີນຈະຕ້ອງໃຊ້ເວລາ ອີກຍາວນານ
ເທົ່າໃດແທ້ ຫາກແຕ່ກໍມີຄວາມຫວັງວ່າທາງການຂອງທັງ 2 ຝ່າຍ
ຈະສາມາດຕົກລົງກັນໄດ້ໃນທີ່ສຸດ ເນື່ອງຈາກວ່າ ຜູ້ນຳລັດຖະບານ
ລາວ ແລະ ຈີນ ຕ່າງກໍໄດ້ໃຫ້ຄວາມສຳຄັນຢ່າງຍິ່ງ ກັບແຜນການ
ກໍ່ສ້າງທາງລົດໄຟ ເພື່ອເຊື່ອມຕໍ່ລະຫວ່າງກັນ ດັ່ງທີ່ ທ່ານນາງ
ວິໄລຄຳ ໄດ້ໃຫ້ການຢືນຢັນວ່າ:
“ການກໍ່ສ້າງເສັ້ນທາງລົດໄຟ ຖືເປັນອັນໃໝ່ສະເພາະ
ປະເທດຂອງພວກເຮົາ ສະນັ້ນກະຊວງໂຍທາ ໃນນາມ
ທີ່ລັດຖະບານ ໄດ້ມອບໝາຍໃຫ້ຮັບຜິດຊອບ ກໍແມ່ນສືບຕໍ່ການເຈລະຈາ ຄະນະ
ນຳເພິ່ນກະໄດ້ເອົາໃຈໃສ່ ເພິ່ນກະໄດ້ເຈລະຈາຊ່ອຍ ພ້ອມກັນນັ້ນ ພວກເຮົາກະ
ແມ່ນໄດ້ກະກຽມ ຜູ້ຮັບຜິດຊອບໂຄງການ ໂດຍການແຕ່ງຕັ້ງ ຈາກທ່ານນາຍົກ
ກະຖືວ່າມີຄວາມຄືບໜ້າ ດຽວນີ້ຢູ່ໃນຂັ້ນເຈລະຈາ ເຖິງແນວໃດກະຢ່າ ກະຊວງ
ໂຍທາ ກະມີຄວາມຫວັງ ຫັ້ນແຫລະ.”
ທາງດ້ານ ທ່ານຫລີ ເຄີ້ສຽງ ນາຍົກລັດຖະມົນຕີຈີນ ກໍໄດ້ຢືນຢັນວ່າ ຈະເລັ່ງລັດໃຫ້ມີ
ການເຈລະຈາ ລະຫວ່າງລາວກັບຈີນ ເພື່ອຕົກລົງກ່ຽວກັບແຜນການກໍ່ສ້າງທາງລົດໄຟ
ໃນລາວ ໃຫ້ໄວທີ່ສຸດ ໂດຍເປັນການຢືນຢັນ ໃນໂອກາດທີ່ ທ່ານທອງສິງ ທຳມະວົງ ນາຍົກ
ລັດຖະມົນຕີລາວ ໄດ້ເດີນທາງໄປຢ້ຽມຢາມປະເທດຈີນ ຢ່າງເປັນທາງການ ໃນຊ່ວງຕົ້ນ
ເດືອນເມສາ 2014 ທີ່ຜ່ານມາ.
ໂດຍເຖິ່ງແມ່ນວ່າ ການຢືນຢັນຂອງນາຍົກລັດຖະມົນຕີຈີນ ໃນຄັ້ງຫລ້າສຸດນີ້ ຈະຍັງຄົງບໍ່
ມີຄວາມຊັດເຈນວ່າ ການເຈລະຈາດັ່ງກ່າວ ຈະກຳນົດ ໃຫ້ມີຂຶ້ນຢ່າງເປັນທາງການ ເມື່ອໃດ
ກໍຕາມ ຫາກແຕ່ນາຍົກລັດຖະມົນຕີຈີນ ກໍໄດ້ຢືນຢັນວ່າ ການເຈລະຈາຮອບໃໝ່ ຈະມີ
ການກຳນົດຮູບແບບຂອງການຮ່ວມມື ທີ່ມີປະສິດທິພາບ ແລະຕ່າງຝ່າຍຕ່າງໄດ້ຮັບຜົນ
ປະໂຫຍດ ຢ່າງຍຸດຕິທຳ ແລະ ສອດຄ້ອງກັບສະພາບການທີ່ເປັນຈິງ ຊຶ່ງທາງການຈີນ ກໍ
ໄດ້ແຕ່ງຕັ້ງຄະນະຮັບຜິດຊອບ ໃນການສຶກສາຄວາມເປັນໄປໄດ້ ຂອງໂຄງການອີກເທື່ອ
ໃໝ່ແລ້ວ.
ທັງນີ້ ກໍເນື່ອງຈາກທາງການຈີນເຫັນວ່າ ລົດໄຟຄວາມໄວສູງອາດຈະບໍ່ເມາະສົມກັບສະພາບພູມິປະເທດ ໃນລາວ ທີ່ສ່ວນໃຫຍ່ເປັນເຂດພູດອຍ ກັບທັງຍັງອາດຈະບໍ່ສອດຄ້ອງ ກັບການພັດທະນາເສດຖະກິດ ຂອງລາວ ອີກດ້ວຍ ເພາະສະນັ້ນ ທາງການຈີນ ຈຶ່ງໄດ້ສະເໜີໃຫ້ມີການປັບປ່ຽນຈາກລົດໄຟຄວາມໄວສູງ ເປັນລົດໄຟຄວາມໄວປານກາງ ລະບົບລາງຄູ່ ທີ່ແຍກກັນລະຫວ່າງຂະບວນ ໂດຍສານທີ່ມີຄວາມໄວ 160 ກິໂລແມັດ ຕໍ່ຊົ່ວໂມງ ແລະ ຂະບວນຂົນສົ່ງສິນຄ້າ ທີ່ມີຄວາມໄວ 120 ກິໂລແມັດ ຕໍ່ຊົ່ງໂມງ ຕາກລຳດັບ.