ອະດີດນາຍົກລັດຖະມົນຕີໄທ ທ່ານນາງຍິ່ງລັກ ຊິນນະວັດ ໄດ້
ກ່າວປ້ອງກັນຕົວເອງຢ່າງແຂງຂັນໃນສະພາ ກ່ອນທີ່ສະມາຊິກ
ສະພາຈະລົງຄະແນນສຽງວ່າ ຈະດຳເນີນການຟ້ອງຮ້ອງທ່ານ
ນາງຫຼືບໍ່ໃນຖານະບົດບາດຂອງທ່ານນາງ ກ່ຽວກັບໂຄງການ
ຈຳນຳເຂົ້າ ທີ່ເປັນບັນຫາໂຕ້ແຍ້ງກັນນັ້ນ.
ສະມາຊິກສະພານິຕິບັນຍັດ 220 ທ່ານ ທີ່ຖືກແຕ່ງຕັ້ງໂດຍພວກ
ທະຫານ ຫຼັງຈາກໄດ້ມີການກໍ່ລັດຖະປະຫານ ໃນເດືອນພຶດສະພາ
ປີກາຍນີ້ ຈະທຳການລົງຄະແນນສຽງໃນວັນສຸກມື້ອື່ນ. ຖ້າມີ
ການຟ້ອງຮ້ອງທ່ານນາງຍິ່ງລັກແລ້ວນັ້ນ ທ່ານນາງຈະຖືກຫ້າມ
ບໍ່ໃຫ້ຫລິ້ນການເມືອງເປັນເວລາ 5 ປີ.
ທ່ານນາງ ໄດ້ບອກກັບພວກສະມາຊິກສະພາວ່າ ຄະດີທີ່ຟ້ອງຮ້ອງຕໍ່ທ່ານນາງນັ້ນ ແມ່ນມີຈຸດ
ປະ ສົງທາງການເມືອງ ແລະໂຄງການຈຳນຳເຂົ້ານັ້ນ ແມ່ນເປັນຜົນປະໂຫຍດຕໍ່ຊາວນາໄທ.
ຄະນະກຳມາທິການຕ້ານການສໍ້ລາດບັງຫຼວງ ຖືວ່າທ່ານນາງຍິ່ງລັກ ເປັນຜູ້ຮັບຜິດຊອບໃນການທີ່ບໍ່ໄດ້ຍຸດຕິໂຄງການດັ່ງກ່າວ ທີ່ພາໃຫ້ລັດຖະບານເສຍເງິນປະມານ 4 ພັນລ້ານໂດລາ.
ພວກເຈົ້າໜ້າທີ່ກ່າວວ່າ ເຂົາເຈົ້າໄດ້ເຕືອນລັດຖະບານແລ້ວວ່າ ໂຄງການທີ່ວ່ານີ້ ແມ່ນປະເຊີນກັບບັນຫາຫຍຸ້ງຍາກທາງການເງິນ.
ທ່ານນາງຍິ່ງລັກ ແມ່ນນ້ອງສາວຂອງອະດີດຜູ້ນຳຂອງໄທ ທ່ານທັກສິນ ຊິນນະວັດ ຊຶ່ງທາງ
ທະຫານ ກໍໄດ້ກໍ່ລັດຖະປະຫານໂຄ່ນລົ້ມທ່ານ ໃນປີ 2006 ໃນຂໍ້ຫາສໍ້ລາດບັງຫຼວງ. ທ່ານທັກ
ສິນ ໄດ້ໜີອອກຈາກປະເທດໄທ ໃນປີ 2008 ເວລາທ່ານໄດ້ປະເຊີນກັບການຕິດຄຸກ 2 ປີ ໃນຖານສໍ້ລາດບັງຫຼວງ. ແຕ່ວ່າທ່ານທັກສິນ ແລະພັກເພື່ອໄທ ຍັງເປັນທີ່ນິຍົມຢູ່ ໂດຍສະ
ເພາະແມ່ນໃນເຂດຊົນນະບົດ.