ທາງການໄທ ຮຽກຮ້ອງໃຫ້ທາງການຈີນ ເພີ້ມຊົ່ວໂມງ ເຮັດວຽກ ຂອງ ເຈົ້າໜ້າທີ່ພາສີ ປະຈຳຢູ່ທີ່ດ່ານບໍ່ຫານ ເພື່ອໃຫ້ມີການນຳເຂົ້າໝາກໄມ້ຈາກໄທເພີ່ມຂຶ້ນ ໂດຍສະເພາະແມ່ນໝາກຖົ່ວລຽນນັ້ນ.
Your browser doesn’t support HTML5
ທາງການໄທ ຮຽກຮ້ອງໃຫ້ທາງການຈີນ ເພີ້ມຊົ່ວໂມງ ເຮັດວຽກ ຂອງ ເຈົ້າໜ້າທີ່ພາສີ ປະຈຳຢູ່ທີ່ດ່ານຊາຍແດນບໍ່ຫານ ຂອງຈີນ
ເຈົ້າໜ້າທີ່ຂັ້ນສູງໃນກະຊວງການຄ້າໄທ ເປີດເຜີຍວ່າ ລັດຖະມົນຕີການຄ້າໄທໄດ້ສົ່ງຈົດໝາຍຮ້ອງຂໍໄປຍັງລັດຖະມົນຕີການຄ້າຈີນ ເພື່ອຮ້ອງຂໍໃຫ້ພິຈາລະນາເພີ່ມເວລາເຮັດວຽກຂອງພະນັກງານພາສີຢູ່ດ່ານບໍ່ຫານຂອງຈີນ ເຊິ່ງຢູ່ກົງກັນຂ້າມກັບດ່ານບໍ່ເຕັນ ແຂວງຫຼວງນ້ຳທາ. ເມື່ອບໍ່ດົນມານີ້ ໂດຍເປົ້າຫມາຍຂອງການຮ້ອງຂໍດັ່ງກ່າວນີ້ ກໍເພື່ອເຮັດໃຫ້ນັກທຸລະກິດໄທ ສາມາດສົ່ງອອກໝາກໄມ້ໄປຈີນໄດ້ຫຼາຍຂຶ້ນ. ໂດຍສະເພາະແມ່ນໝາກຖົ່ວລຽນໄທ ທີ່ເປັນທີ່ນິຍມອັນດັບ 1 ຂອງຜູ້ບໍລິໂພກຊາວຈີນນັ້ນ
ຊຶ່ງຖ້າຫາກວ່າ ທາງການຈີນເຫັນດີແລະຕົກລົງຕາມການຮຽກຮ້ອງຂອງທາງການໄທ, ກໍຈະເຮັດໃຫ້ມີການເພີ່ມເວລາປະຕິບັດງານຂອງພະນັກງານພາສີຈີນ ຢູ່ດ່ານບໍ່ຫານຂອງຈີນຈາກເວລາ 8-21 ໂມງ ເປັນ 8-24 ໂມງຂອງທຸກໆວັນ, ແລະເຈົ້າໜ້າທີ່ໄທໝັ້ນໃຈວ່າ ທາງການຈີນຈະເຫັນດີກັບຄວາມຮຽກຮ້ອງຄັ້ງນີ້ ດັ່ງເຈົ້າໜ້າທີ່ໄທ ຢືນຢັນວ່າ:
“ການຂົນສົ່ງໝາກໄມ້ຈາກໄທໄປເມືອງສິບສອງພັນນາ ຫຼືແຂວງຢຸນຫນານ, ຖ້າເຮົາເບິ່ງຄວາມຕ້ອງການຂົນສົ່ງໝາກໄມ້ຈາກໄທເພີ່ມຂຶ້ນ ເຖິງແມ່ນວ່າ ຈະເປີດເຖິງ 21 ໂມງກໍຍັງບໍ່ພໍ, ອາດຈະມີການຮ້ອງຂໍໃຫ້ເປີດຈົນເຖິງ 21 ຫຼື 22 ໂມງ, ກໍຄືຈົນເຖິງ 23 ໂມງຫຼືທ່ຽງຄືນກໍໄດ້ ເຊິ່ງຄິດວ່າບໍ່ແມ່ນບັນຫາ ເນື່ອງຈາກວ່າ ທ່ານຮອງນາຍົກລັດຖະມົນຕີ ໄດ້ຍື່ນຂໍ້ສະເໜີກ່ຽວກັບການປິດຊົ່ວໂມງເພີ່ມເຕີມແລ້ວ, ພຽງແຕ່ໃຫ້ບັນດາອົງການທີ່ກ່ຽວຂ້ອງຕ້ອງປະສານງານພາຍໃນ ຫຼື ປະສານງານຢ່າງເປັນທາງການເທົ່ານັ້ນ.”
ເຈົ້າໜ້າທີ່ຂັ້ນສູງຂອງໄທ ຍັງຄາດໝາຍດ້ວຍວ່າ ການຄ້າລະຫວ່າງໄທກັບຈີນ ທີ່ຂົນສົ່ງສິນຄ້າຜ່ານທາງລົດໄຟ ລາວ-ຈີນ ໃນປີ 2024 ຈະຂະຫຍາຍຕົວຫຼາຍກວ່າ 30% ເມື່ອທຽບໃສ່ປີ 2023 ເພາະວ່າ ລະບົບການຂົນສົ່ງໄດ້ຮັບການປັບປຸງໃຫ້ມີຄວາມສະດວກສະບາຍ ແລະ ວ່ອງໄວຂຶ້ນ ດ້ວຍການຫຼຸດຜ່ອນຂະບວນການກວດກາສິນຄ້າແມ່ນຢູ່ຈຸດຕົ້ນທາງ ແລະ ປາຍທາງເທົ່ານັ້ນ ໂດຍເມື່ອສົມທົບກັບການຕົກລົງເຊື່ອມຕໍ່ການຂົນສົ່ງສິນຄ້າທາງລົດໄຟ ລະຫວ່າງ ໄທ - ລາວ ແລະ ຈີນ ໄປຍັງມາເລເຊຍ ທີ່ໄດ້ຮັບການຈັດຕັ້ງປະຕິບັດແຕ່ເດືອນມີນາ 2024 ເປັນຕົ້ນມາແລ້ວ ກໍຍັງນັບເປັນປັດໄຈສຳຄັນທີ່ຈະສົ່ງຜົນຕໍ່ການຄ້າຊາຍແດນ ແລະການຄ້າຂ້າມຊາຍແດນລະຫວ່າງ ໄທ-ມາເລເຊຍ ແລະຈີນຜ່ານປະເທດລາວນັ້ນ ຢັງຈະເພິ່ມຂື້ນເປັນ 2,000 ຕື້ບາດ ພາຍໃນໄລຢະ 3 ປີຕໍ່ຫນ້າຍ່າງແນ່ນອນ.
ແຕ່ຍ່າງໃດກໍ່ຕາມ ຫົວຫນ້າທຸລະກິດຂອງລາວຈະໄດ້ຮັບຜົນປະໂຫຍດພຽງແຕ່ສ່ວນນ້ອຍເທົ່ານັ້ນ. ເນື່ອງຈາກວ່າຂະແໜງການຜະລິດສິນຄ້າສ່ວນໃຫຍ່ ໃນລາວ ຍັງບໍ່ສາມາດຕອບສະໜອງຄວາມຕ້ອງການພາຍໃນໄດ້ຢ່າງພຽງພໍ ຈຶ່ງຕ້ອງເພິ່ງພາການນໍາເຂົ້າສິນຄ້າອຸປະໂພກບໍລິໂພກຈາກຕ່າງປະເທດເປັນດ້ານຫລັກ ສ່ວນສິນຄ້າສົ່ງອອກຍັງມີຈຳນວນຈຳກັດ. ຄືພະລັງງານໄຟຟ້າ ແລະແຮ່ທາດເທ່ານັ້ນ, ຈຶ່ງເຮັດໃຫ້ລາວຕ້ອງປະເຊີນກັບບັນຫາການຂາດດຸນການຄ້າຕ່າງປະເທດຢ່າງຕໍ່ເນື່ອງ ແລະຍັງເຮັດໃຫ້ເງິນຕາຕ່າງປະເທດຫລຸດລົງອີກດ້ວຍ, ດັ່ງທີ່ ດຣ. ອັດ ພິສານວານິດ ຜູ້ຊ່ຽວຊານດ້ານການຄ້າໃນອາຊຽນ ຢືນຢັນວ່າ:
“ໂຄງສ້າງທາງເສດຖະກິດຂອງປະເທດລາວ ນັ້ນແມ່ນເປັນປະເທດທີ່ຂຶ້ນກັບເຄື່ອງອຸປະໂພກບໍລິໂພກ ແລະສິນຄ້າທີ່ຈຳເປັນເຊັ່ນ ນ້ຳມັນຈາກຕ່າງປະເທດ ເຮັດໃຫ້ເງິນຕາຕ່າງປະເທດໄຫຼອອກໄປຕ່າງປະເທດ ແລະ ເຮັດໃຫ້ເງິນຕາຕ່າງປະເທດຫລຸດລົງ ກ່ອນໜ້ານີ້ ລາວມີປະມານ 2,000-3,000 ລ້ານໂດລາສະຫະລັດ ໃນປະຈຸບັນນີ້ ຍັງເຫຼືອປະມານ 1,000 ລ້ານໂດລາສະຫະລັດ. ສະນັ້ນ, ເງິນຕາຕ່າງປະເທດຈຶ່ງບໍ່ເຂົ້າມາ, ພ້ອມກັນນັ້ນ, ຍັງມີສິນຄ້າສົ່ງອອກສອງຢ່າງຄື: ໄຟຟ້າຈາກເຂື່ອນພະລັງງານນ້ຳ ແລະແຮ່ທາດ ເພາະສະນັ້ນ, ຈຶ່ງເຮັດໃຫ້ທືນສຳຮອງເງິນຕາຕ່າງປະເທດຫຼຸດລົງ”.
ທັ້ງນີ້ໂດຍ ດຣ.ອັດ ຄາດຄະເນວ່າ ໃນປັດຈຸບັນ ລັດຖະບານລາວມີເງິນຕາຕ່າງປະເທດຢູ່ໃນລະບົບທະນາຄານ ມູນຄ່າທັງໝົດບໍ່ເກີນ 1,000 ລ້ານໂດລາສະຫະລັດ ຫຼື ເທົ່າກັບການນໍາເຂົ້າສິນຄ້າຈາກຕ່າງປະເທດໄດ້ພຽງແຕ່ບໍ່ເຖິງ 2 ເດືອນເທົ່ານັ້ນ. ໃນຂະນະທີ່ມາດຕະຖານສາກົນ ຈະຕ້ອງມີທຶນສໍາຮອງເງິນຕາຕ່າງປະເທດທີ່ສາມາດຮັບປະກັນການນໍາເຂົ້າສິນຄ້າຈາກຕ່າງປະເທດໄດ້ບໍ່ຕໍ່າກວ່າ 6 ເດືອນ ຈຶ່ງເຮັດໃຫ້ປະເທດລາວປະເຊີນກັບວິກິດການເສດຖະກິດຢ່າງຫຼີກລ່ຽງບໍ່ໄດ້.