ຫລາຍພັນຄົນຄາດວ່າ ຈະໄດ້ຮັບສັນຊາດອາເມຣິກັນ ໃນອາທິດຈະມານີ້ ຊຶ່ງ ເປັນຂີດໝາຍໃນການສະຫລອງວັນລັດຖະທຳມະນູນສະຫະລັດ ແລະວັນສັນຊາດ ໃນວັນເສົາມື້ນີ້.
ອົງການບໍລິການກ່ຽວກັບເລື້ອງສັນຊາດສະຫະລັດ ແລະກວດຄົນເຂົ້າເມືອງຂອງ ສະຫະ ລັດກ່າວວ່າ ຫຼາຍກວ່າ 38,000 ຄົນຢູ່ໃນທົ່ວປະເທດຈະໄດ້ຮັບສັນຊາດ ອາເມຣິກັນຢູ່ໃນ 240 ພິທີ ທີ່ເລີ້ມຂຶ້ນ ແຕ່ວັນທີ 16 ຫາ 23 ກັນຍາ ຫລາຍກວ່າໃນລະຍະໃດໆຂອງປີ 2016.
ພິທີຮັບສັນຊາດທີ່ໃຫຍ່ຜິດປົກກະຕິຈຳນວນນຶ່ງ ໄດ້ເລີ້ມຂື້ນໃນວັນສຸກວານນີ້ ແລະເພາະ ວ່າສະຫະລັດກຳລັງສະເຫລີມສະຫລອງວັນຄົບຮອບ 100 ປີຂອງການສ້າງຕັ້ງລະບົບ ສວນອຸທະຍານແຫ່ງຊາດ ແລະພິທີມອບສັນຊາດຫລາຍໆແຫ່ງຈຶ່ງຈັດຂຶ້ນຢູ່ໃນສວນອຸທະຍານແຫ່ງຊາດ.
ຫລາຍຮ້ອຍຄົນໄດ້ພາກັນສາບານໂຕຮັບສັນຊາດເປັນຊາວອາເມຣິກັນໃໝ່ໃນວັນສຸກວານນີ້ ຢູ່ທີ່ເກາະ Ellis ນະຄອນ New York ພ້ອມທັງຢູ່ ອະນຸສາວະລີ Lincoln ແລະ Jefferson ທີ່ນະຄອນຫລວງວໍຊິງຕັນ. ຢູ່ຕອນທ້າຍຂອງພິທີ ບັນດາຜູ້ພິພາກສາລັດຖະ ບານກາງໄດ້ນຳພາຜູ້ສະໝັກເຂົ້າເປັນສັນຊາດຍົກມຶືຂຶ້ນ ໃຫ້ຄຳສາບານໂຕ ເພື່ອໃຫ້ພວກເຂົາເຈົ້າກາຍມາເປັນ ພົນລະເມືອງສັນຊາດອາເມຣິກັນຢ່າງຖືກຕ້ອງຕາມກົດໝາຍ.
ພວກທີ່ປາດຖະໜາຢາກເປັນສັນຊາດອາເມຣິກັນ ຕ້ອງໄດ້ຜ່ານຂັ້ນຕອນດ້ານກົດໝາຍທີ່ຍືດຍາດ ແລະຫຍຸ້ງຍາກ ຊຶ່ງຜົນທີ່ອອກມານັ້ນຍັງບໍ່ເປັນທີ່ແນ່ນອນເທື່ອ.
ບັນດາຜູ້ສະໝັກຕ້ອງຍັງໄດ້ສະແດງເຖິງຄວາມຮູ້ພື້ນຖານ ກ່ຽວກັບປະຫວັດສາດອາເມຣິ ກັນ ແລະລັດຖະບານສະຫະລັດແລະລັດຖະທຳມະນູນເຮັດວຽກແບບໃດ ໂດຍຜ່່ານການຕອບຄຳຖາມ 100 ຂໍ້ ໃນສອບເສັງເອົາສັນຊາດ.
ວັນລັດຖະທຳມະນູນສະຫະລັດ ແລະວັນສັນຊາດສະຫະລັດ ຈັດຂຶ້ນໃນວັນເສົາມື້ນີ້ ສະຫລອງຄົບຮອບ 229 ປີ ໃນການລົງນາມໃນລັດຖະທຳມະນູນສະຫະລັດ ຢູ່ທີ່ນະຄອນ Philadelphia ເມື່ອປີ 1787.