ໄຕ້ຫວັນ ໄດ້ອອກແຈ້ງເຕືອນປະຊາຊົນຢູ່ເທິງພາກພື້ນດິນສຳລັບພາຍຸໄຕ້ຝຸ່ນ ຄອງ-ເຣ (Kong-rey) ໃນວັນພຸດມື້ນີ້ ຂະນະທີ່ພາຍຸຫົວນີ້ ສືບຕໍ່ເຄື່ອນຕົວ ຢູ່ເທິງເຂດນ້ຳທະເລ ໄປໃນທິດທາງຕາເວັນອອກສຽງໃຕ້ຂອງເກາະໄຕ້ຫວັນ ອີງຕາມລາຍງານຂອງອົງການຂ່າວເອພີ.
ຢູ່ໃນເຂດ ຄີຫລຸງ (Keelung) ຊາວປະມົງຖືກພົບວ່າ ພາກັນຜູກມັດເຮືອຫາປາ ຂອງພວກເຂົາເຈົ້າ ຢູ່ທີ່ທ່າເຮືອຫາປາ ປາ-ຕູ-ສູ (Pa-tou-tzu) ນຶ່ງມື້ກ່ອນທີ່ ພາຍຸໄຕ້ຝຸ່ນ ຈະພັດຂຶ້ນຝັ່ງ.
ພາຍຸໄຕ້ຝຸ່ນ ຄອງ-ເຣ ຫົວນີ້ ໄດ້ຖືກຕິດຕາມເບິ່ງຄັ້ງຫຼ້າສຸດ ຢູ່ທາງທິດຕາເວັນ ອອກຂອງແຂວງ ຄາກາຢານ (Cagayan) ກ້ຳເໜືອ ໄລຍະ 350 ກິໂລແມັດ, ໂດຍມີລົມພັດແຮງຢ່າງສະໝ່ຳສະເໝີເຖິງ 185 ກິໂລແມັດຕໍ່ຊົ່ວໂມງ ແລະແຮງຂຶ້ນເຖິງ 230 ກິໂລແມັດຕໍ່ຊົ່ວໂມງ.
ບັນດານັກພະຍາກອນອາກາດ ໄດ້ກ່າວວ່າ ພາຍຸດັ່ງກ່າວອາດເພີ້ມກຳລັງຂຶ້ນ ຕື່ມອີກ ຢູ່ທະເລ.
ມັນພັດໄປໃນທິດທາງຕາເວັນຕົກສຽງເໜືອ ແລະ ຄາດຄະເນວ່າ ຈະຜ່ານໄປ ໃກ້ເຂດເໜືອສຸດທີ່ ແຂວງ ບາຕາເນສ ຂອງຟີລິບປິນ ກ່ອນທີ່ຈະພັດຖະຫລົ່ມ ເຂົ້າໄປໃນເຂດພາກຕາເວັນອອກສຽງໃຕ້ຂອງໄຕ້ຫວັນ ໃນວັນພະຫັດມື້ອື່ນນີ້.
ໃນຂະນະດຽວກັນ ໜ່ວຍຍາມຝັ່ງຂອງໄຕ້ຫວັນ ໃນວັນອັງຄານວານນີ້ ໄດ້ຊ່ອຍ ກອບກູ້ພວກສະມາຊິກລູກເຮືອ 17 ຄົນ ຈາກກຳປັ່ນຂົນສົ່ງທີ່ໄດ້ຂຶ້ນທະບຽນ ເປັນຂອງຈີນ ຊື່ວ່າ ຢູ ຊູ ຈີ ຫາງ (Yu Zhou Qi Hang) ຫຼັງຈາກທີ່ກັບຕັນ ຂອງກຳປັ່ນ ໄດ້ສະຫຼະເຮືອ ເຊິ່ງໄດ້ສູນເສຍການຄວບຄຸມກຳປັ່ນ ຍ້ອນສະພາບ ອາກາດທີ່ຮ້າຍແຮງ ແລະມີການບັນທຸກສິນຄ້າຢ່າງຫຼວງຫຼາຍ.
ອີງຕາມໜ່ວຍຍາມຝັ່ງດັ່ງກ່າວ ກຳປັ່ນລຳນີ້ ເຊິ່ງໄດ້ເດີນທາງອອກຈາກເມືອງ ຄີຫລຸງ ໃນຕອນເຊົ້າວັນອັງຄານ ມຸ້ງໜ້າໄປຍັງ ເມືອງ ຊາງຊູ (Zhangzhou) ໃນແຂວງຟູຈຽນ ທາງພາກຕາເວັນອອກສຽງໃຕ້ຂອງຈີນ ນັ້ນ ໄດ້ຖືກພົບເຫັນ ເມື່ອສາມຊົ່ວໂມງຕໍ່ມາວ່າ ກຳປັ່ນຕາຍ ຢູ່ໃກ້ໆກັບແຫຼມ ເຢຫຼິວ (Cape Yehliu) ໃນພາກເໜືອຂອງເກາະໄຕ້ຫວັນ.
ກຳປັ່ນລຳນີ້ ໄດ້ບັນທຸກລົດຍົກໃຫຍ່ສາມຄັນ ແລະໄດ້ຮັບຜົນກະທົບຈາກລົມທີ່ ພັດແຮງຫຼາຍ ຂະນະທີ່ພາຍຸໄຕ້ຝຸ່ນ ຄອງ-ເຣ ພວມເຄື່ອນຕົວເຂົ້າມາ.
Taiwan issued a land warning for Typhoon Kong-rey on Wednesday as the storm continues on its path toward waters southeast of Taiwan.
In Keelung, fishermen were seen tightening boats at the Pa-tou-tzu fishing harbor a day before the typhoon making landfall.
Typhoon Kong-rey was last tracked 350 kilometers (217 miles) east of northern Cagayan province, with sustained winds of up to 185 kph (115 mph) and gusting up to 230 kph (143 mph).
Forecasters said it could further strengthen at sea.
It was blowing northwestward and was predicted to pass near the northernmost Philippine province of Batanes before slamming into southeastern Taiwan on Thursday.
Meanwhile, Taiwan coast guard on Tuesday has rescued 17 crew members from the China-registered cargo ship Yu Zhou Qi Hang after the captain abandoned the vessel, which had lost its ability to navigate due to severe weather and heavy loading.
According to Coast Guard , the ship which left Keelung early Tuesday for Zhangzhou in southeastern China's Fujian Province, was found stalled near Cape Yehliu in northern Taiwan three hours later.
The ship was carrying three gantry cranes and was affected by strong winds as Typhoon Kong-rey approaching.