ເຮືອບິນບັນທຸກສອງລຳຂອງທະຫານ ຣັດເຊຍ ໄດ້ລຳລຽງເຄື່ອງ ຊ່ວຍເຫຼືອດ້ານມະນຸດສະທຳ 80 ໂຕນເດີນທາງໄປຮອດ ຊີເຣຍ ເພື່ອຕິດຕັ້ງຄ້າຍທີ່ພັກໃຫ້ແກ່ຜູ້ອົບພະຍົບຫຼາຍກວ່າ 1000 ຄົນ, ໃນຂະນະທີ່ກຸ່ມຝ່າຍຄ້ານທີ່ສຳຄັນຂອງ ຊີເຣຍ ໄດ້ວິຈານນະຄອນຫຼວງ ມອສໂກ ວ່າເຂົ້າໄປມີບົດບາດທາງທະຫານຂອງ
ປະເທດ ອາຣັບ.
ໂຄສົກກະຊວງປ້ອງກັນປະເທດ ຣັດເຊຍ ພົນຕີ Igor Konashenkov ໄດ້ກ່າວໃນວັນເສົາວານນີ້ວ່າ ເຄື່ອງຊ່ວຍເຫຼືອ ດ້ານມະນຸດສະທຳລວມມີວັດຖຸສຳລັບການຕິດຕັ້ງຄ້າຍທີ່ພັກ.
ແນວໂຮມແຫ່ງຊາດຂອງ ຊີເຣຍ, ເປັນກຸ່ມເຄືອຂ່າຍໜຶ່ງທີ່ຕໍ່ສູ້ເພື່ອຂັບໄລ່ປະທານາທິບໍດີ Bashar al-Assad, ໄດ້ກ່າວປະນາມການຊ່ວຍເຫຼືອຂອງ ຣັດເຊຍ, ໂດຍອະທິບາຍວ່າມັນ ເປັນຄວາມປະພຶດແບບ ເປັນປໍລະປັກແລະ “ການແຊກແຊງທາງການທະຫານ” ໂດຍກົງ.
ເຈົ້າໜ້າທີ່ ສະຫະລັດ ຄົນໜຶ່ງໄດ້ກ່າວຕໍ່ ວີໂອເອ ໃນວັນສຸກທີ່ຜ່ານມາວ່າການຊ່ວຍເຫຼືອຂອງ ຣັດເຊຍ ເມື່ອບໍ່ດົນມານີ້ລວມມີທະຫານເຮືອ 200 ຄົນ ແລະ ເຮືອນທີ່ປະກອບເຂົ້າກັນໄດ້ ສຳລັບທະຫານຫຼາຍເຖິງ 1500 ຄົນ.
ເຈົ້າໜ້າທີ່ຄົນນັ້ນກ່າວວ່າ ວັດຖຸການຊ່ວຍເຫຼືອນັ້ນຍັງລວມມີ ປືນໃຫຍ່, ເຄື່ອງຄວບຄຸມລູກສອນໄຟນຳວິຖີໄລຍະສັ້ນ ແລະ ລົດຫຸ້ມເກາະປະມານສິບກວ່າຄັນນຳ.