ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ສືບຕໍ່ການຢ້ຽມຢາມ
Saudi Arabia ໃນວັນເສົາມື້ນີ້ ໂດຍການພົບປະກັບບັນດາພວກນັກການທູດອາຣັບ ຢູ່ໃນ
ເຂດອ່າວເປີເຊຍເພື່ອປຶກສາຫາລືຫາທາງຍຸຕິການປາບປາມການລຸກຮືຂຶ້ນຕໍ່ຕ້ານລັດຖະບານ
ຢູ່ໃນຊີເຣຍ.
ການພົບປະທີ່ວ່ານີ້ ແມ່ນການອາລຳພະບົດ ຫຼືການດຳເນີນການໃນເບື້ອງຕົ້ນ ສຳຫຼັບກອງ
ປະຊຸມເພື່ອນມິດຂອງຊີເຣຍ ຊຶ່ງຈະໄຂຂຶ້ນທີ່ນະຄອນອິສຕັນບູລ ໃນວັນອາທິດມື້ອື່ນ. ທ່ານ
ນາງ Clinton ພ້ອມໆກັບພວກນັກການທູດອື່ນໆຈາກປະເທດອາຣັບແລະປະເທດຕາເວັນ
ຕົກທີ່ໃຫ້ການສະໜັບສະໜຸນຕໍ່ກຸ່ມກະບົດຊີເຣຍມີໝາຍກຳນົດທີ່ຈະໄປຮ່ວມກອງປະຊຸມດັ່ງ
ກ່າວຢູ່ທີ່ເທີກີ. ສະຫະລັດຍັງສືບຕໍ່ຄັດຄ້ານ ຕໍ່ການປະກອບອາວຸດໃຫ້ແກ່ພວກກະບົດໃນຊີ
ເຣຍ ຊຶ່ງບາງປະເທດໃນເຂດອ່າວເປີເຊຍໄດ້ສະເໜີໄປນັ້ນ. ວໍຊິງຕັນໄດ້ດຳເນີນການເພື່ອ
ເຕົ້າໂຮມກຸ່ມຝ່າຍຄ້ານຕ່າງໆໃຫ້ເຂົ້າກັນແທນແລະຊອກຫາຊ່ອງທາງເພື່ອຈັດສົ່ງການຊ່ອຍ
ເຫຼືອ ທາງດ້ານມະນຸດສະທຳເຂົ້າໄປໃນຊີເຣຍ.
ການປະທະກັນຮອບໃໝ່ລະຫວ່າງພວກປະທ້ວງ ແລະກຳລັງຮັກສາຄວາມສະຫງົບໄດ້ລະ
ເບີດຂຶ້ນໃນທົ່ວປະເທດຊີເຣຍໃນວັນສຸກວານນີ້. ພວກກຸ່ມປົກປ້ອງສິດທິມະນຸດກ່າວວ່າ ມີ
11 ຄົນເສຍຊີວິດໃນການປະທະກັນດັ່ງກ່າວ.
ແຜນທີ່ສະແດງຈໍານວນຄົນຕາຍໃນເມືອງຕ່າງໆຂອງຊີເຣຍ:
ທ່ານ Kofi Annan ທູດພິເສດ
ຂອງອົງການສະຫະປະຊາຊາດ
ແລະສັນນິບາດອາຣັບໄດ້ຮຽກ
ຮ້ອງ ໃຫ້ລັດຖະບານຊີເຣຍຈັດ
ຕັ້ງປະຕິບັດການຢຸດຍິງໃນທັນ
ທີແລະຢຸດເຊົາການໂຈມຕີຕໍ່ກຸ່ມ
ຝ່າຍຄ້ານ. ໂຄສົກຂອງທ່ານ
Annan ກ່າວຕໍ່ພວກນັກຂ່າວ
ທີ່ນະຄອນເຈນີວາໃນມື້ວັນສຸກ
ວານນີ້ວ່າກຳນົດເສັ້ນຕາຍແມ່ນ
ເວລານີ້ໂລດສຳລັບປະທານາທິ
ບໍດີ Bashar al-Assad ຈັດ
ຕັ້ງປະຕິບັດ ແຜນການສັນຕິ
ພາບ 6 ຂໍ້ຊຶ່ງຮ່າງຂຶ້ນໂດຍອະ
ດີດຫົວໜ້າ ອົງການສະຫະປະຊາຊາດ. ທ່ານບໍ່ໄດ້ໃຫ້ລາຍລະອຽດຢ່າງເຈາະຈົງວ່າ ຈະມີ
ການເອົາມາດຕະການອັນໃດ ຖ້າທ່ານ Assad ຫາກບໍ່ຈັດຕັ້ງປະຕິບັດຂໍ້ ຕົກລົງທີ່ວ່ານີ້.
ບັນດາຜູ້ນຳຂອງປະເທດອາຣັບ ທີ່ກອງປະຊຸມສຸດຍອດຢູ່ນະຄອນຫຼວງແບັກແດັດໃນມື້ວັນ
ພະຫັດຜ່ານມາໄດ້ໃຫ້ການສະໜັບສະໜຸນຕໍ່ແຜນການສ້າງສັນຕິພາບໃນຊີເຣຍ ແລະຮຽກ
ຮ້ອງໃຫ້ມີການຈັດຕັ້ງປະຕິບັດແຜນການນີ້ໃນທັນທີ.
ທ່ານ Assad ໄດ້ຕົກລົງຮັບເອົາແຜນການດັ່ງກ່າວ ໃນມື້ວັນອັງຄານຜ່ານມາ ແຕ່ທະຫານ
ລັດຖະບານຊີເຣຍຍັງບໍ່ໄດ້ສະແດງຮ່ອງຮອຍໃຫ້ເຫັນ ກ່ຽວກັບການໃຊ້ຄວາມຢັບຢັ້ງ. ພວກ
ຝ່າຍຄ້ານກ່າວວ່າຕົນສົງໄສວ່າທ່ານ Assad ບໍ່ມີຄວາມຕັ້ງໃຈທີ່ຈະຢຸດເຊົາການປາບປາມ
ພວກປະທ້ວງແລະສວຍໃຊ້ຂໍ້ຕົກລົງສັນຕິພາບເປັນກົນລະຍຸດເພື່ອໜ່ວງເວລາ.
ອົງການສະຫະປະຊາຊາດກ່າວວ່າ ຄວາມຮຸນແຮງທີ່ພົວພັນກັບການປາບປາມການລຸກຮື
ຂຶ້ນໃນຊີເຣຍເຮັດໃຫ້ມີຜູ້ເສຍຊີວິດແລ້ວຫຼາຍກວ່າ 9,000 ຄົນ.