ການໃຊ້ສິດຍັບຍັ້ງໂດຍຣັດເຊຍແລະຈີນຕໍ່ຮ່າງຍັດຕິສະບັບນຶ່ງຂອງສະພາຄວາມໜັ້ນຄົງສະຫະປະຊາຊາດກ່ຽວກັບຊີເຣຍ ທີ່ປະນາມການປາບປາມຂອງປະທານາທິບໍດີ Bashar al-Assad ຕໍ່ປະຊາຊົນຂອງທ່ານແລະຮຽກຮ້ອງໃຫ້ທ່ານລາອອກຈາກຕໍາແໜ່ງນັ້ນ ໄດ້ຮັບຄວາມໂກດແຄ້ນຢ່າງຮ້າຍກາດຈາກທົ່ວໂລກ.
ທ່ານພັນກີມູນ ເລຂາທິການໃຫຍ່ສະຫະປະຊາຊາດໄດ້ປະນາມຄວາມລົ້ມແຫລວໃນການບໍ່ຮັບຜ່ານຮ່າງຍັດຕິສະບັບນີ້ ໂດຍກ່າວວ່າ ສະພາຄວາມໝັ້ນຄັງໄດ້ສູນເສຍໂອກາດໃນການເຄື່ອນໄຫວຮ່ວມກັນຄັ້ງນີ້ເພື່ອຊ່ອຍຍຸດຕິວິກິດການດັ່ງກ່າວ. 13 ປະເທດສະມາຊິກອື່ນໆຂອງສະພາຄວາມໜັ້ນຄົງເຫັນດີນໍາຮ່າງຍັດຕິດັ່ງກ່າວ ຮວມທັງສະຫະລັດ ຝຣັ່ງ ແລະເຢຍຣະມັນ.
ນາຍົກລັດຖະມົນຕີຕູນີເຊຍກ່າວໃນວັນອາທິດມື້ນີ້ວ່າ ປະເທດຂອງທ່ານຈະຕັດສາຍພົວພັນກັບຊີເຣຍ. ທ່ານ Hamadi Jebali ກ່າວວ່າ ຕູນີເຊຍເນລະເທດເອກອັກຄະລັດຖະທູດຊີເຣຍປະຈໍາປະເທດຂອງຕົນ ແລະທ່ານຮຽກຮ້ອງໄປຍັງພວກປະເທດອາຣັບອື່ນໆໃຫ້ດໍາເນີນການໃນທໍານອງດຽວກັນ.
ຫລັງຈາກສະພາຄວາມໝັ້ນຄົງລົງມະຕິກັນໃນວັນເສົາວານນີ້ແລ້ວ ທ່ານນາງ Susan Rice ໄດ້ສະແດງຄວາມຜິດຫວັງຂອງກຸງວໍຊິງຕັນອອກມາ ກ່ຽວກັບການໃຊ້ສິດຍັບຍັ້ງຂອງຣັດເຊຍແລະຈີນ. ເຖິງຢ່າງໃດກໍດີທ່ານນາງກ່າວຕໍ່ໄປວ່າ ສະຫະລັດຈະບໍ່ຍິນຍອມກ່ຽວກັບເລື້ອງຊີເຣຍນີ້.
ເອກອັກຄະລັດຖະທູດອັງກິດປະຈໍາສະຫະປະຊາຊາດ ທ່ານ Mark Lyall Grant ກ່າວວ່າ ຣັດເຊຍແລະຈີນໄດ້ຫັນຫລັງໃສ່ໂລກອາຣັບ ໂດຍສະໜັບສະໜຸນລະບົບຜະເດັດການ.
ທ່ານ Bashar Ja’afari ເອກອັກຄະລັດຖະທູດຊີເຣຍປະຈໍາສະຫະປະຊາຊາດກ່າວຫາພວກສະມາຊິກຂອງສະຫະປະຊາຊາດວ່າໃຫ້ການສະໜັບສະໜຸນອັນທີ່ທ່ານເອີ້ນວ່າ ‘ພວກກໍ່ການຮ້າຍປະກອບອາວຸດນັ້ນ”.
ຣັດເຊຍກ່າວປ້ອງກັນການຕັດສິນໃຈຂອງຕົນວ່າ ພວກສະມາຊິກສະພາຄວາມໝັ້ນຄົງໄດ້ບ່ອນທໍາລາຍໂອກາດເພື່ອການແກ້ໄຂບັນຫາທາງດ້ານການເມືອງໂດຍຮຽກຮ້ອງໃຫ້ມີການປ່ຽນແປງອໍານາດປົກຄອງ ແລະຊຸກຍູ້ໃຫ້ພວກຝ້າຍຄ້ານຂຶ້ນກໍາອໍານາດ.
ເອກອັກຄະລັດຖະທູດຈີນ ທ່ານ Wang Min ສະໜັບສະໜຸນທ່າທີຂອງກຸງມອສກູ ກ່ຽວກັບຮ່າງຍັດຕິດັ່ງກ່າວ ແລະຮຽກຮ້ອງໃຫ້ທໍາການໂອ້ລົມສົນທະນາກັນອີກກ່ຽວກັບພາກສ່ວນທີ່ແຕກແຍກກັນຢູໃນຮ່າງຍັດຕິນັ້ນ.
ເບິ່ງວີດີໂອລາຍງານພາສາອັງກິດ ເລື່ອງສະຫະລັດວ່າຊີເຣຍຫັນໄປຫາອິຣ໋ານ
ເພື່ອໃຫ້ຊ່ວຍຕົນຮັກສາອໍານາດໄວ້ ທ່າມກາງຄວາມກົດດັນຈາກນາໆຊາດ: