ກຸ່ມປົກປ້ອງສິດທິມະນຸດຊີເຣຍກຸ່ມນຶ່ງກ່າວວ່າ ພວກກໍາລັງຮັກສາຄວາມປອດໄພໄດ້ເປີດສາກຍິງໃສ່ປະຊາຊົນໃນລະຫວ່າງພິທີສົ່ງສະການແຫ່ງຕ່າງໆສໍາລັບພວກປະທ້ວງດ້ານການເມືອງທີ່ໄດ້ເສຍຊີວິດໄປ ເຮັດໃຫ້ປະຊາຊົນເສຍຊີວິດໄປ 2 ຄົນ.
ກຸ່ມປົກປ້ອງສິດທິມະນຸດ Observatory ຂອງຊີເຣຍ ກ່າວວ່າ ປະຊາຊົນ 2 ຄົນນີ້ໄດ້ຖືກຍິງຕາຍໃນວັນເສົາວານນີ້ໃນເມືອງ al-Kaswaໃນພາກໃຕ້ຂອງນະຄອນຫລວງກຸງ Damascus ນັ້ນ.
ກຸ່ມປົກປ້ອງສິດທິມະນຸດດັ່ງກ່າວເວົ້າຕື່ມວ່າ ພວກກໍາລັງຮັກສາຄວາມປອດໄພໄດ້ເລີ້ມຍິງໃສ່ປະຊາຊົນເວລາການສົ່ງສະການໄດ້ຫັນປ່ຽນເປັນການປະທ້ວງນັ້ນ.
ໂຄສົກຂອງກຸ່ມປົກປ້ອງສິດທິມະນຸດ Observatory ຂອງຊີເຣຍ ກ່າວວ່າການສົ່ງສະການໃນວັນເສົາວານນີ້ ແມ່ນມີຂຶ້ນສໍາລັບພວກປະທ້ວງຕໍ່ຕ້ານລັດຖະບານທີ່ໄດ້ເສຍຊີວິດໄປໃນວັນສຸກຜ່ານມານີ້ ເວລາພວກກໍາລັງຮັກສາຄວາມປອດໄພຂອງລັດຖະບານຊີເຣຍເປີດສາກຍິງໃສ່ພວກເຂົາເຈົ້າ ຊຶ່ງຍັງຜົນເຮັດໃຫ້ປະຊາຊົນຢ່າງໜ້ອຍ 20 ຄົນເສຍຊີວິດ ຮວມທັງເດັກນ້ອຍ 2 ຄົນນໍາ. ໂຄສົກທ່ານນີ້ກ່າວຕໍ່ໄປວ່າ ພວກທີ່ເສຍຊີວິດເຫລົ່ານີ້ສ່ວນຫລາຍແມ່ນເກີດຂຶ້ນໃນຕົວເມືອງຫລືໃນເຂດອ້ອມແອ້ມນະຄອນຫລວງ Damascus ນັ້ນ.
ພວກປະທ້ວງຕໍ່ຕ້ານປະທານາທິບໍດີ Bashar al-Assad ແຫ່ງຊີເຣຍ ໄດ້ຖືກກໍາລັງທີ່ນິຍົມລັດຖະບານໂຈມຕີມາໄດ້ດົນກວ່າ 100 ມື້ແລ້ວ.
ປະຊາຊົນຊີເຣຍຫລາຍພັນຄົນພາກັນຫລົບໜີເຂົ້າໄປອາໄສຢູ່ໃນເລບານອນແລະເຕີກກີເພື່ອຫລົບໜີຈາກຄວາມຮຸນແຮງທີ່ກໍາລັງເພີ່ມຂຶ້ນນັບມື້ໃນບ້ານເກີດເມືອງນອນຂອງເຂົາເຈົ້ານັ້ນ.