ກຸ່ມຝ່າຍຄ້ານໃນຊີເຣຍລາຍງານວ່າ ໄດ້ມີການກໍ່ຄວາມຮຸນແຮງຂຶ້ນໃໝ່ ຢູ່ໃນຫລາຍເຂດຂອງ
ຊີເຣຍ ໃນວັນສຸກນີ້ ຊຶ່ງເປັນເວລາບໍ່ຮອດນຶ່ງອາທິດດ້ວຍຊໍ້າ ກ່ອນການຢຸດຍິງທີ່ໄດ້ຮັບການ
ໜຸນຫລັງຈາກສະຫະປະຊາຊາດ ຈະມີຜົນປະຕິ ບັດ.
ກຸ່ມສັງເກດການສິດທິມະນຸດຂອງຊີເຣຍ ບອກກັບວີໂອເອວ່າ ທະຫານຂອງລັດຖະບານໄດ້
ຕໍ່ສູ້ກັບກໍາລັງຂອງຝ່າຍກະບົດ ຢູ່ໃນຫລາຍເຂດຂອງຊານເມືອງຫລວງດາມັສກັສ ແລະວ່າ
ທະຫານຂອງຝ່າຍກອງທັບຕາຍ 3 ຄົນ. ໄດ້ເກີດການປະທະກັນເຊ່ນກັນຢູ່ໃນເຂດເມືອງໂຮມສ໌
ທາງພາກກາງຂອງປະເທດ ຫລັງຈາກທີ່ກຸ່ມປະກອບອາວຸດທີ່ຈົ່ງຮັກພັກດີຕໍ່ຝ່າຍລັດຖະບານ
ເປີດສາກຍິງປືນໃສ່ແມ່ຍິງກຸ່ມນຶ່ງ ເຮັດໃຫ້ 2 ຄົນເສຍຊີວິດ ແລະ 4 ຄົນໄດ້ຮັບບາດເຈັບ.
ໃນວັນພະຫັດວານນີ້ ເລຂາທິການໃຫຍ່ສະຫະປະຊາຊາດ ທ່ານ ພັນ ກີ ມູນ ກ່າວເຕືອນວ່າ ການຄັດແຍ້ງກັນໃນຊີເຣຍນັ້ນກໍາລັງຮ້າຍແຮງຂຶ້ນນັບມື້ ແລະການໂຈມຕີຂອງຝ່າຍລັດຖະບານ ຕໍ່ເຂດຢູ່ອາໃສຂອງພົນລະເຮືອນກໍບໍ່ມີຮ່ອງ ຮອບວ່າ ຈະລົດນ້ອຍລົງ ເຖິງແມ່ນໄດ້ມີການຮັບຮອງວ່າ ລັດຖະບານໄດ້ຖອນ ທະຫານອອກໄປຈາກເມືອງໃຫຍ່ໆຫລາຍເມືອງແລ້ວກໍຕາມ.
http://www.voanews.com/templates/widgetDisplay.html?id=146411435&player=article
ທ່ານພັນ ກີ ມູນ ກ່າວຕໍ່ສະມັດຊາໃຫຍ່ວ່າ ຫົວເມືອງແລະໝູ່ບ້ານຕ່າງໆຂອງ ຊີເຣຍໄດ້ຖືກຫັນປ່ຽນໄປເປັນເຂດສົງຄາມໝົດແລ້ວ ແລະທ່ານຮຽກຮ້ອງໃຫ້ປະທານາທິບໍດີ Bashar al-Assad ສະແດງໃຫ້ເຫັນເຖິງ ການນໍາພາແລະວິໄສທັດ ແລະໃຫ້ປະຕິບັດຕາມຄໍາໝັ້ນສັນຍາ ທີ່ວ່າ ຈະຍຸດຕິຄວາມຮຸນແຮງລົງ ພາຍໃນວັນທີ 10 ເມສານີ້ນັ້ນ.
ໃນວັນພະຫັດວານນີ້ ກ່ອນໜ້ານັ້ນ ສະພາຄວາມໝັ້ນຄົງ ຊຶ່ງໂຮມທັງຣັດເຊຍ ແລະຈີນ ໄດ້ຮັບຜ່ານຄໍາຖະແຫລງສະບັບນຶ່ງຂອງປະທານສະພາ ຮຽກຮ້ອງໃຫ້ ຊີເຣຍເອົາບາດກ້າວຢ່າງເປັນຮູບປະທໍາແລະຮີບດ່ວນ ເພື່ອຍຸດຕິຄວາມຮຸນແຮງທຸກຢ່າງ ພາຍໃນວັນກໍາໜົດເສ້ນຕາຍຂອງການຢຸດຍິງ.