ລັດຖະມົນຕີການຕ່າງປະເທດເທີກີ ທໍາການຢ້ຽມຢາມຊິເຣຍໃນວັນອັງຄານມື້ນີ້ ເພື່ອກົດດັນ
ໃຫ້ຊີເຣຍ ຍຸດເຊົາການປະຫັດປະຫານເຂັ່ນຂ້າພວກປະທ້ວງຂອງຝ່າຍຄ້ານ.
ການເດີນທາງຂອງທ່ານ Ahmet Davutoglu ໄປຍັງຊີເຣຍ ໄດ້ມີຂຶ້ນຫລັງຈາກທີ່ເທີກີ
ໄດ້ກ່າວວ່າ ຕົນແມ່ນໄດ້ໝົດຄວາມອົດທົນໃຈເຢັນກັບຊີເຣຍປະເທດເພື່ອນບ້ານນັ້ນແລ້ວ
ແລະກໍຕິດຕາມມາຫຼັງຈາກຫລາຍປະເທດອາຣັບໃນເຂດອ່າວເປີເຊຍ ຄື Saudi Arabia,
Kuwait, ແລະ Bahrain ໄດ້ຮຽກໂຕເອກອັກຄະ ລັດຖະທູດຂອງຕົນ ຄືນຈາກຊີເຣຍ.
ນາຍົກລັດຖະມົນຕີເທີກີ ທ່ານ Recep Tayyip Erdogan ໄດ້ກ່າວວ່າ ທ່ານ
Davutoglu ຈະສົ່ງສານທີ່ເດັດຂາດ ໃຫ້ຄະນະນໍາພາຂອງຊີເຣຍ.
ປະທານາທິບໍດີຊີເຣຍ ທ່ານ Bashar al-Assad ກໍາລັງປະເຊີນກັບຄວາມກົດດັນເພີ່ມຂຶ້ນ
ຈາກນາໆຊາດ ໃຫ້ຢຸດເຊົາການປະຕິບັດງານທາງທະຫານ ເພື່ອປາບປາມພວກປະທ້ວງນັ້ນ.
ພວກບັກເຄື່ອນໄຫວເພື່ອສິດທິມະນຸດ ກ່າວວ່າ ກອງກໍາລັງຂອງຊິເຣຍທີ່ໜູນຫຼັງໂດຍລັດຖັງ ໄດ້ສັງຫານປະຊາຊົນຫຼາຍຮ້ອຍຄົນ ທີ່ເມືອງຮາມາ ທາງພາກກາງ ຂອງປະເທດ ແລະເມືອງ
Deir el-Zour ທາງພາກຕະເວັນອອກ ແລະເຂດອື່ນໆອີກ ໃນສອງສາມມື້ຜ່ານມານີ້.
ສ່ວນໂຄສົກຂອງກະຊວງການຕ່າງປະເທດສະຫະລັດ ທ່ານ Mark Toner ກ່າວວ່າ ທາງ
ວໍຊິງຕັນ ຮູ້ສຶກມີກໍາລັງໃຈທີ່ບັນດາປະເທດອາຣັບໄດ້ເອົາທ່າຢືນທີ່ແຂງກະດ້າງຂຶ້ນ ຕໍ່ຊິເຣຍ
ນັ້ນ ແລະເຫັນວ່າ ມັນເປັນຮ່ອງຮອຍທີ່ສະແດງໃຫ້ເຫັນຕື່ມເຖິງການປະນາມຂອງປະຊາຄົມ
ນາໆຊາດ ຕໍ່ການກະທໍາຕ່າງໆຂອງທ່ານ Assad ນັ້ນ.