ສະຫະລັດໄດ້ກ່າວຫາຊີເຣຍ ວ່າຈັດແຈງໃຫ້ມີການປະທ້ວງໂດຍຝຸງຊົນທີ່ໂມໂຫໂກດແຄ້ນ ເປັນເວລາສອງມື້ ຢູ່ນອກສະຖານທູດສະຫະລັດໃນນະຄອນຫລວງດາມັສກັສຂອງຊີເຣຍ ເພື່ອປະທ້ວງເອກອັກຄະລັດຖະທູດສະຫະລັດ ທ່ານ Robert Ford ທີ່ໄດ້ໄປຢ້ຽມຢາມ ເມືອງ Hama ຂອງຝ່າຍຕໍ່ຕ້ານລັດຖະບານ ທີ່ຖືກກໍາລັງຂອງລັດຖະບານອ້ອມໄວ້ນັ້ນ. ສ່ວນປະເທດຝຣັ່ງ ກໍໄດ້ອອກມາຈົ່ມທຸກທໍານອງດຽວກັນເມື່ອວັນອາທິດວານນີ້ ຫລັງຈາກຝຸງຊົນ ທີ່ນິຍົມລັດຖະບານຈຸນຶ່ງ ໄດ້ທໍາລາຍສະຖານທູດຂອງຕົນຫລາຍແຫ່ງໃນ ຊີເຣຍນັ້ນ.
ເຈົ້າໜ້າທີ່ອາວຸໂສຂອງກະຊວງຕ່າງປະເທດສະຫະລັດທ່ານນຶ່ງກ່າວວ່າພວກ ປະທ້ວງໄດ້ ທວງໃຫ້ເອກອັກຄະລັດຖະທູດ ຝອດ ອອກຈາກຊີເຣຍໄປ ພ້ອມ ກັບພາກັນຂວ່າງອາຫານ ແກ້ວ ແລະກ້ອນຫິນໃສ່ຕຶກສະຖານທູດສະຫະລັດ. ເຈົ້າໜ້າທີ່ທ່ານນີ້ກ່າວອີກວ່າ ທ່ານ ຝອດໄດ້ແຈ້ງລັດຖະມົນຕີຕ່າງປະເທດ ຂອງຊີເຣຍ ຊາບເຖິງຄວາມບໍ່ພໍໃຈຂອງວໍຊິງຕັນກ່ຽວກັບເຫດການດັ່ງກ່າວ ຊຶ່ງໄດ້ຍຸຕິລົງໃນຕອນແລງວັນເສົານັ້ນ ໃນການພົບປະກັນທີ່ຮ້ອງຂໍ ໂດຍສະຫະລັດ ແລະກໍານົດໄວ້ລ່ວງໜ້າແລ້ວນັ້ນ.
ສ່ວນຢູ່ທີ່ນະຄອນຫລວງປາຣີ ຝຣັ່ງກໍໄດ້ຮຽກໂຕເອກອັກຄະລັດຖະທູດຊີເຣຍ ເຂົ້າພົບ ເພື່ອ ຮ້ອງທຸກກ່ຽວກັບການສ້າງຄວາມເສຍຫາຍ ຕໍ່ສະຖານທູດຝຣັ່ງ ຢູ່ນະຄອນຫລວງດາມັສກັສ ແລະສະຖານກົງສຸນຂອງຕົນຢູ່ເມືອງ Aleppo ຊຶ່ງເປັນເມືອງໃຫຍ່ອັນດັບສອງຂອງຊີເຣຍ ໃນລະຫວ່າງການປະທ້ວງທໍາ ນອງດຽວກັນນັ້ນ.
ເອກອັກຄະລັດຖະທູດຝອດ ແລະເອກອັກຄະລັດຖະທູດຝຣັ່ງ ທ່ານ Eric Chevallier ໄດ້ເດີນທາງໄປຍັງເມືອງ Hama ໃນວັນພະຫັດ ແລະວັນ ສຸກຜ່ານມາ ເພື່ອສະແດງຄວາມເປັນເອກະພາບກັບພວກຊາວເມືອງດັ່ງກ່າວ ທີ່ຖືກໂຈມຕີໂດຍກໍາລັງຂອງລັດຖະບານ ໃນຂະ ນະທີ່ພວກເຂົາເຈົ້າກໍາລັງທໍາ ການເດີນຂະບວນປະທ້ວງຄັ້ງໃຫຍ່ທີ່ສຸດເທົ່າເຖິງ ປັດຈຸບັນນີ້ ເພື່ອຕໍ່ຕ້ານປະທານາທິບໍດີ Bashar al-Assad ຂອງຊີເຣຍນັ້ນ.
ການໄປຢ້ຽມຂອງທັງສອງທ່ານນີ້ ໄດ້ຖືກຕີຄວາມໝາຍວ່າ ເປັນການຕັກເຕືອນດ້ານການ ທູດຢ່າງໜັກແໜ້ນຕໍ່ລັດຖະບານຊີເຣຍ ວ່າບໍ່ໃຫ້ກໍ່ຄວາມຮຸນແຮງເພີ່ມຂຶ້ນຢູ່ໃນເມືອງທີ່ຕັ້ງ ຢູ່ທາງພາກກາງຂອງປະເທດ ທີ່ປີດລ້ອມ ດ້ວຍລົດຖັງ ມາເປັນເວລານຶ່ງອາທິດແລ້ວນັ້ນ.
ກ່ອນໜ້ານີ້ ລັດຖະມົນຕີຕ່າງປະເທດຊີເຣຍກ່າວວ່າ ຕົນໄດ້ຮຽກຕົວທູດສອງທ່ານ ນັ້ນມາ ເພື່ອປະທ້ວງການເດີນທາງໄປຢ້ຽມຢາມທີ່ໝັ້ນຂອງພວກຝ່າຍຄ້ານດັ່ງກ່າວ ຊຶ່ງລັດຖະມົນ ຕີຕ່າງປະເທດຊີເຣຍເອີ້ນການໄປຢ້ຽມຢາມຄັ້ງນີ້ວ່າ ເປັນການແຊກແຊງຢ່າງໂຈ່ງແຈ້ງເປີດແປນ ເຂົ້າໃນກິດຈະກໍາພາຍໃນຂອງ ຊີເຣຍ ໂດຍມີເປົ້າໝາຍເພື່ອບ່ອນທໍາລາຍສະຖຽນ ລະພາບຂອງຊີເຣຍນັ້ນ.