ທໍານຽບຂາວກ່າວວ່າ ປະທານາທິບໍດີ ບາຣັກ ໂອບາມາ ກໍາລັງສຶກສາເບິ່ງວ່າຈະສະໜອງ
ໃຫ້ພວກກະບົດຊີເຣຍ ສິ່ງທີ່ວໍຊິງຕັນເອີ້ນວ່າ ການຊ່ວຍເຫລືອປະເພດທີ່ບໍ່ແມ່ນອາວຸດ
ໃນການຕໍ່ສູ້ຂອງພວກເຂົາເຈົ້າເພື່ອໂຄ່ນລົ້ມປະທານາທິບໍດີ Bashar al-Assad ນັ້ນຫລືບໍ່.
ທ່ານ ໂອບາມາ ໄດ້ພົບປະກັບທ່ານ Recep Tayyip Erdogan ນາຍົກ ລັດຖະມົນຕີ
ເທີກີ ເມື່ອວັນອາທິດມື້ນີ້ ທີ່ນະຄອນຫລວງໂຊລ ເກົາຫລີໃຕ້ ບ່ອນທີ່ຜູ້ນໍາທັງສອງຈະເຂົ້າ
ຮ່ວມກອງປະຊຸມສຸດຍອດວ່າດ້ວຍຄວາມໝັ້ນຄົງດ້ານນີວເຄລຍນັ້ນ.
ເຈົ້າໜ້າທີ່ທໍານຽບຂາວທ່ານນຶ່ງກ່າວວ່າ ສະຫະລັດຕ້ອງການຊ່ວຍເຫລືອ ພວກກະບົດຊີ
ເຣຍດ້ວຍສະບຽງຢູກຢາ ແລະອຸບປະກອນການສື່ສານ ແລະ ທ່ານກ່າວວ່າການປຶກສາຫາ
ລືກັນບໍ່ໄດ້ລວມເອົາການປະກອບອາວຸດໃຫ້ແກ່ພວກກະບົດແຕ່ຢ່າງໃດ.
ເຈົ້າໜ້າທີ່ທ່ານນີ້ກ່າວອກີວ່າ ສະຫະລັດຈະຍົກເອົາເລຶ່ອງການຊ່ວຍເຫລືອທີ່ບໍ່ແມ່ນອາວຸດ
ນັ້ນ ຂຶ້ນມາປຶກສາກັນຢູ່ທີ່ກອງປະຊຸມຂອງກຸ່ມເພື່ອນມິດຂອງຊີເຣຍ ທີ່ປະເທດເທີກີ ໃນ
ວັນທີ່ 1 ເດືອນເມສານີ້ ຊຶ່ງທ່ານນາງລັດຖະມົນຕີຕ່າງປະເທດຄລິນຕັນມີແຜນການຈະໄປ
ຮ່ວມປະຊຸມນໍານັ້ນ.
ໃນຂະນະດຽວກັນນີ້ ທ່ານ ໂຄຟີ ອັນນັນ ທູດພິເສດຂອງສະຫະປະຊາ ຊາດແລະສັນນິ
ບາດຊາດອາຫຣັບ ກໍາລັງຢູ່ທີ່ມົສກູ ເພື່ອພະຍາຍາມເກ້ຍ ກ່ອມຣັດເຊຍໃຫ້ສະໜັບສະໜຸນ
ຄໍາຮຽກຮ້ອງຂອງນານາຊາດ ໃຫ້ມີການຢຸດຍິງ ແລະການເຈລະຈາກັນ ໃນຊີເຣຍ.
ທັງຣັດເຊຍແລະຈີນ ໄດ້ໃຊ້ສິດຍັບຍັ້ງມະຕິຕໍ່ຕ້ານຊີເຣຍຂອງສະພາຄວາມໝັ້ນຄົງອົງການ
ສະຫະປະຊາຊາດ ໂດຍກ່າວວ່າການປະຕິບັດເຊັ່ນນັ້ນຖືວ່າເປັນການແຊກແຊງກິດຈະການ
ພາຍໃນປະເທດຂອງຊີເຣຍ ແຕ່ເມື່ອອາທິດຜ່ານມານີ້ ທັງຣັດເຊຍແລະຈີນກໍໄດ້ສະໜັບສະ
ໜຸນຖະແຫລງການສະບັບນຶ່ງຂອງສະພາຄວາມໝັ້ນຄົງ ທີ່ຮັບຮອງເອົາແຜນການສັນຕິ
ພາບຂອງທ່ານອັນນັນ.