ເປັນເວລາ 7 ປີ ລຸນຫຼັງໄຟໄໝ້ຕຶກອາຄານສູງໃນນະຄອນຫຼວງລອນດອນ ທີ່ໄດ້ເຮັດໃຫ້ມີຜູ້ເສຍຊີວິດ 72 ຄົນ, ການສອບຖາມຜູ້ຄົນໃນສັງຄົມຢ່າງລະອຽດ ແມ່ນມີກໍານົດທີ່ຈະຖືກລາຍງານ ກ່ຽວກັບການລະເລີຍ ແລະຄວາມຜິດພາດ ອັນໄດ້ເຮັດໃຫ້ໄຟນ້ອຍໆໃນເຮືອນຄົວຂອງອາພາດທ໌ເມັນຫ້ອງນຶ່ງ ກາຍມາເປັນເຫດການໄຟໄໝ້ທີ່ຮ້າຍແຮງທີ່ສຸດໃນແຜ່ນດິນຂອງອັງກິດ ນັບຕັ້ງແຕ່ສົງຄາມໂລກຄັ້ງທີສອງ.
ປະທານການສືບສວນສອບສວນ ທ່ານ ມາຕິນ ມົວ-ບິກ (Martin Moore-Bick), ຜູ້ພິພາກສາທີ່ກິນບໍານານແລ້ວ, ກໍາລັງລາຍງານຜົນການຄົ້ນພົບໃນວັນພຸດມື້ນີ້ ຈາກການສືບສວນມາເປັນເວລາ 6 ປີ ທີ່ກວດເບິ່ງວ່າ ຂໍ້ຜິດພາດຂອງການກໍ່ສ້າງເປັນແນວໃດ, ການບັງຄັບໃຊ້ມາດຕະຖານຄວາມປອດໄພ ແລະຄວາມຜິດພາດຂອງເຈົ້າຫນ້າທີ່ສຸກເສີນ ມີສ່ວນເຮັດໃຫ້ຈໍານວນຜູ້ເສຍຊີວິດທີ່ໜ້າຕົກໃຈໂດຍລວມໃນເຫດການໄຟໄໝ້ອາຄານສູງ ເກຣັນເຟລ ທາວເວີ (Grenfell Tower) ເປັນແນວໃດ.
ບົດລາຍງານສຸດທ້າຍ ອາດຈະເຮັດໃຫ້ຜູ້ລອດຊີວິດຈໍານວນນຶ່ງໄດ້ຮັບຄໍາຕອບທີ່ພວກເຂົາເຈົ້າຊອກຫາມາດົນນານ, ເຖິງແມ່ນວ່າ ບໍ່ແມ່ນການດໍາເນີນຄະດີສໍາລັບຜູ້ທີ່ຮັບຜິດຊອບ. ເຖິງແມ່ນຈະບໍ່ມີການກ່າວຫາທາງອາຍາຕໍ່ບັນດາຜູ້ຮັບຜິດຊອບເຫຼົ່ານັ້ນກໍຕາມ ຂໍ້ກ່າວຫາທາງອາຍາກໍຈະຖືກໂຈະໄວ້ ຈົນກວ່າການສອບສວນຈະໄດ້ຮັບຜົນສະຫຼຸບ.
ນາງ ຊານດຣາ ຣູອິສ (Sandra Ruiz), ຜູ້ທີ່ມີຫຼານສາວອາຍຸ 12 ປີ ນາງ ເຈັສຊິກ້າ ເອີບາໂນ ຣາມີເຣສ (Jessica Urbano Ramirez), ທີ່ເສຍຊີວິດໃນເຫດການໄຟໄໝ້ດັ່ງກ່າວນັ້ນ ເວົ້າວ່າ “ສໍາລັບຂ້ອຍແລ້ວ, ມັນຈະບໍ່ມີຄວາມຍຸຕິທໍາເລີຍ ຖ້າບໍ່ມີຄົນເຂົ້າໄປຢູ່ໃນຄຸກ.”