ທ່ານ Salva Kiir ປະທານາທິບໍດີ ຊູດານໃຕ້ ໄດ້ຕັດການເດີນທາງໄປຢ້ຽມຈີນໃຫ້ສັ້ນລົງ ເນຶ່ອງຈາກໃນສິ່ງທີ່ຈີນເອີ້ນວ່າ ເປັນບັນຫາພາຍໃນປະເທດນັ້ນ.
ທ່ານ Kiir ມີແຜນການຈະຢູ່ໃນປະເທດຈີນໄປຈົນຮອດວັນເສົານີ້. ເມື່ອວັນພຸດມື້ນີ້ ທ່ານໄດ້ພົບປະກັບທ່ານ Wu Gangguo ປະທານສະພາ ປະຊາຊົນແຫ່ງຊາດ ຜູ້ທີ່ເວົ້າວ່າມັນໜ້າເສຍໃຈວ່າ ຜູ້ນໍາຊູດານໃຕ້ ຈະອອກຈາກຈີນ ແລະຍົກເລີກການໄປຢ້ຽມຢາມນະຄອນ Shanghai
ຍັງບໍ່ເປັນທີ່ແຈ້ງຂາວເທື່ອວ່າ ເມື່ອໃດທ່ານ Kiir ຈະເດີນທາງອອກຈາກຈີນ. ທ່ານ Kiir ໄດ້ເຈລະຈາກັບປະທານປະເທດຈີນ ທ່ານຫູ ຈີນເຖົາ ແລະກ່າວວ່າ ການຖິ້ມລະເບີດໃສ່ດິນແດນຂອງຊູດານໃຕ້ນັ້ນ ແມ່ນຮຸນແຮງພໍທໍ່ກັນກັບເປັນການປະກາດສົງຄາມຕໍ່ປະເທດຂອງທ່ານ.
ຈີນໄດ້ຮຽກຮ້ອງໃຫ້ທັງສອງຝ່າຍຈົ່ງຫາທາງຕົກລົງກັນໃນບັນຫາຕ່າງໆຂອງພວກເຂົາເຈົ້າພາຍໃຕ້ການເຈລະຈາຕໍ່ຮອງກັນຢ່າງສັນຕິວິທີ ແລະກ່າວໃນວັນພຸດມື້ນີ້ວ່າ ຈີນຈະສົ່ງທູດພິເສດຄົນນຶ່ງໄປຍັງຂົງເຂດເພື່ອຊຸກຍູ້ໃຫ້ມີການເຈລະຈາກັນ. ໃນວັນອັງຄານວານນີ້ ສະພາຄວາມໝັ້ນຄົງອົງການສະຫະປະຊາຊາດໄດ້ ຮຽກຮ້ອງໃຫ້ມີການຢຸດຍິງໃນທັນທີ ລະຫວ່າງຊູດານແລະຊູດານໃຕ້.
ທ່ານນາງ Susan Rice ເອກອັກຄະລັດຖະທູດສະຫະລັດປະຈໍາອົງການສະຫະປະຊາຊາດ ກ່າວວ່າ ບັນດາເຈົ້າໜ້າທີ່ສະຫະປະຊາຊາດ ໄດ້ລາຍງານໂດຍສັງເຂບຕໍ່ສະພາຄວາມໝັ້ນຄົງ ທີ່ໃຫ້ຂໍ້ສັງເກດວ່າ ການຖອນກໍາ ລັງທະຫານຊູດານໃຕ້ ອອກຈາກເມືອງບໍ່ນໍ້າມັນ Heglig ນັ້ນ ແມ່ນໃຫ້ກໍາລັງໃຈຂຶ້ນມາໜ້ອຍນຶ່ງໃນເບື້ອງຕົ້ນ ແຕ່ກໍຍັງຜົນໃຫ້ມີ ການຖິ້ມລະເບີດໂຈມຕີເພີ່ມຂຶ້ນໂດຍຝ່າຍຊູດານ.