ບໍລິສັດ ສເປສ ແອັກສ໌ (SpaceX) ຂອງມະຫາເສດຖີ ອີລອນ ມັສຄ໌ ປະສົບຄວາມສຳເລັດ ໃນການທົດລອງສົ່ງຈະຫຼວດຂະໜາດໃຫຍ່ ທີ່ເອີ້ນວ່າ ສະຕາຣຊິປ (Starship) ແລະສາມາດໃຊ້ແຂນກົນຈັກ ໃນການຈັບຊິ້ນສ່ວນດ້ານລຸ່ມຂອງຈະຫຼວດທີ່ກຳລັງບິນລົງມາຢູ່ນັ້ນ ໄວ້ໄດ້ ອີງຕາມລາຍງານຂອງອົງການຂ່າວເອພີ.
ຈະຫຼວດສະຕາຣຊິປ ເຊິ່ງມີຄວາມສູງເກືອບ 121 ແມັດ ທະຍານອອກຖານຍິງທາງພາກໃຕ້ຂອງລັດເທັກຊັສ ໃກ້ກັບເຂດຊາຍແດນຕິດກັບເມັກຊິໂກ ໃນວັນອາທິດວານນີ້ ແລະບິນວົນອ້ອມຮອບອ່າວເມັກຂິໂກ ກ່ອນທີ່ຈະບິນເດີນທາງຂ້າມໂລກໄປຕົກລົງຢູ່ມະຫາສະໝຸດອິນເດຍ.
ແຕ່ທີ່ສ້າງສຽງຮືຮາຫຼາຍທີ່ສຸດ ໃນການທົດລອງຄັ້ງນີ້ ກໍຄືການທີ່ສ່ວນລຸ່ມຂອງຈະຫຼວດທີ່ຕົກລົງມາຫລັງຈາກທີ່ຈະຫຼວດຖືກແຍກອອກໄປແລ້ວນັ້ນ ກໍສາມາດກັບຄືນສູ່ຖານຍິງໄດ້ສຳເລັດ ດ້ວຍການໃຊ້ແຂນກົນຈັກຂະໜາດໃຫຍ່ຈັບເອົາໄວ້.
ແຂນກົນຈັກທີ່ຕິດຕັ້ງໄວ້ກັບຖານປ່ອຍຈະຫຼວດນັ້ນ ມີຊື່ທີ່ເອີ້ນວ່າ ຊ໊ອປສຕິກສ໌ (chopsticks) ຫຼືໄມ້ຄີບທູ່ນັ້ນເອງ ທີ່ເຮັດໜ້າທີ່ຍຶດສ່ວນລຸ່ມຂອງຈະຫຼວດເພີ້ມກຳລັງ ຫຼື booster ເຊິ່ງມີຄວາມສູງ 71 ແມັດນັ້ນ ເອົາໄວ້ໄດ້.
ເຄທ ໄທຊ໌ Kate Tise ຈາກບໍລິສັດສເປສແອັກສ໌ ກ່າວວ່າ “ນີ້ຄືວັນທີ່ຕ້ອງຖືກຈາລຶກໄວ້ໃນປະຫວັດສາດຂອງຄວາມກ້າວໜ້າດ້ານວິສະວະກອນ.”
ການນຳສ່ວນລຸ່ມຂອງຈະຫຼວດກັບມາໃຊ້ໃໝ່ນີ້ ຈະຊ່ອຍໃຫ້ທາງບໍລິສັດສາມາດປະຢັດເງິນໄດ້ຫຼາຍລ້ານໂດລາ ແລະຊ່ອຍເລັ່ງການພັດທະນາການປ່ອຍຈະຫຼວດຂອງສເປສແອັກສ໌ ໄດ້ຢ່າງຫຼວງຫຼາຍ.
ທັງນີ້ ຈະຫຼວດສະຕາຣຊິປ ຄືຈະຫຼວດຂະໜາດໃຫຍ່ທີ່ສຸດ ແລະມີພະລັງຫຼາຍທີ່ສຸດເທົ່າທີ່ເຄີຍສ້າງຂຶ້ນ ເພື່ອໃຊ້ກັບເຄື່ອງຍົນເຊື້ອເພີງທີ່ເປັນແກັສເມັດເທນໃນຈະຫຼວດບຸສເຕີນັ້ນ.
ອົງການອະວະກາດສະຫະລັດ ຫຼື NASA ມີໂຄງການສົ້ງຈະຫຼວດສຕາຣຊິປຂອງສເປສແອັກສ໌ ພ້ອມກັບນັກບິນອະວະກາດໄປລົງຢູ່ເທິງພື້ນດວງເດືອນພາຍໃນທົດສະວັດນີ້ ຂະນະທີ່ບໍລິສັດສເປສແອັກສ໌ເອງ ກໍຕັ້ງເປົ້າທີ່ຈະໃຊ້ຈະຫຼວດຂະໜາດໃຫຍ່ລຳນີ້ ໃນການຂົນສົ່ງມະນຸດ ແລະສຳພາລະຕ່າງໆ ໄປຍັງດວງເດືອນ ລວມທັງດາວອັງຄານ ໃນອະນາຄົດ ນຳດ້ວຍ.