ດາວທຽມໜ່ວຍນຶ່ງທີ່ຖືກທຳລາຍເວລາຈະຫຼວດຂອງຍານອະວະກາດ SpaceX ລະເບີດຂຶ້ນທີ່ຖານຍິງຢູ່ລັດຟລໍຣິດາ ໃນວັນພະຫັດວານນີ້ ແມ່ນແນໃສ່ເພື່ອຈະ ສົ່ງສັນຍານທາງອິນເຕີແນັດຄວາມໄປສູງ ໄປຍັງທະວີບອາຟຣິກາ ເພື່ອໃຊ້ສຳລັບເຟສບຸກ.
ບໍ່ມີຜູ້ໃດໄດ້ຮັບບາດເຈັບ ເວລາຈະຫຼວດລະເບີດຂຶ້ນທີ່ຖານຍິງ ຢູ່ແຫຼມ Cana-veral. ຜູ້ຄົນທີ່ເຮັດວຽກຢູ່ຕາມຕຶກອາຄານທີ່ຕັ້ງຫ່າງອອກໄປຫຼາຍໆກິໂລແມັດກໍໄດ້ຮູ້ສຶກເຖິງແຮງສັ່ນສະເທືອນ ຊຶ່ງໄດ້ເກີີດຂຶ້ນ ໃນຂະນະທີ່ພວມມີການກວດສອບ ຈະຫຼວດດັ່ງກ່າວ ຕາມ ປົກກະຕິກ່ອນໝາຍກຳນົດການຍິງຂຶ້ນໃນວັນເສົາມື້ອື່ນນີ້.
ຈະຫຼວດ Falcon 9 ໄດ້ລຸກໄໝ້ເປັນແປວໄຟຂະໜາດໃຫຍ່ ແລະຄວັນສີດຳກຸ້ມຂຶ້ນຈາກ ຖານຍິງ. ດາວທຽມທີ່ສ້າງໂດຍອິສຣາແອລໜ່ວຍນີ້ ໄດ້ຕົກລົງສູ່ພື້ນດິນ ໃນຂະນະທີ່ຈະຫຼວດລະເບີດຂຶ້ນ ແຕ່ດາວທຽມກໍຖືກທຳລາຍດ້ວຍ.
ການລະເບີດຂອງຈະຫລວດດັ່ງກ່າວ ເປັນສະພາບການຖອຍຫຼັງທີ່ສຳຄັນສຳລັບບໍລິສັດອະວະກາດ SpaceX ຂອງສະຫະລັດ ແລະຄູ່ຮ່ວມງານຂອງຕົນ ຮວມທັງບໍລິສັດອະວະ ກາດອິສຣາແອລຊຶ່ງກ່າວວ່າ ອາດຈະໃຊ້ເວລາດົນເຖິງ 3 ປີເພື່ອຈະສ້າງດາວທຽມໜ່ວຍໃໝ່ແທນໄດ້.
ທ່ານ Mark Zuckenberg ຜູ້ກໍ່ຕັ້ງບໍລິສັດເຟສບຸກທີ່ກຳລັງຢ້ຽມຢາມອາຟຣິກາ ໃນວັນພະຫັດວານນີ້ ກ່າວວ່າ ທ່ານຮູ້ສຶກເສຍໃຈເປັນທີ່ສຸດກ່ຽວກັບການສູນເສຍດາວທຽມ ທີ່ ແນໃສ່ເພື່ອຂະຫຍາຍການບໍລິການທາງອິນເຕີແນັດ ຢູ່ໃນເຂດພາກໃຕ້ ທະເລຊາຍຊາຮາຣາໃນອາຟຣິກາແລະເຂດສອກຫຼີກຫ່າງໄກອື່ນໆຂອງໂລກ.
ທ່ານ Zuckenberg ກ່າວວ່າ “ດາວທຽມຂອງພວກເຮົາຈະສະໜອງການເຊື່ອມໂຍງໃຫ້ແກ່ຫລາຍໆບໍລິສັດ ແລະຜູ້ຄົນອື່ນໆອີກໃນທົ່ວທັງທະວີບ.”