ຄົນຜູ້ໜຶ່ງໄດ້ເສຍຊີວິດ ແລະ ຫຼາຍກວ່າ 30 ຄົນໄດ້ຮັບບາດເຈັບ ຫຼັງຈາກລະເບີດລົດໄດ້ແຕກຂຶ້ນໃນພາກໃຕ້ຂອງ ໄທ ເມື່ອວັນ ອັງຄານວານນີ້.
ບັນດາເຈົ້າໜ້າກ່າວວ່າ ລົດຄັນດັ່ງກ່າວ ໄດ້ຖືກນຳໄປຈອດໄວ້ຢູ່ນອກໂຮງແຮມແຫ່ງໜຶ່ງ ໃນເມືອງປັດຕະນີທີ່ຕັ້ງຢູ່ແຄມຊາຍຝັ່ງຂອງປະເທດ ເຊິ່ງໄດ້ກໍ່ໃຫ້ເກີດຄວາມເສຍຫາຍ ເປ່ເພຢ່າງແຮງຕໍ່ທາງເຂົ້າຂອງໂຮງ ແຮມແລະອາຄານຫຼາຍຫຼັງທີ່ຕັ້ງຢູ່ໃກ້ຄຽງ, ລວມທັງ ສະຖານທີ່ຮ້ອງເພງ ຄາຣາໂອເກະ ແລະ ບ່ອນພັກຜ່ອນນວດຮ່າງກາຍ. ຜູ້ທີ່ໄດ້ຮັບເຄາະ ຮ້າຍໝົດທຸກຄົນແມ່ນຄົນ ໄທ.
ລະເບີດລູກໜຶ່ງ ທີ່ຫ້າງໄວຢູ່ໃນສະຖານທີ່ຈອດລົດຂອງໂຮງແຮມ ໄດ້ແຕກຂຶ້ນກ່ອນໜ້າ ນັ້ນບໍ່ເທົ່າໃດນາທີ, ແຕ່ຕຳຫຼວດກ່າວວ່າ ບໍ່ມີໃຜໄດ້ຮັບບາດເຈັບ.
ການໂຈມຕີໃນວັນອັງຄານວານນີ້ ໄດ້ເກີດຂຶ້ນ ຫຼັງຈາກຄື້ນຂອງການ ວາງລະເບີດຫຼາຍຄັ້ງ ປະສານງານກັນ ໃນເມືອງຕາກອາກາດຫຼາຍແຫ່ງ ໃນພາກໃຕ້ຂອງ ໄທ ລະຫວ່າງ ວັນທີ 11 ຫາ 12 ສິງຫາ ທີ່ໄດ້ສັງ ຫານ 4 ຄົນ ແລະ ບາດເຈັບຫຼາຍສິບຄົນ. ຂົງເຂດດັ່ງກ່າວໄດ້ຕົກຢູ່ໃນສະພາບວຸ້ນວາຍຍ້ອນການກໍ່ກະບົດຕ້ານລັດຖະບານເປັນເວລາ 12 ປີ ໂດຍ ພວກແບ່ງແຍກດິນແດນ ມຸສລິມ ໃນຈັງຫວັດ ຢະລາ, ປັດຕະນີ ແລະ ນະຣາທິວາດ ທີ່ໄດ້ ເຮັດໃຫ້ປະຊາຊົນຫຼາຍກວ່າ 6,500 ຄົນເສຍ ຊີວິດ.
Your browser doesn’t support HTML5
Thailand Bombing