ສຳນັກງານປະທານາທິບໍດີຂອງ ເກົາຫຼີໃຕ້ ໄດ້ເປີດເຜີຍຖະແຫຼງການສະບັບນຶ່ງ ໃນວັນສຸກມື້ນີ້ໂດຍເຊື່ອວ່າ ເກົາຫຼີເໜືອ ໄດ້ສົ່ງກອງກຳລັງທະຫານໄປ ຣັດເຊຍ, ເຊິ່ງເປັນການຂົ່ມຂູ່ດ້ານຄວາມໝັ້ນຄົງຢ່າງຮ້າຍແຮງຕໍ່ປະຊາຄົມນາໆຊາດທີ່ ລັດຖະບານ ໂຊລ ຈະຕອບໂຕ້ດ້ວຍທຸກວິທີທາງ.
ໂດຍສະແດງຄວາມເຫັນແຍກກັນ, ໜ່ວຍງານສອດແນມຂອງປະເທດກ່າວວ່າ ເກົາຫຼີເໜືອ ໄດ້ເຂົ້າຮ່ວມໃນສົງຄາມ ຢູເຄຣນ ແລະທໍາການຕັດສິນໃຈສົ່ງທະ ຫານໄປຮ່ວມຈໍານວນ 12,000 ຄົນ, ລວມທັງກອງກໍາລັງພິເສດ, ອີງຕາມ ລາຍງານຂອງອົງການຂ່າວ ຢອນຮັບ.
ປະທານາທິບໍດີເກົາຫຼີໃຕ້ ທ່ານ ຢຸນ ຊຸກ ໂຢລ ໄດ້ຈັດກອງປະຊຸມດ້ານຄວາມ ໝັ້ນຄົງທີ່ບໍ່ໄດ້ກຳນົດເວລາ ກັບເຈົ້າໜ້າທີ່ສືບລັບ, ທະຫານ ແລະເຈົ້າໜ້າທີ່ ຮັກສາຄວາມໝັ້ນຄົງແຫ່ງຊາດຜູ້ສໍາຄັນ ເພື່ອປຶກສາຫາລືກ່ຽວກັບການມີສ່ວນ ຮ່ວມຂອງທະຫານ ເກົາຫຼີເໜືອ ໃນສົງຄາມຂອງ ຣັດເຊຍ ກັບ ຢູເຄຣນ.
ຜູ້ນໍາເກົາຫຼີເໜືອ ທ່ານ ກິມ ຈົງ ອຶນ ພົບກັບລັດຖະມົນຕີສະພາຄວາມໝັ້ນຄົງຂອງ ຣັດເຊຍ ທ່ານ ເຊີເກ ຊອຍກູ, ໃນພາບທີ່ໄດ້ຮັບການເຜີຍແຜ່ໂດຍອົງການຂ່າວ KCNA ຂອງເກົາຫຼີເໜືອ, ວັນທີ 14 ກັນຍາ 2024.
ຖະແຫຼງການກ່າວວ່າ “ບັນດາຜູ້ເຂົ້າຮ່ວມ ໄດ້ສະແດງທັດສະນະຄະຕິຮ່ວມກັນວ່າ ສະພາບການໃນປັດຈຸບັນ ທີ່ສາຍພົວພັນຢ່າງໃກ້ຊິດລະຫວ່າງ ຣັດເຊຍ ແລະ ເກົາຫຼີເໜືອ ແມ່ນໄດ້ມີຫຼາຍກວ່າການດໍາເນີນການສະໜອງອາວຸດທາງທະຫານໄປເປັນການສົ່ງທະຫານໂຕຈິງນັ້ນ ແມ່ນໄພຂົ່ມຂູ່ດ້ານຄວາມໝັ້ນຄົງຢ່າງຮ້າຍແຮງບໍ່ພຽງແຕ່ຕໍ່ປະເທດຂອງພວກເຮົາ, ແຕ່ຍັງເປັນໄພຂົ່ມຂູ່ຕໍ່ບັນດາປະຊາຄົມໂລກນໍາອີກດ້ວຍ.”
ກ່ອນໜ້ານີ້, ເຈົ້າໜ້າທີ່ ເກົາຫຼີໃຕ້ ເຄີຍກ່າວວ່າ ມີລັກສະນະຄືກັນກັບຄວາມຈິງ ທີ່ເຈົ້າໜ້າທີ່ ເກົາຫຼີເໜືອ ຈໍານວນນຶ່ງເຄີຍຢູ່ໃນ ຣັດເຊຍ ແລະ ມີສ່ວນພົວພັນ ກັບພວກເຂົາໃນສົງຄາມ ກັບ ຢູເຄຣນ, ແຕ່ບໍ່ໄດ້ໃຫ້ຄຳຕອບທີ່ຈະແຈ້ງກ່ຽວກັບ ລັກສະນະ ຫຼື ຂະໜາດຂອງການດໍາເນີນງານດັ່ງກ່າວ.
ສໍານັກງານຂອງ ທ່ານ ຢຸນ ເປີດເຜີຍວ່າ ເກົາຫລີໃຕ້ ຮວ່ມກັບບັນດາປະເທດພັນທະມິດຂອງຕົນ ໄດ້ດໍາເນີນງານຕິດຕາມການສົ່ງທະຫານຂອງ ເກົາຫລີເໜືອ ໄປ ຣັດເຊຍ ຢ່າງໃກ້ຊິດຕັ້ງແຕ່ຂັ້ນເລີ້ມຕົ້ນ. ແນວໃດກໍຕາມ, ພວກ ເຂົາບໍ່ໄດ້ສະໜອງລາຍລະອຽດໃດໆກ່ຽວກັບໜ່ວຍງານສືບລັບ ເພື່ອຢືນ ຢັນການສົ່ງຈັດສົ່ງທະຫານຂອງ ເກົາຫຼີເໜືອ.