ສານແຫ່ງນຶ່ງຂອງເກົາຫຼີໃຕ້ໄດ້ຕັດສິນລົບລ້າງກົດໝາຍເກົ່າ
ແກ່ຫຼາຍທົດສະວັດສະບັບນຶ່ງແລະເປັນບັນຫາໂຕ້ແຍ້ງກັນທີ່
ຫ້າມຜົວເມຍມີຄວາມສຳພັນທາງເພດກັບຄົນອື່ນ.
ສານລັດຖະທຳມະນູນ ໄດ້ອອກຄຳຕັດສິນ ໃນວັນພະຫັດມື້ນີ້
ດ້ວຍ ການລົງມະຕິ ເຫັນດີ 7 ສຽງ ຕໍ່ 2 ສຽງຄັດຄ້ານ ໃຫ້ລົບ
ລ້າງກົດໝາຍຫ້າມຫລິ້ນຊູ້ນອກໃຈຜົວເມຍ ທີ່ໄດ້ມີຜົນບັງຄັບ
ໃຊ້ມາຕັ້ງແຕ່ປີ 1953 ນັ້ນ.
ທ່ານ Park Han-Chul ປະທານ ສານລັດຖະທຳມະນູນ ກ່າວ
ວ່າ“ເຖິງແມ່ນວ່າການນອກໃຈຜົວເມຍ ຄວນຈະຖືກປະນາມວ່າເປັນຄວາມຜິດທາງສີນທຳກໍຕາມ ແຕ່ອຳນາດຂອງລັດ ກໍບໍ່ຄວນຈະເຂົ້າແຊກແຊງໃນຊີວິດສ່ວນຕົວຂອງບຸກຄົນ.”
ອີງຕາມໂຕເລກຂອງທາງການກໍແມ່ນວ່າ ປະຊາຊົນຈຳນວນຫຼາຍກວ່າ 5.400 ຄົນ ໄດ້ຖືກຕັດສິນວ່າມີຄວາມຜິດໃນຂໍ້ຫາ ທຳຜິດປະເວນີ ໃນຊ່ວງ 6 ປີຜ່ານມານີ້ ແຕ່ກໍບໍ່ສູ້ມີການຕັດສິນໂທດໃຫ້ຈຳຄຸກ ພາຍໃຕ້ກົດໝາຍດັ່ງກ່າວ.
ການຫ້າມຫລິ້ນຊູ້ສາວ ຜິດປະເວນີນີ້ ທຳອິດແມ່ນຖືກຖືວ່າເປັນຄວາມ ພະຍາຍາມເພື່ອ
ສົ່ງເສີມຄວາມເທົ່າທຽມກັນທາງເພດ ເນື່ອງຈາກວ່າພວກແມ່ຍິງທີ່ແຕ່ງງານແລ້ວນັ້ນ ໄດ້ຊົມໃຊ້ສິດອື່ນໆໜ້ອຍຫລາຍ. ແຕ່ກົດໝາຍດັ່ງກ່າວໄດ້ກາຍມາເປັນເລື້ອງທີ່ຄົນບໍ່ນິຍົມກັນຫຼາຍຂຶ້ນ ໃນຂະນະທີ່ ວັດທະນະທຳເກົາຫຼີໃຕ້ ໄດ້ປ່ຽນແປງໄປຕາມກາລະເວລາແລະທັນສະໄໝຫຼາຍຂຶ້ນ ໃນຫວ່າງບໍ່ເທົ່າໃດທົດສະວັດຜ່ານມານີ້.
ນັບວ່າເປັນເທື່ອທີ 5 ນັບຕັ້ງແຕ່ປີ 1990 ເປັນຕົ້ນມາ ທີ່ສານລັດຖະ ທຳມະນູນ ໄດ້ພະຍາ
ຍາມຕ່າວປີ້ນຂໍ້ຫ້າມດັ່ງກ່າວ. ການພະຍາຍາມທຸກໆເທື່ອ ກ່ອນໜ້ານີ້ ໄດ້ປະສົບກັບຄວາມລົ້ມແຫຼວ ຍ້ອນວ່າບໍ່ໄດ້ຮັບສຽງສະໜັບສະໜຸນ 6 ສຽງທີ່ຕ້ອງການນັ້ນ.
ໃນການອອກຄວາມຄິດເຫັນຄັດຄ້ານ ທີ່ເປີດເຜີຍອອກໃນວັນພະຫັດມື້ນີ້ ຜູ້ພິພາກສາ Ahn Chang-Ho ກ່າວວ່າ ກົດໝາຍດັ່ງກ່າວໄດ້ ຊ່ອຍປົກປ້ອງຄ່ານິຍົມຂອງຄອບຄົວ ແລະເຕືອນວ່າ ການລົບລ້າງ ຈະກະຕຸ້ນໃຫ້ເກີດ “ຄື້ນຟອງໃນດ້ານການນອກໃຈສາມີ
ພັນລະຍາ.”
ຫຼັງຈາກສານຕັດສິນແລ້ວ ລາຄາຮຸ້ນໄດ້ຖີບໂຕສູງຂຶ້ນຮອດ 15 ເປີເຊັນ ອັນເປັນກຳນົດສູງສຸດປະຈຳວັນຂອງບໍລິສັດຜະລິດຖົງຢາງອະນາໄມຮ່ວມເພດທີ່ໃຫຍ່ທີ່ສຸດ Unidus Corp ຂອງເກົາຫຼີໃຕ້.
Your browser doesn’t support HTML5
sokoradultery26february15