ເກົາຫລີໃຕ້ໄດ້ປະກາດສະຖານທີ່ແຫ່ງໃໝ່ ເພື່ອຕິດຕັ້ງລະບົບປ້ອງກັນລູກສອນໄຟທີ່ກ້າວ ໜ້າທັນສະໄໝຂອງສະຫະລັດ.
ກະຊວງປ້ອງກັນປະເທດເກົາຫຼີໃຕ້ ກ່າວໃນວັນສຸກມື້ນີ້ວ່າ ຕົນມີຄວາມຕັ້ງໃຈທີ່ຈະຕິດຕັ້ງລະບົບປ້ອງກັນລູກສອນໄຟ THAAD ຢູ່ທີ່ເດີ່ນຕີກັອຟແຫ່ງນຶ່ງ.
ໃນຕົ້ນປີນີ້ ສະຫະລັດແລະເກົາຫລີໃຕ້ ໄດ້ເຫັນພ້ອມນຳກັນ ທີ່ຈະຕິດຕັ້ງລະບົບລູກສອນໄຟ THAAD ໃສ່ເມືອງ Seongju ຊຶ່ງເປັນເຂດຊົນນະບົດທາງພາກຕາເວັນອອກສຽງໃຕ້ ຂອງນະຄອນຫລວງ Seoul.
ພວກຊາວບ້ານທ້ອງຖິ່ນໄດ້ພາກັນຄັດຄ້ານ ເຖິງຢ່າງໃດກໍດີ ໄດ້ກ່າວວ່າລະບົບ ລູກສອນໄຟ THAAD ເປັນອັນຕະລາຍຕໍ່ສຸຂະພາບແລະຕໍ່ສິ່ງແວດລ້ອມ ແລະເຮັດໃຫ້ຂົງເຂດດັ່ງ ກ່າວ ເປັນເປົ້າໝາຍໃນການໂຈມຕີຂອງເກົາຫລີເໜືອ.
ເກົາຫລີເໜືອໄດ້ຂົ່ມຂູ່ທີ່ຈະຕອບໂຕ້ດ້ວຍການໂຈມຕີ ບ່ອນຕິດຕັ້ງລູກສອນໄຟ THAAD ແລະຈະເຮັດໃຫ້ເກົາຫຼີໃຕ້ “ກາຍເປັນທະເລໄຟ ແລະກອງຂີ້ເທົ່າ.”
ບ່ອນຕິດຕັ້ງໃໝ່ແມ່ນເດີ່ນຕີກັອຟ ທີ່ເປັນເຈົ້າຂອງໂດຍເຄືອຂ່າຍບໍລິສັດຫຍ່ອຍ Lotte ຕັ້ງຢູ່ 18 ກິໂລແມັດ ທາງພາກເໜືອຂອງຖານທັບອາກາດ.
ວໍຊິງຕັນແລະໂຊລໄດ້ເຫັນພ້ອມນຳກັນທີ່ຈະຕິດຕັ້ງລະບົບປ້ອງກັນລູກສອນໄຟ THAAD ໃນປີນີ້ ຫລັງຈາກເກົາຫຼືເໜືອໄດ້ທົດລອງລູກສອນໄຟແລະນິວເຄລຍ ເລື້ອຍຂຶ້ນ.
ພວກເຈົ້າໜ້າທີ່ຈີນບໍ່ເຫັນພ້ອມກ່ຽວກັບການຕິດຕັ້ງລະບົບລູກສອນໄຟ THAAD ຢູ່ໃນຂົງເຂດ ໂດຍກ່າວວ່າ ລະບົບເຣດ້າຂອງລູກສອນໄຟນີ້ ມີປະສິດຕິພາບ ທີ່ຈະສອດແນມເຂົ້າໄປໃນດິນແດນຂອງຕົນ.
ລະບົບລູກສອນໄຟ THAAD ໃຊ້ເຄື່ອງຍິງເຄື່ອນທີ່ ແລະປະກອບດ້ວຍເທັກໂນໂລຈີລູກສອນໄຟທີ່ແມ່ນຍຳທີ່ຊອກຫາແສງດ້ວຍ infrared ເພື່ອສະກັດກັ້ນລູກສອນໄຟສັດຕູຫຼັງຈາກໄດ້ກັບເຂົ້າມາສູ່ບັນຍາກາດ ໃນລະດັບສູງ ໃນລະຫວ່າງຂັ້ນຕອນສຸດທ້າຍຂອງລູກສອນໄຟທີ່ຍິງມານັ້ນ.
ລະບົບປ້ອງກັນລູກສອນໄຟໃນເກົາຫລີໃຕ້ດັ່ງກ່າວ ຈະມີປະສິດທິຜົນໃນການຕໍ່ຕ້ານລູກສອນໄຟຊະນິດຕ່າງໆທີ່ມີຢູ່ໃນຄັງອາວຸດຂອງເກົາຫລີເໜືອ ຮວມທັງລູກສອນໄຟໄລຍະໃກ້ scud ແລະໄລຍະກາງ Nodong ແລະລູກສອນໄຟ Musudan.
ອ່ານຂ່າວນີເພີ້ມເປັນພາສາອັງກິດ
Your browser doesn’t support HTML5
South Korea U.S.