ກຳລັງຮັກສາຄວາມປອດໄພຂອງໂຊມາເລຍໄດ້ຍຸຕິການໂຈມຕີຮ້ານອາຫານທີ່ຫາດຊາຍ ແຄມທະເລແຫ່ງນຶ່ງ ໃນນະຄອນຫຼວງຂອງປະເທດ ທີ່ເຮັດໃຫ້ມີຜູ້ເສຍຊີວິດ ຢ່າງໜ້ອຍ 7 ຄົນ ພ້ອມດ້ວຍຄົນຮ້າຍ 2 ຄົນ ອີງຕາມຄຳຖະແຫຼງຂອງຕຳຫຼວດໃນວັນສຸກມື້ນີ້.
ຜູ້ບັນຊາການຕຳຫຼວດໃນນະຄອນໂມກາດິສຊູ ພັນເອກ Bishar ກ່າວວ່າ ການໂຈມຕີໄດ້ສິ້ນສຸດລົງບໍ່ດົນກ່ອນຕາເວັນຂຶ້ນໃນຕອນເຊົ້າວັນສຸກມື້ນີ້.
ພັນເອກ Bishar ກ່າວຈາກບ່ອນທີ່ມີການໂຈມຕີໃນນະຄອນຫຼວງໂມກາດິສຊູວ່າ “ກຳລັງຮັກສາຄວາມປອດໄພໄດ້ຍຸຕິການປະຕິບັດງານ ທີ່ພວກເຂົາເຈົ້າສາມາດຊ່ອຍເອົາພົນລະເຮືອນທີ່ຕົກຄ້າງຢູ່ຂ້າງໃນຮ້ານອາຫານເກືອບທັງໝົດອອກມາໄດ້ ແລະໃນເວລານີ້ ພວກເຮົາໄດ້ເຂົ້າຄວບຄຸມຮ້ານອາຫານດັ່ງກ່າວທັງໝົດແລ້ວ.”
ຫາດ Banadir ໃນນະຄອນໂມກາດິສຊູ ປະເທດໂຊມາເລຍ
ການໂຈມຕີເລີ້ມຂຶ້ນໃນຄ່ຳຄືນວັນພະຫັດ ເວລາລະເບີດລົດລູກນຶ່ງໄດ້ແຕກຂຶ້ນໃກ້ໆຮ້ານອາຫານແຄມຫາດ Benadir ແລະກໍຕິດຕາມມາດ້ວຍການຍິງຕໍ່ສູ້ກັນ.
ກຸ່ມຫົວຮຸນແຮງ Al-Shabab ໄດ້ອອກມາອ້າງເອົາຄວາມຮັບຜິດຊອບໃນການໂຈມຕີດັ່ງ ກ່າວໂດຍທັນທີ.
ພັນເອກ Bishar ກ່າວວ່າ ມີ 7 ຄົນໄດ້ເສຍຊີວິດ ຮວມທັງພົນລະເຮືອນ 5 ຄົນ ແລະເຈົ້າ ໜ້າທີ່ຮັກສາຄວາມປອດໄພ 2 ຄົນ. ທ່ານກ່າວວ່າ ຄົນຮ້າຍ 2 ຄົນ ກໍຖືກຂ້າຕາຍ. ກຳລັງຮັກສາຄວາມປອດໄພກ່າວວ່າ ນອກນັ້ນເຂົາເຈົ້າຍັງຈັບຄົນຮ້າຍອີກຜູ້ນຶ່ງໄດ້ທີ່ພົວພັນນຳການໂຈມຕີໃນຄັ້ງນີ້.
ພວກທີ່ເຫັນເຫດການກ່າວວ່າ ອາສາສະໝັກໄດ້ຫາມສົບຄົນຕາຍ ອອກໄປຈາກບ່ອນທີ່ ເກີດເຫດ ໃນຕອນເຊົ້າວັນສຸກມື້ນີ້. ລົດໂຮງໝໍໃນນະຄອນຫຼວງໂມກາດິສຊູກໍໄດ້ສົ່ງຄົນເຈັບ 4 ຄົນໄປຍັງໂຮງພະຍາບານ.
Your browser doesn’t support HTML5
Somalia Violence