ພວກທະຫານບ້ານນິກາຍ Shi’ite ໄດ້ເຕົ້າໂຮມກຳລັງກັນ ໃນ
ວັນອັງຄານມື້ນີ້ ຢູ່ນອກເມືອງ Ramadi ຂອງອີຣັກ ກ່ອນໜ້າ
ການບຸກໂຈມຕີ ທີ່ອາດເປັນໄປໄດ້ ເພື່ອພະຍາຍາມເຂົ້າຍຶດ
ເອົາເມືອງຫຼວງຂອງແຂວງ Anbar ຄືນມາຈາກພວກຫົວຮຸນແຮງ
ລັດອິສລາມ.
ປະຕິບັດການດັ່ງກ່າວ ແມ່ນມີຂຶ້ນຄຽງຄູ່ກັນກັບ ກອງກຳລັງ
ລັດຖະບານອີຣັກ ທີ່ຈະຄ້າຍຄືກັນກັບການປະຕິບັດການທາງ
ທະຫານແບບດຽວກັນກັບ ທີ່ໄດ້ມີຂຶ້ນໃນການບຸກເຂົ້າຍຶດເອົາ
ເມືອງ Tikrit ເມື່ອເດືອນແລ້ວນີ້. ຄວາມພະຍາຍາມອັນນັ້ນ
ໄດ້ຢຸດຢັ້ງການບຸກໂຈມຕີ ຂອງພວກລັດອິສລາມ ທີ່ມຸ່ງໜ້າໄປສູ່ນະຄອນຫຼວງ Baghdad ຈາກທາງທິດເໜືອ ແລະ ບັດນີ້ແມ່ນເພັ່ງເລັງ ໃສ່ການສະກັດກັ້ນ ການບຸກຄືບໜ້າ ຈາກ ທາງທິດຕາເວັນຕົກຂອງນະຄອນຫຼວງອີຣັກ.
ກະຊວງປ້ອງກັນປະເທດອີຣັກ ໄດ້ນຳອອກເຜີຍແຜ່ວີດີໂອອັນໜຶ່ງ ໃນວັນອັງຄານມື້ນີ້ ທີ່
ສະແດງໃຫ້ເຫັນເຖິງ ການຊ່ອຍເຫຼືອທະຫານຈຳນວນ 28 ຄົນ ຫຼັງຈາກກຸ່ມລັດອິສລາມ
ໄດ້ເຂົ້າຍຶດເອົາ Ramadi ໃນການສູ້ລົບກັນເປັນເວລາຫຼາຍມື້ ທີ່ເຮັດໃຫ້ພວກທະຫານ
ອີຣັກ ພາກັນຫລົບໜີ ແລະ ສົ່ງຜົນໃຫ້ ນາຍົກລັດຖະມົນຕີອີຣັກ ທ່ານ Haider al-Abadi
ຂໍຮ້ອງໃຫ້ທະຫານບ້ານໄປຊ່ອຍ.
ທຳນຽບຂາວ ກ່າວໃນວັນຈັນວານນີ້ວ່າ ປະທານາທິບໍດີ ບາຣັກ ໂອບາມາ ແມ່ນໄດ້ຮັບຟັງ
ການລາຍງານກ່ຽວກັບສະຖານະການຢ່າງເປັນປົກ ກະຕິ. ໂຄສົກທຳນຽບຂາວ ທ່ານ Eric
Schultz ຍັງໄດ້ເນັ້ນຢ້ຳວ່າ ສະຫະລັດ ສະໜັບສະໜຸນຊາວອີຣັກ ທີ່ຕໍ່ສູ້ເພື່ອຍຶດເອົາເມືອງ
ດັ່ງກ່າວນັ້ນຄືນມາ. ທ່ານກ່າວວ່າ ການໂຈມຕີທາງອາກາດຂອງແນວໂຮມ 8 ບັ້ນ ໄດ້ແນໃສ່ ເມືອງດັ່ງກ່າວ ນັບຕັ້ງແຕ່ວັນອາທິດຜ່ານມາ ຊຶ່ງເປັນສ່ວນໜຶ່ງຂອງການໂຈມຕີທາງອາກາດ ຈຳນວນ 32 ບັ້ນ ໃນໄລຍະ 3 ອາທິດຜ່ານມາ.
Your browser doesn’t support HTML5
Islamic State