ທຳນຽບຂາວ ໄດ້ສະແດງ”ຄວາມເປັນຫ່ວງອອກມາຢ່າງໜັກ”
ໃນວັນອາທິດວານນີ້ ກ່ຽວກັບລາຍງານການເສີມກໍາ ລັງທະຫານ
ລຸຫຼັ່ງເຂົ້າໄປໃນພາກຕາເວັນອອກຂອງຢູເຄຣນ ຈາກປະເທດ
ເພື່ອນບ້ານຣັດເຊຍ ຮວມທັງການສົ່ງພວກອາວຸດໜັກແລະລົດ
ຖັງຂ້າມຊາຍແດນເຂົ້າໄປນໍາ.
ທ່ານນາງ Bernadette Meehan ໂຄສົກປະຈຳສະພາຄວາມ
ໝັ້ນຄົງແຫ່ງຊາດ ກ່າວເຕືອນເຊັ່ນກັນວ່າ ການເຄື່ອນໄຫວໃດໆ
ໂດຍພວກກະບົດນິຍົມຣັດເຊຍ ຍຶດເອົາເຂດນ້ຳດິນແດນຕື່ມອີກ
ໃນພາກຕາເວັນອອກຂອງຢູເຄຣນທີ່ໄດ້ປະເຊີນກັບການສູ້ລົບ
ກັນນັ້ນຈະຖືກມອງເຫັນວ່າເປັນ “ການລະເມີດຢ່າງຈະແຈ້ງ”
ຕໍ່ຂໍ້ຕົກລົງຢຸດຍິງ ທີ່ໄດ້ບັນລຸກັນກັບລັດຖະບານ Kyiv.
ການເຕືອນຄັ້ງຫຼ້າສຸດຂອງສະຫະລັດ ມີຂຶ້ນໃນຂະນະທີ່ພວກຕິດຕາມສິ້ງຊອມເບິ່ງສະຖາ
ນະການຢູໂຣບ ໄດ້ແຈ້ງໃຫ້ຊາບວ່າ ພວກຂະບວນລົດບັນທຸກອາວຸດໜັກ ແລະລົດຫຸ້ມ
ເກາະພາກັນເຄື່ອນໄຫວໄປສູ່ທິດຕາເວັນອອກ ພ້ອມທັງການລະດົມຍິງປືນໃຫຍ່ຢ່າງໜັກໃສ່ເມືອງ Donetsk ທີ່ຢູ່ພາຍໃຕ້ການຄວບຄຸມຂອງພວກກະບົດນັ້ນ.
ທ່ານນາງ Meehan ໄດ້ຮຽກຮ້ອງທັງສອງຝ່າຍໃຫ້ເຄົາລົບນັບຖືໂດຍເຕັມຕໍ່ຄວາມໝັ້ນໝາຍຂອງຕົນຕໍ່ສັນຍາຢຸດຍິງ ທີ່ໄດ້ບັນລຸກັນໃນເດືອນກັນຍາຜ່ານມາ ໂດຍສະເພາະຄຳໝັ້ນສັນຍາຂອງມົສກູ ທີ່ຈະຢຸດການສົ່ງທະຫານ ພ້ອມທັງອາວຸດຍຸດໂທປະກອນ ແລະສະບຽງອື່ນໆຂ້າມແດນເຂົ້າໄປນັ້ນ.
ເຢຍຣມັນ ຮຽກຮ້ອງ ໃຫ້ທຸກຝ່າຍ ໃນຢູເຄຣນ ເຄົາລົບ ຢຸດຍິງ