ວັນຈັນມື້ນີ້ນະຄອນຫຼວງ ໂຊລ ໄດ້ກ່າວຫາທະຫານ ເກົາຫຼີເໜືອ ວ່າໄດ້ຂ້າມຊາຍແດນເຂົ້າ ມາໃນເຂດປອດທະຫານ ຫຼື DMZ ທາງຟາກ ເກົາຫຼີໃຕ້ ຢ່າງຜິດກົດໝາຍ ແລະ ວາງລະເບີດ ຝັງດິນໂດຍເຈດຕະນາ ເຮັດໃຫ້ທະຫານສອງຄົນໄດ້ຮັບບາດເຈັບໃນວັນທີ 4 ສິງຫາທີ່ຜ່ານມາ.
ວັນອັງຄານສັບປະດາແລ້ວນີ້ ລະເບີດຝັງດິນສາມລູກໄດ້ແຕກຂຶ້ນຢູ່ເຂດປອດທະຫານໃນຟາກຂອງ ເກົາຫຼີໃຕ້ ບ່ອນທີ່ທະຫານ ເກົາຫຼີໃຕ້ 8 ຄົນຍ່າງກວດລາດຕະເວນຢູ່. ຂາທັງສອງຂ້າງຂອງ ທະຫານຄົນໜຶ່ງໄດ້ຂາດອອກ ຍ້ອນລະເບີດດັ່ງກ່າວ, ສ່ວນຄົນທີສອງໄດ້ເສຍຂາຂ້າງໜຶ່ງ.
ພົນຕີ Ku Hong-mo ພ້ອມດ້ວຍເສນາທິການທະຫານບົກຮ່ວມຂອງ ເກົາຫຼີໃຕ້ ໄດ້ກ່າວປະນາມ ນະຄອນຫຼວງ Pyongyang ແລະ ໄດ້ປະຕິຍານ ວ່າຈະແກ້ແຄ້ນ.
“ພວກເຮົາກ່າວປະນາມຕໍ່ພຶດຕິກຳຂີ້ຂາດຕາຂາວນີ້ຢ່າງແຮງ ເຊິ່ງເປັນການລະເມີດຂໍ້ຕົກລົງຢຸດຍິງ ແລະ ຂໍ້ຕົກລົງບໍ່ຮຸກຮານກັນ ລະຫວ່າງ ເກົາຫຼີໃຕ້ ກັບ ເກົາຫຼີເໜືອ ແລະ ເປັນການຄາດຄິດບໍ່ເຖິງສຳລັບເລື້ອງທຳມະດາຂອງການທະຫານ.”
ເຂດປອດທະຫານ ເຊິ່ງໄດ້ຖືກສ້າງຕັ້ງຂຶ້ນຫຼັງຈາກການສິ້ນສຸດສົງຄາມ ເກົາຫຼີ ໃນປີ 1953 ແມ່ນມີລວງກວ້າງ 4 ກິໂລແມັດ ເປັນເຂດກີດກັ້ນຍາວຕາມເຂດຊາຍແດນ ລະຫວ່າງ ເກົາຫຼີໃຕ້ ແລະ ເໜືອ. ມີລະເບີດຝັງດິນຫຼາຍກວ່າ 1 ລ້ານລູກເຊື່ອວ່າໄດ້ຖືກຝັງຢູ່ຕາມເຂດປອດທະຫານ, ເຊິ່ງຖືວ່າ ເປັນເຂດຊາຍແດນໜຶ່ງທີ່ໄດ້ມີກຳລັງທະຫານຫຼາຍທີ່ສຸດໃນໂລກ.
ນະຄອນຫຼວງ ໂຊລ ໄດ້ຕັດການຊ່ວຍເຫຼືອດ້ານເສດຖະກິດສ່ວນໃຫຍ່ແກ່ ເກົາຫຼີເໜືອ ແລະ ໄດ້ວາງມາດຕະການລົງໂທດໃນປີ 2010 ຫຼັງຈາກພວກເຂົາໄດ້ຫຼົ້ມເຮືອຂອງທະຫານ ນາວິກະໂຍທິນຂອງ ເກົາຫຼີໃຕ້ ທີ່ເຮັດໃຫ້ທະຫານ 46 ຄົນເສຍຊີວິດ. ໂຊລ ໄດ້ກ່າວໂທດໃສ່ ພຽງຢາງສຳລັບການໂຈມຕີດັ່ງກ່າວແຕ່ ເກົາຫຼີເໜືອ ໄດ້ປະຕິເສດວ່າບໍ່ໄດ້ມີສ່ວນໃດໆໃນເລື້ອງນີ້.
Your browser doesn’t support HTML5
Koreas Landmines