ປະກົດການສຸລິຍະຄາດຫຼືກົບກິນຕາເວັນຈະເກີດຂື້ນໃນວັນອາທິດແລະວັນຈັນຢູ່ໃນບາງຂົງ
ເຂດຂອງໂລກໃນຂະນະທີ່ເດືອນເຄື່ອນເຂົ້າໄປບົດບັງຕາເວັນ ຊຶ່ງຈະພາໃຫ້ເຫັນເປັນວົງໄຟ
ນ້ອຍໆຫຼືແສງເປັນວົງແຫວນອ້ອມຂອບຂອງເດືອນນັ້ນ.
ອົງການອາວະກາດຂອງສະຫະລັດ ຫຼື NASA ກ່າວວ່າ ກົບກິນຕາເວັນ ຈະເລີ້ມຂື້ນໃນເວ
ລາ 20 ໂມງ 56 ນາທີຕາມເວລາມາດຕະຖານສາກົນໃນວັນອາທິດທີ 20 ພິືດສະພາຢູ່ພາກ
ໃຕ້ຂອງຈີນ. ມັນຈະເຄື່ອນໄປທິດຕາເວັນອອກແລະສີ້ນສຸດລົງໃນວັນຈັນທີ 21 ພຶດ ສະພາ
ເວລາ 2 ໂມງ 49 ນາທີ ຕາມເວລາມາດຕະຖານສາກົນ ທີ່ລັດ New Mexico ແລະ ລັດ
Texas ຂອງສະຫະລັດ.
ໄດ້ມີການເຕືອນ ຢ່າໄດ້ເບິ່ງໄປຍັງຕາເວັນໂດຍກົງ ເປັນເດັດຂາດໃນລະຫວ່າງທີ່ເກີດປະກົດ
ການສຸລິຍະຄາດບໍ່ວ່າດ້ວຍຕາເປົ່າ ດ້ວຍກ້ອງສ່ອງເບິ່ງເດືອນດາວ ກ້ອງສ່ອງທໍາມະດາຫລື
ວ່າໃສ່ແວ່ນຕາດໍາກໍຕາມ. ພວກນັກຊ່ຽວຊານເຕືອນວ່າ ການກະທໍາດັ່ງກ່າວຈະທໍາລາຍສາຍ
ຕາໄປຕະຫລອດ ຫລືເຮັດໃຫ້ຕາບອດໄດ້.
ຄໍາສັບທາງດ້ານວິທະຍາສາດ ກ່ຽວກັບການເກີດສຸລິຍະຄາດປະເພດນີ້ແມ່ນ annular ຊຶ່ງ
ເປັນເຫດການທີ່ບໍ່ຄ່ອຍເຫັນກັນ ຍ້ອນວ່າເດືອນຢູ່ຫ່າງໄກສຸດວົງໂຄຈອນອ້ອມໂລກເວລາ
ມັນໝູນວຽນໄປຢູ່ຕໍ່ໜ້າຂອງດວງຕາເວັນ.
ສຸລິຍະຄາດວົງແຫວນນີ້ເທື່ອສຸດທ້າຍແມ່ນເກີດຂື້ນໃນວັນທີ 15 ເດືອນມັງກອນ ປີ 2010.
ດວງເດືອນຈະບໍ່ສາມາດປົກປິດຕາເວັນໄດ້ທັງໝົດ. ດັ່ງນັ້ນຈຶ່ງປ່ອຍໃຫ້ເຫັນຂອບຂອງດວງ
ຕາເວັນຢູ່ບັນຍາກາດຊັ້ນເທິງເປັນວົງອ້ອມ. ວົງອ້ອມທີ່ເປັນແສງອ້ອມ ຂອບເດືອນຮອ້ງວ່າ
annulus. ໃນກໍລະນີທີ່ເກີດສຸລິຍະຄາດເຕັມດວງນັ້ນດວງຕາເວັນທັງໜ່ວຍຈະຖືກບົດບັງ.
ປະກົດການສຸລິຍະຄາດເຕັມດວງຈະເກີດຂື້ນໃນທ້າຍປີນີ້ໃນວັນທີ 13 ເດືອນພະຈິກ ແຕ່ວ່າ
ປະກົດການສຸລິຍະຄາດວົງແຫວນຄັ້ງຕໍ່ໄປນັ້ນຈະບໍ່ເກີດຂຶ້ນຈົນເທົ່າວັນທີ 10 ເດືອນພຶດສະ
ພາ ປີ 2013.