ການນໍາເອົາແຮງບັນດານໃຈຈາກຜູ້ເປັນພໍ່ ມາເປັນຄວາມຮູ້ຄວາມສາມາດ ເພື່ອຊ່ວຍເຫຼືອສັງຄົມ

ສັງຄົມ ຍັງມີຜູ້ຄົນອີກຈໍານວນຫຼາຍທີ່ຍັງຕ້ອງການການຊ່ວຍເຫຼືອ ໂດຍສະເພາະແມ່ນບັນຫາເລື້ອງສຸຂະພາບ ທີ່ເປັນຊ່ອງຫວ່າງສໍາລັບຜູ້ທີ່ຍັງດ້ອຍໂອກາດໃນເລື້ອງຄວາມຮູ້ ຫຼື ການເຂົ້າເຖິງທີ່ຍັງເປັນອຸປະສັກ ຈາກບັນຫາເລື້ອງຂອງລາຍໄດ້. ທິບສຸດາ ມີລາຍງານສໍາພາດກັບ ຍານາງ ຊາຣາ ກອງບົວໄຂ ຊັບເຟີ, ຜູ້ທີ່ເປັນນັກສັງຄົມສົງເຄາະ ເນື່ອງຈາກມີພໍ່ເປັນແບບຢ່າງທີ່ເຮັດໃຫ້ຍານາງ ມີແນວຄິດຢາກຊ່ວຍເຫຼືອສັງຄົມຕັ້ງແຕ່ຍານາງຍັງນ້ອຍ ມາສະເໜີທ່ານໃນອັນດັບຕໍ່ໄປ.

ການນໍາເອົາແຮງບັນດານໃຈຈາກຜູ້ເປັນພໍ່ ມາເປັນຄວາມຮູ້ຄວາມສາມາດ ເພື່ອຊ່ວຍເຫຼືອສັງຄົມ

“ເມື່ອຂະນ້ອຍເຮັດວຽກນໍາຄົນທີ່ເຂົາເຈົ້າປ່ວຍໂຊ, ຂະນ້ອຍຊ່ວຍເຂົາ ບໍ່ສໍາຄັນກ່ຽວກັບເລື້ອງລາຍໄດ້ຂອງເຂົາເຈົ້າ.”

ນັ້ນແມ່ນສຽງຂອງຍານາງ ສິຣິວັນ ກອງບົວໄຂ ຫຼື ຊາຣາ ຊັບເຟີ, ອາຍຸ 47 ປີ, ຜູ້ທີ່ເກີດຢູ່ໃນປະເທດລາວ ແຕ່ເດີນທາງອອກຈາກລາວພ້ອມກັບຄອບຄົວຄອບຄົວເນື່ອງຈາກບັນຫາທາງສັງຄົມ ແລະການເມືອງ ເມື່ອຍານາງອາຍຸໄດ້ 3 ປີ. ຕອນມາເຖິງສະຫະລັດໃຫມ່ໆ ຄອບຄົວພໍ່ແມ່ ໄດ້ພາມາອາໄສຢູ່ເມືອງເຟຣສໂນ, ລັດຄາລິຟໍເນຍ. ສະນັ້ນ, ຍານາງຈຶ່ງເຕີບໃຫຍ່ຢູ່ໃນສະພາບແວດລ້ອມທີ່ມີຜູ້ຄົນຫຼາຍເຊື້ອຊາດ ແລະວັດທະນະທໍາທີ່ແຕກຕ່າງກັນ, ເຊິ່ງໄດ້ເຮັດໃຫ້ຍານາງມອງເຫັນເຖິງບັນຫາຫຼາຍຢ່າງຂອງຜູ້ຄົນຢູ່ໃນສັງຄົມ ໂດຍສະເພາະ ປະຊາຊົນຜູ້ທີ່ມີລາຍໄດ້ຕໍ່າ ແລະຍາກຕໍ່ການເຂົ້າເຖິງການຮັກສາ ບວກກັບຕົວຢ່າງຈາກພໍ່ ທີ່ເຮັດວຽກເພື່ອສັງຄົມຢູ່ໃນຊຸມຊົນທີ່ຍານາງ ແລະຄອບຄົວອາໄສຢູ່ ຈຶ່ງເຮັດໃຫ້ຍານາງເລືອກວິຊາຊີບດ້ານນີ້.

ປັດຈຸບັນ ຍານາງອາໄສຢູ່ນະຄອນລອສ ແອງເຈລລິສ, ລັດຄາລິຟໍເນຍ, ຫຼັງຈາກຮຽນຈົບ ກໍໄດ້ເຮັດວຽກກ່ຽວກັບສົງຄົມສົງເຄາະໂດຍສະສົມປະສົບການມາຫຼາຍກວ່າ 20 ກວ່າປີ, ເຊິ່ງຂະນະນີ້ ຍານາງເປັນຜູ້ອໍານວຍການຢູ່ບໍລິສັດ Optum Medical Group ເຊິ່ງເປັນບໍລິສັດທີ່ບໍລິການນະວັດຕະກໍາດ້ານສຸຂະພາບ ໂດຍດໍາເນີນງານເພື່ອເຮັດໃຫ້ປະຊາຊົນມີຊີວິດທີ່ດີຂຶ້ນ ແລະຊ່ວຍໃຫ້ລະບົບສາທາລະນະສຸກດໍາເນີນງານດີຂຶ້ນສາລັບປະຊາຊົນທຸກໆຄົນ. ໃນຂົງເຂດທາງພາກໃຕ້ຂອງລັດ ຄາລິຟໍເນຍ ໂດຍດໍາລົງຕໍາແໜ່ງເປັນຜູ້ອໍານວຍການໃຫຍ່ຢູ່ຂົງເຂດນີ້. ຍານາງກ່າວວ່າ ເຫດຜົນທີ່ເຮັດໃຫ້ຍານາງຕ້ອງການມາເປັນນັກສັງຄົມສົງເຄາະ ເນື່ອງຈາກຍານາງເຫັນພໍ່ເປັນແບບຢ່າງ ເຫັນຫຼາຍຄົນທີ່ຍັງລໍາບາກ ແລະຕ້ອງການການຊ່ວຍເຫຼືອ.

“ຕອນພໍ່ຂະນ້ອຍເປັນພະນັກງານສັງຄົມສົງເຄາະ ຕອນຂະນ້ອຍຍັງນ້ອຍຫັ້ນນະ ລາວເຮັດຢູ່ Department of Children and Family Services, ເຮັດກັບເດັກນ້ອຍຫັ້ນນະ ເດັກນ້ອຍເຂົາຖືກ Abuse ເດັກນ້ອຍເຂົາຕ້ອງຊ່ວຍຫັ້ນນະ, ແລ້ວເຮົາຫັ້ນອອກໄປເບິ່ງ ໄປເອົາເດັກນ້ອຍ, ເອົາເດັກນ້ອຍໄປໃສ່ Foster home, ຫຼື ເອົາເຂົ້າໃຫ້ເຂົາກິນຫັ້ນນະ, ແລ້ວຂະນ້ອຍກະເບິ່ງວ່າພໍ່ຂະນ້ອຍນີ້ເຮັດຍາກຂະໜາດທີ່ລາວເຮັດກັບເດັກນ້ອຍ ແລະເຮັດກັບ Community, ແລ້ວຂະນ້ອຍກໍຄິດວ່າຢາກເປັນ ເປັນ Social work ຫັ້ນນະ.”

ຮູບພາບ ພໍ່ ແລະ ແມ່ ຂອງຍານາງ ຊາຣາ ຊັບເຟີ.

ໜ້າທີ່ສະເພາະຂອງຍານາງກໍຄື ອອກໄປພົບຄົນໄຂ້ທີ່ຕ້ອງການການຊ່ວຍເຫຼືອຢູ່ຕາມໂຮງໝໍຕ່າງໆ ໂດຍເຂົ້າໄປໃຫ້ຄໍາແນະນໍາ ຫຼືເປັນຜູ້ປະສານງານລະຫວ່າງໂຮງໝໍ ແລະຄົນໄຂ້ ຫຼືຄອບຄົວຄົນໄຂ້ ເພື່ອໃຫ້ຄົນໄຂ້ ຫຼືຍາດພີ່ນ້ອງ ເຂົ້າໃຈຂັ້ນຕອນທີ່ຖືກຕ້ອງ ແລະເຂົ້າເຖິງສິ່ງທີ່ພວກເຂົາເຈົ້າຕ້ອງການ ຫຼືໃນທາງທີ່ເໝາະສົມ, ຄຽງຄູ່ກັບສິ່ງທີ່ງ່າຍ ກໍຄືຄວາມຫຍຸ້ງຍາກ.

“ເມື່ອຂະນ້ອຍເຫັນບັນຫານີ້ນະ ຂ້ອຍຕ້ອງເບິ່ງຄົນ ຊິເຮັດຈັງໃດກັບຄົນ, ເວົ້າຈັງໃດກັບຄົນໃຫ້ເຂົາເຂົ້າໃຈ, ຄັນເຈົ້າເຂົ້າໄປຫາເຂົາ ໃຈຮ້າຍໃສ່ເຂົາ ບໍ່ເວົ້າກັບເຂົາດີຫັ້ນ ເຂົາແຮງນິໃສແຮງບໍ່ດີແມ່ນບໍ, ແຕ່ໃນຖານະທີ່ເຮົາເປັນ Social worker ເຈົ້າຮູ້ວ່າເຈົ້າຕ້ອງເຮັດ ເຈົ້າຕ້ອງເວົ້າຄ່ອຍໆ ເວົ້າດີໆ ເວົ້າເປັນຄື ທີ່ປຶກສາ, ບາງຄັ້ງເວລາທີ່ເຈົ້າຮູ້ສຶກກົດດັນ ເຈົ້າກໍຍັງຈໍາເປັນຕ້ອງເວົ້ານໍາຄົນອື່ນດີໆ ເປັນ Professional, ເຮັດໃຫ້ໝັ້ນໃຈວ່າພວກເຂົາເຂົ້າໃຈໃນທໍານຽມ ວັດທະນະທໍາຂອງເຈົ້າ, ສໍາຄັນຫຼາຍ ເຈົ້າຕ້ອງເຂົ້າໃຈຄົນ, ຄັນເຈົ້າບໍ່ເຂົ້າໃຈຄົນຫັ້ນນະ ເຈົ້າແຮງເຮັດບໍ່ໄດ້ ວຽກນີ້. ແມ່ນແຕ່ຈາກທ່ານໝໍເອງ ຕໍປະຊາຊົນ ເຈົ້າຕ້ອງຮູ້ວ່າເຂົາເປັນຈັງໃດ ວັດທະນະທໍາເຂົາເປັນຈັງໃດ, ເຂົາຄິດຈັງໃດ, ເຈົ້າຕ້ອງນໍາເອົາພວກເຂົາມາເຂົ້າກັນ ເຈົ້າຈໍາເປັນຕ້ອງພະຍາຍາມນໍາພວກເຂົາມາລວມກັນ...ນັ້ນແມ່ນໜ້າທີ່ຂອງນັກສັງຄົມສົງເຄາະ.”

ເນື່ອງຈາກເປັນຄົນຮັກໃນໜ້າທີ່ວຽກງານ, ນາຍາງຊາຣາ ຈຶ່ງເປັນຄົນທີ່ຈິງຈັງກັບວຽກງານ ແລະເຮັດວຽກຕາມສິ່ງທີ່ຕົນວາງເປົ້າໝາຍໄວ້ ຈົນກວ່າສິ່ງທີ່ຕົນຄາດໝາຍນັ້ນຈະບັນລຸຜົນ, ດັ່ງທີ່ເພື່ອຮ່ວມງານຂອງຍານາງ ດຣ. ທິມ ໂລເປສ, ນຶ່ງໃນຜູ້ອໍານວຍການດ້ານການແພດຂອງ Optum Medical Group (High risk program) ກ່າວວ່າ:

“ນາງເປັນຄົນທີ່ມີຄວາມມຸ່ງໝັ້ນໃນສິ່ງທີ່ນາງຕ້ອງດໍາເນີນການ ເພື່ອໃຫ້ມັນຖືກຕ້ອງສໍາລັບຄົນໄຂ້ຂອງພວກເຮົາ, ນາງເປັນຄົນທີ່ມີຄວາມຕັ້ງໃຈ ແລະຕະຫຼອດເວລາ ນາງຈະເປັນຄົນທີ່ຕັດສິນໃຈອອກມາໄດ້ດີ, ສິ່ງສໍາຄັນທີ່ຂ້າພະເຈົ້າມັກ ແລະຊື່ນຊົມລາວຫຼາຍໃນຄັ້ງທໍາອິດທີ່ຂ້າພະເຈົ້າພົບລາວ ແມ່ນນາງຄວາມຕັ້ງໃຈ ແລະເອົາໃຈໃສ່ຂອງນາງ ທີ່ເຮັດໃຫ້ພວກເຮົາສາມາດສະໜອງການເບິ່ງແຍງທີ່ດີໄດ້ ຕໍ່ບັນດາຄົນໄຂ້ຂອງພວກເຮົາ.”

ທ່ານໝໍ ທິມ ໂລເປສ, ນຶ່ງໃນຜູ້ບໍລິຫານຂອງ Optum Medical Group, High Risk Programs. ແລະເປັນເພື່ອຮ່ວມງານກັບ ຍານາງ ຊາຣາ ຊັບເຟີ.

ພໍ່ ທີ່ເປັນແບບຢ່າງໃຫ້ຍານາງມາແຕ່ຍັງນ້ອຍ ກ່າວວ່າ ຊາຣາ ເປັນຄົນເກັ່ງ ແລະພາກພຽນຕັ້ງແຕ່ນາງຍັງນ້ອຍ, ດັ່ງທີ່ເພິ່ນກ່າວໃຫ້ຟັງວ່າ:

“ທຽບໃສ່ນ້ອງສອງຄົນແລ້ວຫັ້ນ ເພິ່ນເປັນຄົນຂະຫຍັນກວ່າໝູ່, ຄັນວ່າເພິ່ນເຮັດວຽກຫັ້ນ ເພິ່ນຕ້ອງເຮັດໃຫ້ແລ້ວ ຄັນຖ້າວ່າເຮັດບໍ່ແລ້ວ ກໍເຊົາສາກ່ອນ, ຄັນວ່າຖ້າມີແຮງເຮັດໄດ້ຕື່ມອີກ ກະເຮັດໄປຈົນຮອດຈຂັ້ນສຸດທ້າຍ, ເທົ່ານັ້ນແລ້ວ ຄືຈຸດສໍາເລັດຂອງເພິ່ນ ຈຸດດີຂອງເພິ່ນວ່າຊັ້ນສາ.”

ຍານາງກ່າວວ່າ ພໍ່ແມ່ຂອງຍານາງຈະສອນຢູ່ສະເໝີວ່າ ເຫັນຄົນລໍາບາກຕ້ອງຊ່ວຍເຫຼືອ ດັ່ງທີ່ບູຮານກ່າວວ່າ “ຄົນລົ້ມ ບໍ່ຄວນຢຽບ,” ການໄດ້ຊ່ວຍຄົນ ຄືສິ່ງທີ່ເຮັດໃຫ້ຍານາງມີຄວາມສຸກ.

ນອກຈາກເຮັດວຽກ ເພື່ອຊຸມຊົນຕ່າງໆຢູ່ໃນຂົງເຂດພາກໃຕ້ຂອງລັດຄາລິຟໍເນຍແລ້ວ, ການເຮັດວຽກຮ່ວມກັນຢູ່ໃນອົງກອນເອງ ກໍເປັນບາດກ້າວນຶ່ງທີ່ສໍາຄັນ ເພາະຍານາງກ່າວວ່າ ການດໍາເນີນວຽກງານໃດນຶ່ງເພື່ອໃຫ້ບັນລຸຜົນ ແມ່ນການກ້າວເດີນໄປພ້ອມໆກັນເປັນທີມ ເຖິງແມ່ນເຮົາເອງຈະເປັນຫົວໜ້າ ຫຼືເກັ່ງປານໃດກໍຕາມ ເຮົາບໍ່ສາມາດສໍາເລັດວຽກໃດນຶ່ງດ້ວຍໂຕຂອງເຮົາເອງໄດ້, ເພາະທິມງານຂອງຍານາງ ຄືແຮງຜັກດັນ ເພື່ອເຮັດໃຫ້ວຽກປະສົບຜົນສໍາເລັດ ແລະສັງຄົມໄດ້ຮັບຜົນປະໂຫຍດຫຼາຍທີ່ສຸດ.

“ຂ້ອຍຕ້ອງເປັນຄົນທີ່ມີຄວາມເອື້ອອາທອນ, ຂ້ອຍຕ້ອງໝັ້ນໃຈວ່າ ຂ້ອຍໃຫ້ຄວາມສໍາຄັນແກ່ບັນດາພະນັກງານຂອງຂ້ອຍ, ນັ້ນແມ່ນຂໍ້ທໍາອິດ ສໍາລັບຜູ້ນໍາ. ສໍາລັບຂໍ້ທີສອງ, ເຈົ້າຕ້ອງເປັນຄົນທີ່ໃຫ້ການສະໜັບສະໜູນຜູ້ອື່ນ, ຄັນເຈົ້າເຫັນຄົນບໍ່ມີເງິນ ຄົນບໍ່ມີ Insurance ຄົນບໍ່ມີ Support ຫັ້ນນະ ເຈົ້າຕ້ອງຊ່ວຍ ຊ່ວຍຄົນ, ເຈົ້າບໍ່ແມ່ນຊິງວາກໜ້າໜີແບບບໍ່ສົນໃຈ, ບາງຄົນທີ່ເປັນຜູ້ນໍາຫັ້ນນະ ເຂົາບໍ່ກ່ຽວໃດ, ເຂົາວ່າ ຄັນເຈົ້າບໍ່ມີຈັງຊີ້ບໍ່ມີຈັງຊັ້ນ ເອົາໄປໃຫ້ຜູ້ອື່ນຊ່ວຍ, ເຊິ່ງເຈົ້າບໍ່ສາມາດເຮັດແນວນັ້ນໄດ້.”

ທ່ານ ເດວິດ ກອງບົວໄຂ, ພໍ່ ທີ່ເປັນແບບຢ່າງໃຫ້ແກ່ ຍານາງ ຊາຣາ.

ການເຮັດວຽກທາງດ້ານສັງຄົມສົງເຄາະ ເປັນສ່ວນນຶ່ງໃນຊີິວິດຂອງ ຍານາງ ຊາຣາ ໄປແລ້ວ, ແລະຍານາງເອງ ກໍຍັງຈະດໍາເນີນວຽກງານດັ່ງກ່າວນີ້ໄປເລື້ອຍໆ ຈົນກວ່າຕົນເອງຈະອອກບໍານານ ເພື່ອໃຫ້ຜູ້ຄົນຢູ່ໃນສັງຄົມທີ່ຍັງດ້ອຍໂອກາດ ໄດ້ຮັບການປະຕິບັດທາງດ້ານການແພດທີ່ດີ ແລະ ພຽງພໍ.