ຂະນະທີ່ຊາວໂລກພວມລໍຄອຍຖ້າຟັງຜົນການເລືອກຕັ້ງປະທານາທິບໍດີຂອງສະຫະລັດຢູ່ນີ້ ທ່ານນາງ ຊາແມນທາ ວາງ (Samantha Vang) ທີ່ສັງກັດພັກເດໂມແຄຣັດ ກໍໄດ້ຊະນະການເລືອກຕັ້ງ ເພື່ອໃຫ້ດໍາລົງຕໍາແໜ່ງເປັນສະມາຊິກສະ ພາຕ່ຳປະຈໍາລັດມິນເນໂຊຕ້າຕື່ມອີກເປັນສະໄໝທີ 2 ໂດຍໄດ້ຮັບຄະແນນ 63 ເປີເຊັນ ຂອງການລົງຄະແນນສຽງທັງໝົດໃນເຂດເລືອກຕັ້ງທີ 40B. ແມ່ຍິງອາເມຣິກັນເຊື້ອສາຍລາວເຜົ່າມົ້ງ ໄວສາມສິບກວ່າປີຜູ້ນີ້ບອກວ່າ ບູລິມະສິດຕົ້ນຕໍໃນນະໂຍບາຍຂອງທ່ານນາງນັບແຕ່ຖືກເລືອກຕັ້ງ ໃຫ້ເປັນສະມາຊິກສະພາຕໍ່າ ປະຈໍາລັດດັ່ງກ່າວໃນປີ 2018 ເປັນຕົ້ນມາ ແມ່ນສົ່ງເສີມການສຶກສາ ຂອງປະຊາ ຊົນຢູ່ໃນເຂດເລືອກຕັ້ງຂອງທ່ານນາງ ເພື່ອໃຫ້ກາຍເປັນປະຊາຄົມທີ່ມີຄວາມເຂັ້ມແຂງແລະໜຽວແໜ້ນ. ປັດຈຸບັນນີ້ບູລິມະສິດລວມ ແລະສູງສຸດກໍຄືຊ່ວຍເຫລືອ ແກ້ໄຂຜົນກະທົບຂອງການລະບາດຂອງພະຍາດໂຄວິດ-19. ທ່ານນາງ ກ່າວ ຕໍ່ວີໂອເອ ດັ່ງນີ້:
Your browser doesn’t support HTML5
ສະມາຊິກສະພາຕໍ່າຊາແມນທາ ວາງ ກ່າວກ່ຽວກັບບູລະສິດຂອງນະໂຍບາຍທ່ານນາງ
“ບູລິມະສິດສູງສຸດຂອງຂ້າພະເຈົ້າ ແນ່ນອນແມ່ນການເບິ່ງແຍງຄົນໃນລັດ ແລະ ຄົນໃນເຂດເລືອກຕັ້ງຂອງຂ້າພະເຈົ້າ. ຂ້າພະເຈົ້າຮູ້ວ່າ ການລະບາດຢ່າງໜັກ ຂອງພະຍາດໂຄວິດ-19 ເຮັດໃຫ້ຫລາຍໆ ຄອບຄົວ ກໍາລັງໄດ້ຮັບຄວາມ ເດືອດຮ້ອນ. ມີຫລາຍຄອບຄົວປະສົບກັບຄວາມຫຍຸ້ງຍາກປະເພດໃດປະເພດນຶ່ງ ເພາະການລະບາດຂອງໂຄວິດ-19 ເຮັດໃຫ້ເຂົາເຈົ້າສູນເສຍວຽກເຮັດງານທໍາ. ຂ້າພະເຈົ້າຄິດວ່າ ໂຄວິດ-19 ມີຜົນກະທົບຕໍ່ທຸກໆ ປະຊາຄົມບໍ່ວ່າຈະເປັນຊາວ ມົ້ງ ຫລືຊາວຜິວຂາວກໍຕາມ. ທຸກຄົນທີ່ພວກເຮົາຮູ້ຈະເປັນໝູ່ເພື່ອນບໍ ຫລື ເປັນ ຄົນໃນຄອບຄົວ ກໍມັກຈະເປັນຜູ້ທີ່ໄດ້ຮັບຜົນກະທົບຈາກ ໂຄວິດ-19 ທັງນັ້ນ. ອັນນີ້ ແມ່ນເຮັດໃຫ້ຫລາຍໆ ປະຊາຄົມພົບກັບຄວາມລໍາບາກ, ໂດຍສະເພາະແມ່ນ ປະຊາຄົມອາເມຣິກັນເຊື້ອສາຍເອເຊຍ. ໂດຍສະເພາະແລ້ວ ກໍແມ່ນໃນເມື່ອວ່າ ວັດ ທະນະທໍາຂອງພວກເຮົາ ແມ່ນຢູ່ໃກ້ກັນກັບຄອບຄົວ ຢູ່ໃກ້ກັບຜູ້ເຖົ້າຜູ້ແກ່.”
ເມື່ອຖາມເຖິງຄວາມຮູ້ສຶກຂອງທ່ານນາງກ່ຽວກັບຜົນການນັບຄະແນນທີ່ຍັງບໍ່ເປັນທາງການທີ່ສະແດງໃຫ້ເຫັນວ່າອະດີດຮອງປະທານາທິບໍດີ ໂຈ ໄບເດັນຈາກພັກເດ ໂມແຄຣັດ, ຂູ່ແຂ່ງຂອງປະທານາທິບໍດີດໍໂນລ ທຣໍາ ແມ່ນໄດ້ໄຊຊະນະໄປ ນັ້ນ ທ່ານນາງຕອບວ່າ:
Your browser doesn’t support HTML5
ສະພາຜູ້ແທນສະພາຕໍ່າສາແມນທາ ວາງ ກ່າວກ່ຽວກັບການເລືອກຕັ້ງປະທານທິບໍດີ ສຫລ
“ທ່ານໄບເດັນຊະນະໃນລັດມິນເນໂຊຕາ. ມິນເນໂຊຕາເປັນລັດນຶ່ງທີ່ມີການຍາດ ແຍ່ງກັນ ໃນເຂດຕາເວັກຕົກຕອນກາງຂອງປະເທດ. ປະທານາທິບໍດີທຣໍາ ແລະ ທ່ານໂຈ ໄບເດັນ ພາກັນໂຄສະນາຫາສຽງຢ່າງໜັກຢູ່ໃນມິນເນໂຊຕາ ແລະວິສ ຄອນຊິນ. ສະນັ້ນຜົນປາກົດອອກມາ ແມ່ນທ່ານໄບເດັນຊະນະໃນລັດມິນເນໂຊ ຕາ ແລະພວກເຮົາກໍາລັງລໍຖ້າຜົນຢ່າງເປັນທາງການຢູ່. ມີອີກຫລາຍລັດຍັງນັບ ບັດລົງຄະແນນສຽງຂອງເຂົາເຈົ້າຢູ່. ຖ້າຈະເວົ້າແລ້ວມັນອາດຈະໃຊ້ເວລາ ອີກ ຫລາຍມື້ ເພື່ອຈະຮູ້ຜົນໄດ້. ແຕ່ວ່າຂ້າພະເຈົ້າມີຄວາມເຊື່ອຫລາຍວ່າ ພວກເຮົາ ກໍາລັງເດີນໄປໃນທາງທີ່ດີຢູ່.”
ນອກຈາກທ່ານນາງວາງແລ້ວ ກໍມີຊາວອາເມຣິກັນເຊື້ອສາຍລາວເຜົ່າມົ້ງ ທີ່ລົງ ແຂ່ງຂັນໃຫ້ຖືກເລືອກຕັ້ງເປັນສະມາຊິກສະພາປະຈຳລັດນັ້ນອີກ 5 ທ່ານ ຊຶ່ງ ສ່ວນໃຫຍ່ແລ້ວ ກໍແມ່ນສັງກັດພັກເດໂມແຄຣັດ.
ອ່ານສະຫລຸບຫຍໍ້ກ່ຽວກັບຂ່າວນີ້ເປັນພາສາອັງກິດ
Read the Summary this News in English
Lao Hmong-American Representative is Re-elected in MN
With 63% of the total votes, Samantha Vang, a Lao Hmong-American state house representative won her re-election for the second term in 40B district of Minnesota. A young state house representative said that “The promotion of education that will empower my constituents and increase the community’s resilience is always my priority; but currently, taking care of people in my state and district in coping with Covid-19 pandemic effects, including education, is my first and foremost priority.” Ms. Vang is one of six candidates of Hmong decent seeking, mostly democrats, to be re-elected as Minnesota state law makers.