ຕໍາຫຼວດແລະເຈົ້າໜ້າທີ່ສືບສວນຂອງຣັດເຊຍ ໄດ້ເຂົ້າຄົ້ນບ້ານຂອງຜູ້ນໍາຝ່າຍຄ້ານ
ຫຼາຍຄົນ ໃນມື້ກ່ອນການປະທ້ວງໃນນະຄອນຫລວງມອສກູ ທີ່ໄດ້ມີການວາງແຜນໄວ້ນັ້ນ.
ຄະນະກໍາມະການສອບສວນຂອງລັດຖະບານກາງຣັດເຊີຍ ຫລື FIC ກ່າວໃນຖະແຫຼງ
ການໃນວັນຈັນມື້ນີ້ວ່າ ການເຂົ້າຄົ້ນໄດ້ແນເປົ້າໝາຍໃສ່ບ້ານເຮືອນຂອງບັນດາຜູ້ຈັດ
ການໂຮມຊຸມນຸມຄັ້ງກ່ອນ ໃນເດືອນແລ້ວນີ້ ເພື່ອປະທ້ວງປະທານາທິບໍດີ Vladimir
Putin ນັ້ນ.
ຖະແຫຼງການ ໄດ້ບົ່ງຊື່ທ່ານ ທ່ານ Alexei Navalny ແລະທ່ານ Sergi Udaltsov ທີ່ໄດ້
ຖືກຈໍາຄຸກມາແລ້ວ 15 ມື້ ໃນເດືອນແລ້ວນີ້ ໃນຖານທໍາການເດີນຂະບວນປະທ້ວງພິທີ
ສາບານໂຕເຂົ້າຮັບຕໍາແໜ່ງຂອງປະທານາທິບໍດີ Putin ພ້ອມທັງ ທ່ານ Ilya Yashin
ນັກເຄື່ອນໄຫວອີກຄົນນຶ່ງ ທີ່ໄດ້ຖືກກັກຕົວໄວ້ ໃນການໂຮມຊຸມນຸມຕໍ່ຕ້ານບັ້ນນຶ່ງ.
ທາງກອງສືບສວນ ກ່າວວ່າ ຕົນມີແຜນການຈະທໍາການກວດຄົ້ນ ປະມານ 10 ບ່ອນ
ໃນມື້ນີ້.
ພວກຜູ້ນໍາຝ່າຍຄ້ານ ຫວັງທີ່ຈະດຶງດູດຜູ້ຄົນ ໃຫ້ໄປໂຮມຕົວທໍາການຊຸມນຸມປະທ້ວງຂະໜາດ
ໃຫຍ່ ໃນວັນອັງຄານມື້ອື່ນນີ້ ຊຶ່ງເປັນເວລາບໍ່ເທົ່າໃດມື້ ຫຼັງຈາກທີ່ ທ່ານ Putin ໄດ້ລົງນາມ
ໃນຮ່າງກົດໝາຍສະບັບນຶ່ງ ທີ່ເພີ້ມຄ່າປັບໄໝຂຶ້ນຢ່າງຫລວງຫລາຍ ຕໍ່ຜູ້ຄົນທີ່ພົວພັນກັບ
ການໂຮມຊຸມນຸມປະທ້ວງ ທີ່ບໍ່ໄດ້ຮັບອະນຸຍາດນັ້ນ.
ບັດນີ້ ພວກທີ່ຈັດການໂຮມຊຸມນຸມປະທ້ວງທີ່ຜິດກົດໝາຍນັ້ນ ແມ່ນຈະຖືກປັບໄໝ ຫລາຍເຖິງ 30,000 ໂດລາ ໃນຂະນະນທີ່ຜູ້ປະທ້ວງແຕ່ລະຄົນນັ້ນອາດສາມາດຖືກປັບໄໝໄດ້ຮອດ 9,000 ໂດລາ ຫຼືບໍ່ກໍຖືກບັງຄັບໃຫ້ເຮັດວຽກຮັບໃຊ້ສັງຄົມ ຮອດ 200 ຊົ່ວໂມງ.