ຄົນວາງລະເບີດສະລະຊີບຄົນນຶ່ງ ໄດ້ສັງຫານຢ່າງນ້ອຍ 42 ຄົນ
ຢູ່ໃນນະຄອນຫລວງຂອງປະເທດເຢເມັນ ໃນອັນທີ່ປາກົດວ່າ
ເປັນການໂຈມຕີ ທີ່ແນໃສ່ພວກກະບົດເຜົ່າ Houthi ນິກາຍ
Shi’ite.
ລະເບີດໄດ້ແຕກຂຶ້ນ ໃນວັນພະຫັດມື້ນີ້ ຢູ່ບໍລິເວນຈະຕຸລັດ
Tahrir ໃນໃຈກາງນະຄອນຫລວງ Sanaa ທີ່ພວກກະບົດໄດ້
ຄວບຄຸມຕັ້ງແຕ່ເດືອນແລ້ວນີ້.
ຍັງບໍ່ມີກຸ່ມໃດ ອອກມາອ້າງເອົາ ຄວາມຮັບຜິດຊອບ ສຳຫລັບ
ການວາງລະເບີດຄັ້ງນີ້.
ຂະນະດຽວກັນ ຢູ່ພາກໃຕ້ຂອງເຢເມັນນັ້ນ ກໍໄດ້ມີການໂຈມຕີສະລະຊີບດ້ວຍລະເບີດລົດ
ທີ່ເຮັດໃຫ້ທະຫານ ຢ່າງໜ້ອຍ 20 ຄົນເສຍຊີວິດ.
ພວກ Houthi ໄດ້ທຳການປະທ້ວງເປັນເວລາຫຼາຍອາທິດ ຮຽກຮ້ອງເອົາສ່ວນຮ່ວມໃນການປົກຄອງຫຼາຍກວ່າເກົ່າ ແລະໃຫ້ຈັດຕັ້ງລັດຖະບານໃໝ່ ກ່ອນຈະບັນລຸຂໍ້ຕົກລົງກັບລັດຖະບານ ທີ່ສະຫະປະຊາຊາດເປັນຜູ້ໄກ່ເກ່ຍ ໃນເດືອນກັນຍານັ້ນ.
ລະເບີດສະລະຊີບ ສັງຫານ 42 ຄົນ ໃນເຢເມັນ
ພວກເຂົາເຈົ້າໄດ້ວາງແຜນທີ່ຈະທຳການປະທ້ວງອີກ ໃນວັນພະຫັດມື້ນີ້ ເພື່ອສະແດງການຄັດຄ້ານ ຕໍ່ການທີ່ປະທານາທິບໍດີ Abed Rabbo Mansour ໄດ້ແຕ່ງຕັ້ງ ໃຫ້ທ່ານ Ahmed Awad bin Mubarak ເປັນນາຍົກລັດຖະມົນຕີຄົນໃໝ່. ແຕ່ ທ່ານ bin Mubarak ໄດ້ປະຕິເສດທີ່ຈະຮັບເອົາການແຕ່ງຕັ້ງນີ້.
ສື່ຂອງທາງການ ໄດ້ລາຍງານອ້າງຄຳເວົ້າຂອງທ່ານ bin Mubarak ທີ່ກ່າວວ່າ ທ່ານຢາກຫຼີກລ້ຽງ ການຂັດແຍ້ງກັນຕື່ມອີກ ຢູ່ໃນປະເທດ.
ຜູ້ນຳພວກກະບົດ Houthi ທ່ານ Abdel-Malik al-Houthi ໄດ້ກ່າວໃນຄຳຖະແຫລງເມື່ອວັນພຸດວານນີ້ວ່າ ມີການແຊກແຊງຈາກຕ່າງປະເທດ ຢູ່ເບື້ອງຫຼັງຂອງການເລືອກເອົາທ່ານ bin Mubarak ນັ້ນ.
Your browser doesn’t support HTML5
YEMEN BLAST VO