ບັນດາເພື່ອນຮ່ວມພັກຣີພັບບລີກັນຂອງອະດີດປະທານາທິບໍດີ ສະຫະລັດ ທ່ານ ດໍໂນລ ທຣຳ ໄດ້ອອກມາປ້ອງກັນທ່ານ ໃນວັນອັງຄານວານນີ້, ໂດຍຂໍຄຳອະທິບາຍສຳລັບການກວດຄົ້ນຢູ່ຄະລືຫາດ ມາ-ອາ-ລາໂກ ຂອງທ່ານໃນລັດຟລໍຣິດາ ໂດຍເຈົ້າໜ້າທີ່ FBI, ເຊິ່ງພວກເຈົ້າໜ້າທີ່ໄດ້ຊອກຫາເອກະສານລັບ ທີ່ທ່ານໄດ້ເອົາໄປຈາກທຳນຽບຂາວ ໃນເວລາທີ່ການດຳລົງຕຳແໜ່ງປະທານາທິບໍດີ ຂອງທ່ານໄດ້ສິ້ນສຸດລົງເມື່ອເດືອນມັງກອນ 2021.
ຜູ້ນຳສຽງສ່ວນນ້ອຍສະພາຕ່ຳທ່ານ ເຄວິນ ແມັກຄາທີ ໄດ້ປະຕິຍານ ທີ່ຈະເປີດການສືບສວນສອບສວນ ຖ້າພັກຣີພັບບລີກັນ ຄວບຄຸມສະພາຕ່ຳຈາກພັກເດໂມແຄຣັດ ໃນຕົ້ນປີໜ້າ, ເຊິ່ງການຢັ່ງຫາງສຽງໄດ້ຊີ້ໃຫ້ເຫັນວ່າແມ່ນຄວາມເປັນໄປໄດ້ທາງການເມືອງທີ່ຊັດເຈນ.
ທ່ານ ແມັກຄາທີ ໄດ້ກ່າວໃນຂໍ້ຄວາມທີ່ຂຽນຢູ່ທວິດເຕີວ່າ “ຂ້ອຍໄດ້ເຫັນພໍແລ້ວ. ກະຊວງຍຸຕິທຳໄດ້ໄປຮອດຈຸດທີ່ອົດກັ້ນອີກຕໍ່ໄປບໍ່ໄດ້ແລ້ວ ກ່ຽວກັບ ການໃຊ້ການເມືອງເປັນອາວຸດ. ເວລາພັກຣີພັບບລີກັນຍຶດເອົາສະພາຕ່ຳຄືນ, ພວກເຮົາຈະດຳເນີນການສືບສວນກະຊວງດັ່ງກ່າວໃນທັນທີ, ເຮັດຕາມຂໍ້ເທັດຈິງ, ແລະ ຈະເຮັດທຸກຢ່າງເພື່ອບັນລຸຄວາມສຳເລັດ.”
ທ່ານໄດ້ເຕືອນລັດຖະມົນຕີຍຸຕິທຳ ທ່ານ ເມີຣິກ ກາແລນ, ໃຫ້ “ຮັກສາເອກະສານຂອງເຈົ້າໄວ້ ແລະ ເຮັດຕົນເອງໃຫ້ຫວ່າງ” ເພື່ອໄປໃຫ້ການຢູ່ໃນການສືບສວນສອບສວນ.
ຮອງປະທານາທິບໍດີຂອງທ່ານ ທຣຳ, ທ່ານ ໄມຄ໌ ເພັນສ໌ ໄດ້ກ່າວວ່າ “ຂ້າພະເຈົ້າມີຄວາມເປັນຫ່ວງຢ່າງເລິກເຊິ່ງກັບປະຊາຊົນ ອາເມຣິກັນ ຫຼາຍລ້ານຄົນ ກ່ຽວກັບ ການກວດຄົ້ນ ທີ່ບໍ່ເຄີຍມີມາກ່ອນຢູ່ສະຖານທີ່ພັກສ່ວນຕົວຂອງປະທານາທິບໍດີ ທຣຳ. ບໍ່ມີອະດີດປະທານາທິບໍດີ ສະຫະລັດ ຄົນໃດເຄີຍຖືກບຸກກວດຄົ້ນຢູ່ສະຖານທີ່ພັກສ່ວນຕົວຂອງເຂົາເຈົ້າໃນປະຫວັດສາດຂອງ ອາເມຣິກາ.”
ທ່ານ ເພັນສ໌ ໄດ້ກ່າວໃນວັນຈັນທີ່ຜ່ານມາວ່າ ການກວດຄົ້ນຄະລືຫາດແຄມມະຫາສະໝຸດ ແອັດແລນຕິກ ຂອງທ່ານ ທຣຳ “ໄດ້ສ້າງຄວາມເສຍຫາຍຕໍ່ຄວາມໝັ້ນໃຈຂອງສາທາລະນະໃນລະບົບຍຸຕິທຳຂອງພວກເຮົາ, ແລະ ລັດຖະມົນຕີ ກາແລນ ຕ້ອງໃຫ້ການອະທິບາຍສາເຫດຢ່າງເຕັມທີ່ຕໍ່ປະຊາຊົນອາເມຣິກັນ ວ່າເປັນຫຍັງການດຳເນີນການນີ້ຈຶ່ງໄດ້ເກີດຂຶ້ນ, ແລະ ທ່ານຕ້ອງເຮັດແນວນັ້ນໃນທັນທີ.”
ສະມາຊິກສະພາສັງກັດພັກຣີພັບບລີກັນຄົນອື່ນໆໄດ້ເອີ້ນການກວດຄົ້ນດັ່ງກ່າວວ່າການລະເມີດອຳນາດ, ເຖິງແມ່ນວ່າການກວດຄົ້ນດັ່ງກ່າວແມ່ນໄດ້ຮັບອະນຸຍາດໂດຍສານ ແລະ ມີຄວາມເປັນໄປໄດ້ວ່າຖືກອະນຸມັດຢູ່ໃນລະດັບທີ່ສູງທີ່ສຸດຂອງກະຊວງຍຸຕິທຳ. ສຳລັບບົດບາດຂອງ ທ່ານ ກາແລນ ນັ້ນ ແມ່ນບໍ່ມີໃຜຮູ້ຈັກ.