ຟີລິບປິນກ່າວໃນວັນຈັນມື້ນີ້ວ່າ ຕົນໄດ້ຮຽກຕົວທູດພິເສດຂອງຈີນຄົນນຶ່ງໃຫ້ເຂົ້າພົບ ກ່ຽວກັບເລື້ອງ "ການກະທຳທີ່ເປັນການຮຸກຮານ" ຂອງໜ່ວຍຍາມຝັ່ງທະເລຈີນ ແລະບັນດາຂະບວນເຮືອລຳອື່ນໆ ໃກ້ກັບຫີນປະກາລັງເຂດນອກຊາຍຝັ່ງທະເລຂອງປະເທດເອເຊຍຕາເວັນອອກສຽງໃຕ້ແຫ່ງນີ້, ອີງຕາມລາຍງານຂອງອົງການຂ່າວ AFP.
ປັກກິ່ງ ແລະ ມະນິລາ ມີປະຫວັດຄວາມເປັນມາອັນຍາວນານກ່ຽວກັບຂໍ້ຂັດແຍ້ງທາງທະເລຢູ່ໃນທະເລຈີນໃຕ້ ແລະໄດ້ມີການປະເຊີນໜ້າກັນຊ້ຳແລ້ວຊ້ຳອີກລະຫວ່າງກຳປັ່ນຂອງພວກເຂົາເຈົ້າ ໃກ້ກັບແນວຫິນປະກາລັງທີ່ມີຄວາມຂັດແຍ້ງກັນໃນຊ່ວງບໍ່ເທົ່າໃດເດືອນທີ່ຜ່ານມາ.
ເຫດການຫຼ້າສຸດເກີດຂຶ້ນໃນວັນເສົາແລ້ວນີ້ ໃກ້ກັບຫາດໂທມັສທີສອງ ຫຼື Second Thomas Shoal ໃນໝູ່ເກາະສແປຣດລີ (Spratly) ລະຫວ່າງການປະຕິບັດໜ້າທີ່ຕາມປົກກະຕິຂອງຟີລິບປິນ ເພື່ອສະໜອງເຄື່ອງສະບຽງຈໍາເປັນໃຫ້ແກ່ກອງທະຫານຟີລິບປິນທີ່ຕັ້ງຄ້າຍຢູ່ກຳປັ່ນ BRP Sierra Madre ເຊິ່ງເປັນກຳປັ່ນລົບຂອງກອງທັບເຮືອທີ່ຈອດຕິດຄ້າງຢູ່ຫາດດັ່ງກ່າວ.
ຟີລິບປິນກ່າວວ່າ ໜ່ວຍຍາມຝັ່ງທາງທະເລຂອງຈີນ ໄດ້ຂັດຂວາງກໍາປັ່ນສະໜອງສະບຽງຂອງຕົນ ແລະໄດ້ເຮັດໃຫ້ເກີດຄວາມເສຍຫາຍດ້ວຍການສີດນ້ຳດ້ວຍທໍ່ຂະໜາດໃຫຍ່, ເຊິ່ງເຮັດໃຫ້ທະຫານ 3 ຄົນໄດ້ຮັບບາດເຈັບ.
ເຈົ້າໜ້າທີ່ຍາມຝັ່ງຂອງຈີນ ໄດ້ກ່າວປ້ອງກັນການກະທຳຂອງຕົນ, ໂດຍອະທິບາຍວ່າ ເປັນ "ກົດລະບຽບບັງຄັບໃຊ້ທາງກົດໝາຍ ໃນການຂັດຂວາງ ແລະຂັບໄລ່" ຕໍ່ກຳປັ່ນຕ່າງປະເທດທີ່ "ພະຍາຍາມບຸກລຸກເຂົ້າໄປໃນເຂດນ່ານນ້ຳຂອງຈີນ."
ຫາດໂທມັສທີສອງ ມີໄລຍະຫ່າງຈາກເກາະປາລາວານ (Palawan) ທີ່ຕັ້ງຢູ່ທາງທິດຕາເວັນຕົກຂອງຟີລິບປິນປະມານ 200 ກິໂລແມັດ, ແລະມີໄລຍະຫ່າງຫຼາຍກວ່າ 1,000 ກິໂລແມັດຈາກເກາະໄຫໜານ (Hainan), ເຊິ່ງເປັນເກາະຂະໜາດໃຫຍ່ຂອງຈີນທີ່ມີໄລຍະໃກ້ທີ່ສຸດ.
ໃນວັນຈັນມື້ນີ້ ມານີລາ ໄດ້ຖ່າຍທອດຄວາມຮູ້ສຶກຂອງຕົນເຖິງ “ການປະທ້ວງຢ່າງແຂງຂັນຕໍ່ການກະທຳທີ່ຮາວີທີ່ດຳເນີນການໂດຍໜ່ວຍຍາມຝັ່ງຂອງຈີນ ແລະກຸ່ມທະຫານບ້ານທາງທະເລຂອງຈີນ ຕໍ່ພາລະກິດການໝູນວຽນກຳລັງແລະສະບຽງໂດຍຟີລິບປິນ ໃນຫາດຊາຍ ອາຢຸນຈິນ” ກະຊວງການຕ່າງປະເທດໄດ້ກ່າວ ໂດຍໃຊ້ຊື່ຂອງຫາດຊາຍທອມມັສທີສອງ ໃນພາສາຂອງຟີລິບປິນ.