ອະດີດປະທານາທິບໍດີ Gloria Arroyo ແຫ່ງຟີລິບປິນບໍ່ຍອມຮັບຜິດຕໍ່ຂໍ້ກ່າວຫາຖານທໍາການສໍ້ໂກງການປ່ອນບັດເລືອກຕັ້ງ ໃນການດໍາເນີນຄະດີລະດັບສູງທີ່ພວມດໍາເນີນໄປຢູ່ໃນກຸງມານີລາໃນວັນພະຫັດມື້ນີ້.
ທ່ານນາງ Arroyo ໄວ 64 ປີໄດ້ໄປປາກົດໂຕໃນການດໍາເນີນຄະດີ ໃນສານເປັນເວລາ
ສັ້ນໆ ໂດຍໃບໜ້າຫົວຍິ້ມແຍ້ມແລະໃສ່ເຜືອກໃສ່ຄໍສີຂາວຍ້ອນທ່ານນາງປວດກະດູກສັນ
ຫລັງນັ້ນ.
ທ່ານນາງຖືກກ່າວຫາຖານຮວມຫົວກັນກັບຜູ້ນໍາທະຫານທີ່ມີຊື່ສຽງຄົນນຶ່ງໃນປີ 2007 ໃນ
ການກໍ່ຄວາມປັ່ນປ່ວນຂຶ້ນໃນການເລືອກຕັ້ງເອົາສະມາຊິກສະພາສູງທີ່ພັກຂອງທ່ານນາງ
ສະໜັບສະໜຸນນັ້ນ.
ທ່ານ Ferdinand Topacio ທະນາຍຄວາມຂອງທ່ານນາງ Arroyo ກ່າວຕໍ່ບັນດານັກ
ຂ່າວຢູ່ນອກສານວ່າ ທ່ານມີຄວາມເຫັນໃນແງ່ດີວ່າລູກຄວາມຂອງທ່ານຈະພົ້ນຈາກຂໍ້ຫາ
ດັ່ງກ່າວ.
ອັນນີ້ແມ່ນຂໍ້ຫາທໍາອິດຂອງຂໍ້ກ່າວຫາຫລາຍກະທົງທີ່ມີຕໍ່ທ່ານນາງ Arroyo ຈາກປະທາ
ນາທິບໍດີ Benigno Aquino ທີ່ຂຶ້ນດໍາລົງຕໍາແໜ່ງແທນທ່ານນາງນັ້ນ.
ທ່ານນາງ Arroyo ທີ່ດໍາລົງຕໍາແໜ່ງປະທານາທິບໍດີຕັ້ງແຕ່ປີ 2001 ຫາ 2010 ນັ້ນ
ກ່າວວ່າການກ່າວຫາເຫລົ່ານີ້ມີການເມືອງແອບແຝງ ແລະມີວັດຖຸປະສົງເພື່ອເສີມຂະຫຍາຍ
ຄວາມນິຍົມໃຫ້ທ່ານ Aquino.
ຢູ່ນອກສານ ພວກສະໜັບສະໜຸນທ່ານນາງ Arroyo ຈຸນຶ່ງນ້ອຍໆພາກັນຖືປ້າຍຕ່າງໆ
ແລະໂຮຮ້ອງຄໍາຂວັນໃຫ້ການສະໜັບສະໜຸນຕໍ່ຄວາມບໍລິສຸດຂອງທ່ານນາງ.