ກະຊວງປ້ອງກັນປະເທດສະຫະລັດ ກ່າວວ່າ ຕົນບໍ່ສາມາດໃຫ້
ການຢືນຢັນກ່ຽວກັບລາຍງານທີ່ວ່າ ຜູ້ນຳກຸ່ມລັດອີສລາມ ທ້າວ
Abu Bakr al-Baghdadi ໄດ້ຖືກສັງຫານ ຫຼືບາດເຈັບ ໃນການ
ໂຈມຕີທາງອາກາດຂອງສະຫະລັດ ໃນພາກເໜືອຂອງອີຣັກ
ໃນແລງວັນສຸກຜ່ານມານີ້.
ໂຄສົກຂອງທຳນຽບຫ້າແຈ ພັນເອກ Steve Warren ໄດ້ກ່າວ
ໃນວັນຈັນວານນີ້ວ່າ ກອງກຳລັງສະຫະລັດ ບໍ່ໄດ້ແນເປົ້າໝາຍ
ໂດຍສະເພາະເຈາະຈົງ ໃສ່ທ້າວ Baghdadi ໃນການໂຈມຕີ
ທີ່ວ່ານີ້ ແຕ່ແມ່ນເພື່ອພະຍາຍາມທີ່ຈະບັ່ນທອນກຳລັງຄວາມ
ສາມາດຂອງກຸ່ມ ດັ່ງກ່າວ ໃນການຕໍ່ສູ້.
ໃນວັນອາທິດຜ່ານມານີ້ ລັດຖະມົນຕີປ້ອງກັນປະເທດອີຣັກ ທ່ານ Khalid al Ubaydi ຕັ້ງ
ໃຈອອກຂ່າວທາງ Facebook ຂອງທ່ານ ໂດຍກ່າວວ່າ ທ້າວ Baghdadi ໄດ້ຮັບ ບາດເຈັບຈາກການໂຈມຕີທາງອາກາດ ແລະລາຍງານຂ່າວຫລາຍໆສະບັບ ກໍກ່າວອ້າງວ່າ ການໂຈມ
ຕີຄັ້ງນີ້ ໄດ້ສັງຫານຜູ້ຊ່ອຍທີ່ໃກ້ຊິດກັບທ້າວ Baghdadi.
ອີກເຫດການນຶ່ງ ໃນວັນຈັນວານນີ້ ກຸ່ມຫົວຮຸນແຮງ Ansar Beit al-Maqdis ຂອງອີຈິບ ກໍປະຕິຍານວ່າຈະຊື່ສັດຈົງຮັກພັກດີຕໍ່ທ້າວ Baghdadi. ກຸ່ມຫົວຮຸນແຮງອີຈີບ ດັ່ງກ່າວນີ້
ໄດ້ປະກາດໃຫ້ການສະໜັບສະໜຸນ ຜ່ານທາງ Twitter ແລະກ່າວເຖິງທ້າວ Baghdadi
ວ່າ ເປັນຜູ້ນຳທາງສາສະໜາ ຫຼື “Caliph” ແລະຮຽກຮ້ອງໃຫ້ຊາວມຸສລິມອື່ນໆ ໃຫ້ການສະໜັບສະໜຸນທ່ານນຳ.