ສານສູງສຸດຂອງປາກິສຖານ ໄດ້ສັ່ງໃຫ້ນາຍົກລັດຖະມົນຕີ Raja Pervez Ashraf ໄປປະ
ກົດໂຕ ໃນຖານເມີນເສີຍຕໍ່ຄໍາສັ່ງໃຫ້ເປີດຄະດີກ່ຽວກັບການສໍ້ລາດບັງຫລວງ ຂອງປະທາ
ນາທິບໍດີປາກິສຖານ ຄືນໃໝ່.
ໝາຍເກາະຮຽກຕົວຂອງສານໃນວັນພຸດມື້ນີ້ ແມ່ນການເຄື່ອນໄຫວຫຼ້າສຸດ ໃນການຂັດ
ແຍ້ງທີ່ມີມາເປັນເວລາຍາວນານກັບລັດຖະບານ ກ່ຽວກັບການກ່າວຫາ ເລື້ອງການສໍ້ລາດ
ບັງຫລວງ ຕໍ່ປະທານາທິບໍດີ Asif Ali Zardari ຜູ້ທີ່ໄດ້ປະຕິເສດວ່າ ທ່ານກະທໍາຜິດຫຍັງ.
ໃນເດືອນມິຖຸນາຜ່ານມາ ສານສຸງສຸດຂອງປາກິສຖານໄດ້ພົບເຫັນວ່າ ອະດີດນາຍົກລັດຖະ
ມົນຕີ Yousuf Raza Gilani ມີຄວາມຜິດ ໃນຖານໝິ່ນປະ ໝາດຕໍ່ສານ ຍ້ອນບໍ່ຍອມ
ຂຽນຈົດໝາຍໄປຂໍຮ້ອງໃຫ້ເຈົ້າໜ້າທີ່ສະວິສ ເປີດຄະດີສໍ້ລາດບັງຫລວງ ຕໍ່ປະທານາທິບໍດີ
Zardari ຄືນໃໝ່. ສານໄດ້ຕັດສິນວ່າ ທ່ານ Gilani ບໍ່ມີຄຸນນະສົມບັດທີ່ຈະກໍາໜ້າທີ່ຕໍ່ໄປ
ແລະທ່ານ Ashraf ຈຶ່ງໄດ້ເຂົ້າຮັບໜ້າທີ່ດັ່ງກ່າວນີ້ແທນ.
ວັນພຸດມື້ນີ້ ສານໄດ້ສັ່ງໃຫ້ທ່ານ Ashraf ໄປປະກົດໂຕ ໃນວັນທີ 27 ເດືອນນີ້ ແລະສະ
ແດງເຫດຜົນວ່າ ເປັນຫຍັງທ່ານຈຶ່ງຄວນຖືກຍົກເວັ້ນ ຈາກການດຳເນີນຄະດີ ໝິ່ນປະໝາດ
ຕໍ່ສານນັ້ນ.